ស្ដាប់ ឬ ទាញយកសំឡេង
រថយន្តទ្រុងថៃ ដឹកប្រជាពលរដ្ឋខ្មែរ ឆ្លងកាត់តាមច្រកទ្វារអន្តរជាតិប៉ោយប៉ែត យកមកប្រគល់ឲ្យអាជ្ញាធរកម្ពុជាវិញកាលពីថ្ងៃទី៧ មិថុនា ឆ្នាំ២០១៤។ Provided Photo
ក្នុងរយៈពេលចុងក្រោយនេះគេសង្កេតឃើញថា ពលរដ្ឋខ្មែរដែលអាជ្ញាធរថៃ ចាប់ក្នុងរថយន្តទ្រុងដឹកបញ្ជូនមកប្រគល់ឲ្យអាជ្ញាធរកម្ពុជា តាមច្រកទ្វារអន្តរជាតិប៉ោយប៉ែត មានចំនួនកើនឡើង។ កត្តាដែលនាំឲ្យមានការចាប់បញ្ជូនពលរដ្ឋខ្មែរបញ្ជូនមកវិញច្រើននេះ គឺដោយសារស្ថានភាពអាប់អួក្រោយពីមានរដ្ឋប្រហារដោយកងយោធាថៃ។ យោធាថៃ បានបង្កើនការប្រុងប្រយ័ត្នសន្តិសុខជាតិរបស់ខ្លួន។
ពលរដ្ឋកម្ពុជាដែលធ្វើចំណាកស្រុកទៅរកការងារធ្វើ និងអ្នកកំពុងធ្វើការងារនៅប្រទេសថៃ ជាច្រើនពាន់នាក់កំពុងប្រឈមទៅការចាប់ខ្លួនពីសំណាក់កងទាហានថៃ បន្ទាប់មកអ្នកទាំងនោះត្រូវអាជ្ញាធរថៃ ដឹកបញ្ជូនយកមកប្រគល់ឲ្យអាជ្ញាធរកម្ពុជាវិញ។
ការចាប់ខ្លួនជនចំណាកស្រុកកម្ពុជានេះ កើតមានឡើងជាបន្តបន្ទាប់ ក្រោយពីមានព្រឹត្តិការណ៍ទាហានធ្វើរដ្ឋប្រហារផ្ដួលរំលំរដ្ឋាភិបាលស៊ីវិល ក្ដោបក្ដាប់អំណាចរួចមក។ ប្រភពពីប្រជាពលរដ្ឋខ្មែរ កំពុងស្នាក់នៅក្នុងប្រទេសថៃ ថ្លែងថា កងទាហានថៃ បានដើរល្បាតនិងចាប់ខ្លួនប្រជាពលរដ្ឋជាច្រើននាក់ដាក់ក្នុងរថយន្តជារៀងរាល់ថ្ងៃ។
សកម្មភាពនេះបានធ្វើពលរដ្ឋកម្ពុជា ដែលជាអ្នកចំណាកស្រុកទៅការងារក្នុងប្រទេសថៃ នោះ មានការភ័យខ្លាច ហើយនាំគ្នាសម្ងំលាក់ខ្លួន៖ «ទាហានចុះមកចាប់ច្រើនណាស់ មិនដែលហ៊ានដើរផល ឥឡូវទាហានចុះឡើងពេញហ្នឹង អ្នកខ្លះគេចាប់បានអ៊ីចឹងទៅ អ្នកធ្វើការរើសត្រីរើសអីហ្នឹងម្សិលមិញគេទើបចាប់ដាក់ឡានឡើងមួយឡានខ្ញុំឃើញចាប់ខ្មែរ»។
រថយន្តទ្រុងថៃ ដឹកប្រជាពលរដ្ឋខ្មែរ ឆ្លងកាត់តាមច្រកទ្វារអន្តរជាតិប៉ោយប៉ែត យកមកប្រគល់ឲ្យអាជ្ញាធរកម្ពុជាវិញកាលពីថ្ងៃទី៧ មិថុនា ឆ្នាំ២០១៤។ Provided Photo
ពលរដ្ឋខ្មែរដែលត្រូវគេចាប់ខ្លួនទាំងនោះ ត្រូវបានអាជ្ញាធរថៃ ដឹកបញ្ជូនតាមរថយន្តទ្រុងមកប្រគល់ឲ្យអាជ្ញាធរកម្ពុជា តាមច្រកទ្វារអន្តរជាតិប៉ោយប៉ែត។ ប្រជាពលរដ្ឋរស់នៅក្រុងប៉ោយប៉ែត កត់សម្គាល់ថា កាលពីល្ងាចថ្ងៃទី៧ ខែមិថុនា មានរថយន្តថៃ ជាច្រើនគ្រឿងបានដឹកជញ្ជូនពលរដ្ឋខ្មែរ មកប្រគល់ឲ្យអាជ្ញាធរកម្ពុជាវិញ។
ពលរដ្ឋខ្មែរទាំងនោះត្រូវបានអាជ្ញាធរថៃ ចាប់ដាក់ក្នុងរថយន្ត ដែលមានទ្រុងដែនចាក់សោជាប់ពីខាងក្រៅ៖ «ច្រើនជាងមុនម្សិលមិញឃើញច្រើនពេលល្ងាចប្រហែលជា ៥ឡានក្នុងមួយឡានមានចំនួនជាង ៥០នាក់ទៅជាង ៧០នាក់ ពេលយើងសួរពួកគាត់អ្នកខ្លះឆ្លើយថា តម្រួតចាប់អ្នកខ្លះទៀតគាត់ថា គាត់ដើរមកគាត់អស់លិខិតឆ្លងដែនគាត់ដើរមកតាមផ្លូវដើម្បីមកផ្ទះអីហ្នឹង ឲ្យលុយគេទៀតបានគេដាក់យកមកអស់លុយប្រហែល ២ពាន់បាតបាន គេដឹកមកដល់កន្លែងយើងនេះ»។
កាលពីថ្ងៃទី២០ ខែឧសភា កន្លងទៅកងទាហានថៃ ជូនដំណឹងមកភាគីកម្ពុជា ពីការបិទច្រករបៀងនានានៅតាមខ្សែក្រវាត់ព្រំដែនជាប់ជាមួយប្រទេសកម្ពុជា។ ទន្ទឹមគ្នានេះ កងទាហានថៃ បានបង្កើនការឆែកឆេរទៅលើរថយន្ត និងត្រួតពិនិត្យលើឯកសាររបស់ពលរដ្ឋកម្ពុជា ដែលធ្វើដំណើរឆ្លងកាត់តាមច្រកទ្វារអន្តរជាតិ និងច្រកតំបន់នានា ចូលទៅក្នុងប្រទេសថៃ។
អភិបាលខេត្តបន្ទាយមានជ័យ លោក គោ ស៊ុំសារឿត មានប្រសាសន៍ថា កងទាហានថៃ ក្រោយពីបានបិទច្រករបៀងនានាជាមួយប្រទេសកម្ពុជា រួចមក ពួកគេស្នើឲ្យពលរដ្ឋកម្ពុជា ត្រូវមានឯកសារឆ្លងដែនត្រឹមត្រូវតាមច្បាប់នៅពេលមានបំណងឆ្លងដែនចូលទៅក្នុងប្រទេសថៃ។ យ៉ាងណាក៏ដោយ គេកត់សម្គាល់ឃើញថា រយៈពេលប៉ុន្មានថ្ងៃចុងក្រោយនេះ ចំនួនពលរដ្ឋកម្ពុជា ដែលអាជ្ញាធរថៃ ចាប់បញ្ជូនមកវិញមានចំនួនកើនឡើង។
លោកអភិបាលខេត្តកត់សម្គាល់ថា ក្នុងចំណោមពលរដ្ឋកម្ពុជា ដែលអាជ្ញាធរថៃ ចាប់បញ្ជូនមកវិញ មានអ្នកខ្លះភ័យខ្លាចពីស្ថានភាពវឹកវរនៅក្នុងប្រទេសថៃ ហើយពួកគេពុំមានឯកសារស្នាក់នៅស្របច្បាប់ ក៏ប្រគល់ខ្លួនឲ្យអាជ្ញាធរថៃ ចាប់ខ្លួនបញ្ជូនមកវិញតែម្ដង៖ «គេបានរំលឹកយើងច្រើនដងហើយ អ្នកដែលឆ្លង ឬទៅធ្វើការនៅថៃ ឲ្យទៅមានច្បាប់ មានឯកសារទៅធ្វើការ យើងក៏រំលឹកគាត់យើងអ៊ីចឹងដែរ។ កាលណាច្រករបៀបបិទហើយកាលណាឆ្លងចេញចូលតាមច្រកអន្តរជាតិ យើងពិនិត្យលើលិខិតឆ្លងដែនលើឯកសារអ្នកទៅធ្វើការ ហើយយើងបានជំរុញកែលំអគាត់ហើយ អ្នកទៅជាប់ណាត់ពេលអីទេ ហើយបើអ្នកធ្វើការ អ្នកម៉ៅការសំណង់ឲ្យគេ»។
រហូតមកដល់ពេលនេះ គេនៅពុំបានដឹងពីចំនួនពលរដ្ឋខ្មែរជាក់លាក់ដែលអាជ្ញាធរចាប់បញ្ជូនយកមកប្រគល់ឲ្យអាជ្ញាធរកម្ពុជា នោះទេ ប៉ុន្តែប្រធានមជ្ឈមណ្ឌលសំចតប៉ោយប៉ែត លោកស្រី ឈា ម៉ានិត បញ្ជាក់ថា បើប្រៀបធៀបចំនួនពលរដ្ឋខ្មែរ ដែលអាជ្ញាធរថៃ ចាប់បញ្ជូនមកតាមច្រកទ្វារអន្តរជាតិប៉ោយប៉ែត នៅឆ្នាំ២០១៤ នេះ មានការថយចុះជាងឆ្នាំ២០១៣៖ «ចាប់ពីប្រទេសថៃ គេមានបញ្ហានយោបាយមក មានចំនួនច្រើនយើងបិទព្រំដែនផ្សេងៗទៀត អ៊ីចឹងមកផ្លូវអន្តរជាតិច្រើន នៅក្នុងឧសភា និងដើមខែមិថុនានេះ យើងមានចំនួនវិលត្រឡប់មកច្រើនវិញច្រើនដោយសារថា ខាងថៃគេបិទរបៀងតូចតាចអីហ្នឹង អត់ឲ្យចេញមកតាមហ្នឹង គឺចេញមកតាមផ្លូវត្រង់និយាយរួមអ្នកអត់មានលិខិតឆ្លងដែនគាត់ភ័យខ្លាចគាត់ត្រឡប់មកវិញច្រើន»។
លោកស្រីបន្តថា កាលពីឆ្នាំ២០១៣ ប្រជាពលរដ្ឋខ្មែរដែលឆ្លងដែនទៅរកការងារធ្វើនៅក្នុងប្រទេសថៃ ភាគច្រើនបានវិលត្រឡប់មកទឹកដីកម្ពុជាវិញ តាមច្រករបៀងច្រើនហើយពួកគេរួចផុតពីការចាប់ខ្លួនពីសំណាកសមត្ថកិច្ចថៃ ប៉ុន្តែនៅឆ្នាំ២០១៤នេះ ប្រទេសថៃមានវិបត្តិនយោបាយធ្ងន់ធ្ងររហូតមានការបិទច្រករបៀងថែមទៀត ធ្វើពលរដ្ឋខ្មែរជាច្រើននាក់ ដែលជាអ្នកឆ្លងដែនមិនស្របច្បាប់ចូលទៅក្នុងប្រទេសថៃ នោះ ប្រឈមទៅការចាប់ខ្លួនជាបន្តបន្ទាប់ ហើយពួកគេត្រូវបានសមត្ថកិច្ចដឹកបញ្ជូនតាមរថយន្តកាត់ច្រកទ្វារអន្តរជាតិប៉ោយប៉ែត យកមកប្រគល់ឲ្យអាជ្ញាធរកម្ពុជា៕
