យុវជនសម្ព័ន្ធកូនខ្មែរអ្នកស្នេហាជាតិ ដែលជាម្ចាស់បណ្តឹងប្តឹងលោកនាយករដ្ឋមន្ត្រី ហ៊ុន សែន ករណីធ្វើឲ្យបាត់កោះមួយចំនួនទៅលើប្រទេសវៀតណាម នឹងទៅសាលាឧទ្ធរណ៍នៅថ្ងៃស្អែក ដើម្បីសួរនាំពីដំណើរការអនុវត្តបណ្តឹង បន្ទាប់ពីបានទទួលដំណឹងថាបណ្តឹងរបស់លោកបានបញ្ជូនទៅសាលាឧទ្ធរណ៍ហើយនោះ។
យុវជនមកពីសម្ព័ន្ធកូនខ្មែរអ្នកស្នេហាជាតិ លោក នាង សុឃុន ឲ្យដឹងថា នៅព្រឹកថ្ងៃចន្ទនេះ លោកបានទៅសាលាដំបូងរាជធានីភ្នំពេញដើម្បីសួរនាំពីពាក្យបណ្តឹងរបស់លោក ដែលបានប្តឹងលោកនាយករដ្ឋមន្ត្រី ហ៊ុន សែន ករណីធ្វើឲ្យបាត់កោះត្រល់ និងកោះក្រចកសេះ ប៉ុន្តែក្រឡាបញ្ជី បានប្រាប់លោកថា សំណុំរឿងនេះបានបញ្ជូនទៅសាលាឧទ្ធរណ៍យូរហើយ។
លោក នាង សុឃុន យុវជនមកពីសម្ព័ន្ធកូនខ្មែរអ្នកស្នេហាជាតិ (រូបថត៖ តាត ឧត្តម)
លោកនាង សុឃុន បន្តថា នៅថ្ងៃស្អែកម៉ោង៩ព្រឹក លោកនឹងទៅសាលាឧទ្ធរណ៍ដើម្បីសួរនាំ និងជំរុញឲ្យតុលាការពន្លឿននីតិវិធីបណ្តឹងរបស់លោកឲ្យបានឆាប់។ លោកព្រមានថា លោករួមនឹងបណ្តាយុវជនផ្សេងទៀតនឹងធ្វើបាតុកម្ម ប្រសិនជាតុលាការមិនមានចំណាត់ការណាមួយលើពាក្យបណ្តឹងរបស់លោកទេនោះ ព្រោះករណីនេះជារឿងរបស់ជាតិទាំងមូល។
កាលពីថ្ងៃទី៣ ខែកុម្ភៈ ឆ្នាំ២០១៤ យុវជនសម្ព័ន្ធកូនខ្មែរអ្នកស្នេហាជាតិរូបនេះ បានដាក់ពាក្យបណ្តឹងប្តឹងលោកនាយករដ្ឋមន្ត្រី ហ៊ុន សែន លើករណីធ្វើឲ្យបាត់កោះត្រល់ និងកោះក្រចកសេះ ទៅឲ្យប្រទេសវៀតណាម ប៉ុន្តែបណ្តឹងរបស់លោកត្រូវបានសាលាដំបូងរាជធានីភ្នំពេញ តម្កល់រឿងទុកឥតចាត់ការ ទើបលោកបន្តដាក់ពាក្យបណ្តឹងទៅសាលាឧទ្ធរណ៍ទៀត។
តែទោះជាយ៉ាងណា លោកនាយករដ្ឋមន្ត្រី ហ៊ុន សែន ធ្លាប់បានចូលបំភ្លឺក្នុងរដ្ឋសភាថា ការបាត់បង់កោះត្រល់ គឺបាត់តាំងពីឆ្នាំ១៩៣៩ មកម្ល៉េះ នៅពេលដែលកម្ពុជានៅក្រោមអាណានិគមបារាំង ហើយត្រូវបានលោក Previe(ប្រេវីយេ) ជនជាតិបារាំងជាអ្នកគ្រប់គ្រងនៅតំបន់ឥណ្ឌូចិន បានកាត់កោះនោះឲ្យវៀតណាម៕ ប្រភពពត៌មាន ៖ VOD
