ថ្ងៃទី 09 មិថុនា 2014 ម៉ោង 17:24:11
ខេត្ដសៀមរាប ៖ ក្រុងសៀមរាបមិនត្រឹមតែទាក់ទាញភ្ញៀវទេសចររាប់លាននាក់ក្នុងមួយឆ្នាំមកទស្សនាប្រាងប្រាសាទបុរណប៉ុណ្ណោះទេ ក៏ប៉ុន្តែក្រុងប្រវត្ដិសាស្ដ្រមួយនេះ ក៏មានក្លិនស្អុយពីគំនរសំរាមមកលើប្រជាពលរដ្ឋ និងភ្ញៀវទេសចរផងដែរ ។ ជាក់ស្ដែង គំនរសំរាម របស់ក្រុមមហ៊ុនហ្គាអ៊ីយ៉ា (GEA EA) ស្ថិតនៅភូមិខ្នារថ្មី សង្កាត់ជ្រាវ ក្រុងសៀមរាប បានជះក្លិនស្អុយរាប់ឆ្នាំមកហើយ បណ្ដាលឲ្យប៉ះពាល់សុខភាពលើពួកគាត់ ពិសេសក្មេងៗ ប៉ុន្ដែអាជ្ញាធរគ្រាន់តែសន្យាម្ដងហើយម្ដងទៀតក្នុងបំបាត់និងសំអាត ។
ពលរដ្ឋជាច្រើនគ្រួសារ នៅក្បែរគំនរសំរាមរបស់ក្រុមហ៊ុនហ្គាអ៊ីយ៉ានេះ ខកចិត្ដនឹងអាជ្ញាធរដែលគ្មានចំណាត់ការលើក្លិនកាកសំណល់ស្អុយរលួយ ដែលជះក្លិនស្អុយមកលើពួកគាត់ ។
អាជ្ញាធរបានចុះពិនិត្យទីតាំងស្ដុកសំរាមបណ្ដោះអាសន្នរបស់ក្រុមហ៊ុនហ្គាអ៊ីយ៉ានេះ កាលពីថ្ងៃសុក្រទី០៦ ខែមិថុនា បន្ទាប់ពីសន្យាជាមួយពលរដ្ឋ៦ខែឲ្យបាត់ក្លិនស្អុយ និងសំឡេងគ្រឿងចក្ររំខានដល់ពួកគេ ប៉ុន្ដែការសន្យាមិនមានប្រសិទ្ធភាព ។
ពលរដ្ឋនៅភូមិខ្នារថ្មី សង្កាត់ជ្រាវ លោក គួច សុខហេង បានឲ្យដឹងថា គំនរសម្រាមស្ដុកទុករបស់ក្រុមហ៊ុនហ្គាអ៊ីយ៉ា (GEA EA) បានជះក្លិនស្អុយរលួយ ប៉ះពាល់សុខភាពអ្នកភូមិ ជាពិសេសលើកុមារជាច្រើនឆ្នាំមកហើយ ប៉ុន្ដែជាអាជ្ញាធរបែរជាអនុញ្ញាតឲ្យក្រុមហ៊ុននេះ ចាក់សំរាមស្ដុកទុកទីតាំងចាស់៣ខែបន្ដទៀត ។ លោកបន្ដថា ប្រជាពលរដ្ឋបានដាក់ពាក្យបណ្ដឹងជាបន្ដបន្ទាប់ ដើម្បីឲ្យអាជ្ញាធរប្ដូរទីតាំងក្រុមហ៊ុនេះ ហើយអាជ្ញាធរបានសន្យាឲ្យក្រុមហ៊ុនកែសម្រួលបំបាត់ក្លិនស្អុយរយៈពេល៦ខែ ប៉ុន្ដែការសន្យាគ្មានប្រសិទ្ធភាព ។ ពលរដ្ឋបានលើកឡើងថា ក្រុមហ៊ុនសំអាតក្រុងហ្គាអ៊ីយ៉ានេះ មិនត្រឹមតែទុកឲ្យជះក្លិនកាកសំណល់ដែលក្រុមហ៊ុនដឹកមកស្ដុកទុកបណ្ដោះអាសន្នមកលើអ្នកភូមិប៉ុណ្ណោះទេ ប៉ុន្ដែថែមទាំងមានសំឡេងគ្រឿងចក្ររំខានពួកគាត់ចាប់ពីព្រឹកដល់យប់ផងដែរ ។ ពួកគាត់ដាក់សំណូរថា ក្រុមអាជ្ញាធរពាក់ព័ន្ធ មកត្រូតពិនិត្យម្ដង បានបិតម៉ាស់ការពារសុខភាព ប៉ុន្ដែពលរដ្ឋដែលរស់នៅស្រូបយកក្លិនស្អុយរាល់ថ្ងៃនោះ តើពួកគាត់ប៉ះពាល់សុខភាពបែបណាខ្លះ? ពួកគេបញ្ជាក់ថា ពួកគាត់មិនហាមឃាត់ក្រុមហ៊ុនស្ដុកសំរាមបណ្ដោះអាសន្នទេ ប៉ុន្ដែសូមកុំឲ្យមានសំឡេងរំខាន និងជះក្លិនស្អុយមកលើពួកគាត់ ។
ទាក់ទងនឹងករណីនេះ លោក ស៊ូ ផ្លាតុង អភិបាលស្ដីទីក្រុងសៀមរាប បានមានប្រសាសន៍ថា ក្រុមហ៊ុនបានរៀបចំបំបាត់ក្លិនស្អុយខ្លះៗ ហើយអាជ្ញាធរទុកពេលឲ្យក្រុមហ៊ុនេះបន្ដ៣ខែ ដើម្បីរៀបចំបច្ចេកទេស បំបាត់ក្លិនការដឹកជញ្ជូន និងការរំខានសំឡេងដល់ពលរដ្ឋ ។ លោកបន្ដថា បើសិនក្រុមហ៊ុនមិនអនុវត្ដតាមការណែនាំនោះ អាជ្ញាធរនឹងចាត់វិធានការតាមផ្លូវច្បាប់ ។
យ៉ាងណាក៍ដោយ បើតាមការឲ្យដឹងពីពលរដ្ឋ ទីតាំងស្ដុកសំរាមបណ្ដោះអាសន្នរបស់ក្រុមហ៊ុនហ្គាអ៊ីយ៉ានេះ បានជះក្លិនស្អុយរលួយមកលើអ្នកភូមិ និងបំពុលបរិស្ថាន ចំកណ្ដាលក្រុងទេសចរណ៍អង្គរនេះ ជាច្រើនឆ្នាំមកហើយ ពោលតាំងពីអតីតអភិបាលខេត្ដ លោក ស៊ូ ភិរិន្ទ មកម្ល៉េះ ។ ប្រជាពលរដ្ឋបានដាក់ពាក្យប្ដឹងជាបន្ដបន្ទាប់ ដើម្បីទាមទារឲ្យក្រុមហ៊ុនប្ដូរទីតាំងថ្មី ប៉ុន្ដែអាជ្ញាធរមិនមានចំណាត់ការឡើយ ៕ដោយ ៖ ជា និរន្តរ៍|