ព្រះសង្ឃ និងនិស្សិត ប្រកាសធ្វើបាតុកម្មអហិង្សាប្រឆាំងនឹងការវាយកម្ទេចក្លោងទ្វារពុទ្ធសាសនបណ្ឌិតនៅថ្ងៃទី២៩ ខែឧសភានេះដើម្បីទាមទារឲ្យរដ្ឋាភិបាលបញ្ឈប់ការលក់ទ្រព្យសម្បត្តិរដ្ឋទៅឲ្យក្រុមហ៊ុនឯកជន។
នៅមុខក្លោងទ្វារពុទ្ធសាសនបណ្ឌិត្យ ដែលកំពុងត្រូវបានវាយកម្ទេច នៅព្រឹកថ្ងៃអង្គារនេះ ប្រធានបណ្តាញព្រះសង្ឃឯករាជ្យ ដើម្បីយុត្តិធម៌សង្គម ព្រះតេជគុណ ប៊ុត ប៊ុនទិញ មានសង្ឃដីកាថា បើរដ្ឋាភិបាលនៅតែធ្វើបែបនេះ អគាររបស់រដ្ឋផ្សេងៗទៀតនឹងបាត់បង់ជាបន្តបន្ទាប់។ ព្រះអង្គបន្តថា នឹងដឹកនាំសិស្ស និស្សិត និងពុទ្ធសាសនិក ធ្វើបាតុកម្មដើម្បីទាមទារឲ្យរដ្ឋាភិបាលបញ្ឈប់សកម្មភាពនេះ «អាត្មាមកឃ្លាំមើល ថាគេនៅតែបន្តឬក៏គេឈប់ ប៉ុន្តែឥឡូវនេះឃើញសកម្មភាពគេនៅតែបន្ត អ៊ីចឹងយុទ្ធសាស្រ្តរបស់ព្រះសង្ឃ ទូទាំងប្រទេសអាត្មានឹងខិតខំប្រឹងធ្វើ គឺធ្វើយ៉ាងណា តស៊ូ និងធ្វើបាតុកម្ម នៅថ្ងៃ២៩ ខែឧសភានេះ។»
និស្សិតឆ្នាំទី៤នៅសាកលវិទ្យាល័យមួយក្នុងរាជធានី លោក រីន រ៉េន មានប្រសាសន៍ថា ពុទ្ធសាសនបណ្ឌិត្យជាបណ្ណាល័យ រក្សាឯកសារដ៏ច្រើនសម្រាប់សិស្ស និស្សិតសិក្សាស្រាវជ្រាវ ប៉ុន្តែរហូតមកដល់ពេលនេះត្រូវបានសមត្ថកិច្ចបិទមិនឲ្យចូលនោះទេ ដោយអះអាងថា ក្លោងទ្វាររបងកំពុងតែជួសជុល។
លោកយល់ថា ទៅថ្ងៃអនាគតអាចនឹងបាត់បង់ពុទ្ធសាសនបណ្ឌិត្យទាំងមូលតែម្តង ខណៈការជួសជុលក្លោងទ្វារនេះហាក់ដូចជាចម្លែកខុសពីធម្មតា ព្រោះមានសមត្ថកិច្ចច្រើនយាមការពារយ៉ាងតឹងតែង «ពេលដែលគេបិទទៅ ធ្វើឲ្យមានផលវិបាក ខ្ញុំទៅរកកន្លែងផ្សេងៗ ពិបាកក្នុងការស្រាវជ្រាវឯកសារ ពិសេសទាក់ទងនឹងពុទ្ធសាសនា និងប្រពៃណី ព្រោះខ្ញុំចូលចិត្តអានព្រះពុទ្ធសាសនា និងប្រពៃណី ចូលចិត្តយល់ដឹង អ៊ីចឹងពិបាកក្នុងការស្វែងរកសំណៅឯកសារទាំងអស់នោះ។»
VOD មិនអាចសុំការអត្ថាធិប្បាយពីរដ្ឋមន្ត្រីក្រសួង ធម្មការនិងសាសនា លោក មិន ឃិន បានទេនៅថ្ងៃអង្គារនេះ។ តែតាមព័ត៌មានក្នុងស្រុកឲ្យដឹងថា កាលពីថ្ងទី៧ខែឧសភា លោក មិន ឃិន បានចេញលិខិតមួយអនុញ្ញាតឲ្យរុះរើក្លោងទ្វារ និងរបងពុទ្ធសាសនបណ្ឌិត្យ ដើម្បីសម្រួលដល់ការសាងសង់ផ្លូវក្រោមដីរបស់ក្រុមហ៊ុនណាហ្គាវើល ចៀសវាងការបាក់រលំជាយថាហេតុ។
ប្រធានមជ្ឈមណ្ឌលជាតិ និងសីលធម៌សង្គម លោក ប៉ូ សំណាង បង្ហាញការសោកស្តាយចំពោះការវាយក្លោងទ្វារពុទ្ធសាសនបណ្ឌិត្យ ដើម្បីឲ្យក្រុមហ៊ុនណាហ្គាវើលធ្វើផ្លូវក្រោមដីនេះ។ លោកថា បើរដ្ឋាភិការអភិវឌ្ឍបែបនេះ មិនរីកចម្រើននោះទេ «អភិវឌ្ឍន៍ វាដើរទន្ទឹមនឹងអភិរក្ស ហើយប្រសិនណាយើងធ្វើអ៊ីចឹងបាន ថ្ងៃណាមួយគេកម្ទេចអ្វីៗសព្វបែបយ៉ាងគ្មានអ្វីសល់ទុក ដែលយើងខំប្រឹងប្រែងទាំងអស់គ្នាទេ យើងខំប្រឹងប្រែងជួយជាតិយើង ទីបំផុតយើងអត់មានអ្វីសម្រាប់អួតកូនចៅ ចៅទួតហើយជំនាន់ក្រោយថាប៉ាធ្លាប់ធ្វើអ៊ីចឹងៗ។ អត់មានផង វាទៅជាឈ្មោះអ្នកផ្សេង ដល់ពេលម្នាក់មួយមកទៀត កម្ទេចអាហ្នឹងចេញ ទៅធ្វើអានោះទៀត ទៅឈ្មោះអ្នកនេះ គឺវាអត់ច្បាស់លាស់ យើងធ្វើអ៊ីចឹងបាន ហើយឥឡូវហ្នឹងយើងកសាងបាន ហើយក្មេងស្រករក្រោយដឹងនាំរដ្ឋាភិបាល លោកនឹងធ្វើអ៊ីចឹងដែរ អត់មានអ្វីសល់ទេ អ្វីដែលអភិវឌ្ឍន៍ នៅម្តុំតូចអត់មានទៅមុខរួច។»
អគារពុទ្ធសាសនបណ្ឌិត្យ ត្រូវបានសម្ពោធដាក់ឲ្យប្រើ កាលពីថ្ងៃទី១ ខែមិថុនា ឆ្នាំ១៩៩៨ គឺមុនពេលមានការសង់កាស៊ីណូណាហ្គា។ ពុទ្ធសាសនបណ្ឌិត្យនេះ សាងសងឡើង ដើម្បីកម្កល់ទុកសៀវភៅធម៌ និងសៀវភៅផ្សេងៗទៀត សម្រាប់ព្រះសង្ឃ និងសិស្ស សិក្សាជ្រាវជ្រាវជាដើម៕ ប្រភពពត៌មាន ៖
