|ថ្ងៃទី 29 ឧសភា 2014 ម៉ោង 10:58:35
ខេត្តកណ្តាល ៖ បុរសចំណាស់ម្នាក់បន្ទាប់ពីផឹកស្រាស្រវឹង បានចុះងូតទឹកស្រះក្នុងវត្តរំចេក ស្ថិតក្នុងភូមិត្រពាំងអណ្តូង ឃុំសំរោងលើ ស្រុកអង្គស្នួល កាលពីវេលាម៉ោងប្រមាណ១៨និង៣០នាទី ថ្ងៃទី២៧ ខែឧសភា ឆ្នាំ២០១៤ បណ្តាលឲ្យលង់ទឹកស្លាប់យ៉ាងអាណោចអាធ័ម ដោយពុំមាននរណាម្នាក់បានដឹងនោះទេ រហូតដល់វេលាម៉ោងប្រមាណ១០និង៤០នាទីព្រឹកថ្ងៃទី២៨ ខែឧសភា ឆ្នាំ២០១៤ ទើបកូនប្រុសរបស់ជនរងគ្រោះរកសាកសពឃើញក្នុងស្រះ ។
មន្ត្រីនគរបាលស្រុកអង្គស្នួល បានឲ្យដឹងថា ជនរងគ្រោះមានឈ្មោះ អេង អឿន ភេទប្រុស អាយុ៦០ឆ្នាំ មុខរបរកសិករ មានទីលំនៅក្នុងភូមិត្រពាំងអណ្តូង ឃុំសំរោងលើ ស្រុកអង្គស្នួល ខេត្តកណ្តាល ។
ប្រភពដដែលបានបន្តថា នៅមុនពេលកើតហេតុថ្ងៃទី២៧ ខែឧសភា ឆ្នាំ២០១៤ វេលាម៉ោងប្រមាណ៤ទៅ៥ល្ងាច ជនរងគ្រោះបានអង្គុយផឹកស្រានៅក្នុងភូមិអស់ជាច្រើនលីត្រ រហូតស្រវឹងជោកជាំ ។ បន្ទាប់មក ជនរងគ្រោះបានដើរចេញពីកន្លែងផឹកស្រាមកងូតទឹកនៅក្នុងស្រះវត្តរំចេក ក៏បណ្តាលឲ្យលង់ទឹកស្លាប់តែម្តង ខណៈដែលពុំមាននរណាម្នាក់ដឹង និងជួយសង្គ្រោះបានទាន់ពេលវេលា ។
ក្រោយពីបាត់ជនរងគ្រោះមិនឃើញត្រឡប់ទៅផ្ទះវិញ កូនៗរបស់ជនរងគ្រោះបាននាំគ្នាស្វែងរកជនរងគ្រោះដែរ តែរកមិនឃើញរហូតដល់ព្រឹកថ្ងៃទី២៨ ខែឧសភា ឆ្នាំ២០១៤ពេលតាមរកដល់ចំណុចមាត់ស្រះក្នុងវត្តរំចេក ក៏បានប្រទះឃើញសម្លៀកបំពាក់ឪពុក នៅលើមាត់ស្រះទឹក ហើយដោយមានការសង្ស័យកូនៗ បាននាំគ្នាមុជទឹករាវក្នុងស្រះ ស្រាប់តែប្រទះឃើញសាកសពជនរងគ្រោះនៅបាតស្រះ រួចនាំគ្នាស្រង់មកលើគោក ដើម្បីយកទៅធ្វើបុណ្យតាមប្រពៃណី ៕ដោយ ៖ ស្អាងជ័យ