កណ្តាល៖ ព្រះរាជពិធីច្រត់ព្រះនង្គ័លនៅឆ្នាំនេះ បានប្រារព្ធធ្វើឡើងនៅទីលានបាល់ទាត់ក្រុងតាខ្មៅ ទីរួមខេត្តកណ្តាល កាលពីព្រឹកថ្ងៃទី១៧ ឧសភា ក្រោមព្រះរាជធិបតីភាព ព្រះមហាក្សត្រ ព្រះបាទសម្តេច ព្រះបរមនាថ នរោត្តម សីហមុនី រួមទាំងជាមួយមន្ត្រីជាន់ខ្ពស់របស់ព្រឹទ្ធសភា រដ្ឋសភា និងរាជរដ្ឋាភិបាល ព្រមទាំងបណ្តាអង្គទូត ជាច្រើនទៀត ។
ក្នុងពិធីផ្សងប្រផ្នូលតាមរយៈគោឧសភរាជ នៅក្នុងព្រះរាជពិធីច្រត់ព្រះនង្គ័លនាព្រឹកថ្ងៃទី១៧ ខែឧសភា ឆ្នាំ២០១៤ នៅឆ្នាំនេះ ក្រោយពីក្រុមអ្នករៀបចំពិធីបានដឹកគោឧសភរាជ ( គោបារបស់ព្រះមហាក្សត្រ ) ចំនួន ២ ក្បាល ដើម្បីឲ្យបរិភោគវត្ថុ ៧ យ៉ាង រួមមាន៖ ស្រូវ ពោត សណ្តែក ល្ង ស្មៅ ទឹក និងស្រា រូចមក បានបង្ហាញថា ពោត សណ្តែក និងស្រូវ នឹងទទួលបានទិន្នផលបង្គួរ។ គួររំលឹកថា ព្រះរាជពិធីច្រត់ព្រះនង្គ័ល ត្រូវបានព្រះមហាក្សត្រ ដឹកនាំប្រារព្ធជារៀងរាល់ឆ្នាំ នាថ្ងៃ៤ រោច ខែពិសាខ ។
ព្រះរាជពិធីនេះ ជាពិធីមង្គលមួយ ដែលគេចាត់ទុកថា ជាការចាប់ផ្តើមប្រសិទ្ធពរ ឲ្យដល់ប្រជាកសិករ ក្នុងការចាប់ផ្តើមធ្វើស្រែចម្ការ នៅរដូវវស្សា ឲ្យទទួលបានទិន្នផលខ្ពស់ ។
ក្រោយពីស្តេចមាឃ និងព្រះមេហួរ ដឹកនាំភ្ជួររាស់ និងសាបព្រោះស្រូវ ពោត សណ្តែក ល្ង ជានិមិត្តរូប ចំនួន ៣ ជុំ នៅវាលព្រះស្រែ គឺក្រុមអ្នករៀបចំពិធី ត្រូវដឹកគោឧសភរាជ ( គោបារបស់ព្រះមហាក្សត្រ ) ចំនួន ២ ក្បាល ដើម្បីឲ្យបរិភោគវត្ថុ ៧ យ៉ាង រួមមាន៖ ស្រូវ ពោត សណ្តែក ល្ង ស្មៅ ទឹក និងស្រា ៕
