ក្រុងប៉ោយប៉ែត៖ ផ្ទះមួយខ្នង ត្រូវបានព្រះអគ្គីលេបត្របាក់អស់ទាំងស្រុង ដោយសារកូនប្រុស ដែលជាមនុស្សញៀនថ្នាំម្នាក់ បានដុតព្រោះតែខឹងឪពុកម្តាយមិនឲ្យទៅលេងភ្នំពេញជាមួយ ។ អគ្គិភ័យនេះកើតឡើងនៅវេលាម៉ោង៩ និង៥០នាទី ព្រឹកថ្ងៃទី១ មិថុនា ២០១៤ ស្ថិតក្នុងភូមិនិមិត្ត៤ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។
ប្រភពព័ត៌មាននៅកន្លែងកើតហេតុបានឲ្យដឹងថា កូនប្រុសកំហូចនោះឈ្មោះ មុំ វាសនា អាយុ៣៤ឆ្នាំ រស់នៅភូមិ-សង្កាត់ កើតហេតុខាងលើ បានខឹងម្តាយឪពុក មិនឲ្យគេទៅភ្នំពេញជាមួយ ធ្វើឲ្យរូបគេខឹង ក៏យកភ្លើងដុតផ្ទះខ្លួនឯង ដែលមានទំហំ៧ គុណ៨ម៉ែត្រ ប្រក់ស័ង្កសីឆេះម៉ត់តតែម្តង ។
លោក ម៉ា រិន មេប៉ុស្តិ៍រដ្ឋាបាលនិមិត្តបានប្រាប់ឲ្យដឹងថា ក្រោយពីបានទទួលព័ត៌មានពីប្រជាពលរដ្ឋថា មានករណីភ្លើងឆេះផ្ទះ លោកក៏បញ្ជាកម្លាំងភ្លាម ដើម្បីទៅពន្លត់ភ្លើង ដោយសារផ្ទះកើតហេតុ មានសភាពផ្លូវចង្អៀត ពិបាកឲ្យរថយន្តចូលទៅ បានត្រឹមតែប្រជាពលរដ្ឋ និងសមត្ថកិច្ច ជួយយកទឹកជះពន្លត់ តែដោយភ្លើងឆះខ្លាំងឡើងៗ ក៏មិនអាចជួយសង្គ្រោះបានទេ បណ្ដាលឲ្យព្រះអគ្គី លេបត្របាក់យកផ្ទះមួយខ្នងខាងលើ ឆេះខ្ទេចទាំងស្រុង ។
ប្រភពដដែលបន្ដថា ក្រោយពីដុតផ្ទះហើយ ជនសង្ស័យបានកាន់កាំបិតព្យាយាមគេចខ្លួន តែត្រូវសមត្ថកិច្ចព័ទ្ធចាប់ផងដែរ ។
គួរបញ្ជាក់ថា ករណីខាងលើនេះ សមត្ថកិច្ចមិនទាន់ដឹងថា ទំហំនៃខូចខាតទ្រព្យសម្បតិ្ត គិតជាទឹកប្រាក់ប៉ុន្មាននៅឡើយទេ ហើយក៏ជាតែសំណាងល្អដែរ ដោយពុំមាននរណាម្នាក់ រងរបួសអ្វីនោះឡើយ ៕
