ខេត្តតាកែវ: សង្ឃមួយអង្គដែលគង់នៅវត្តសីហរតនារាម នៅភូមិឡូរី សង្កាត់រកាក្នុង ក្រុងដូនកែវ ខេត្តតាកែវ ត្រូវបានមន្ទីរធម្មការ និងសាសនាខេត្តចាប់ផ្សឹក ហើយប្រគល់ឱ្យនគរបាលនៃស្នងការដ្ឋានខេត្ត កសាងសណុំរឿងបញ្ជូនទៅតុលាការ កាលពីថ្ងៃទី ២៨ មេសា ២០១៤ ដោយបុគ្គលនោះពាក់ព័ន្ធនឹងការជួញដូរគ្រឿងញៀន កាលពីថ្ងៃទី ២៥ មេសា។
លោក សួន ផុន ស្នងការរងទទួលបន្ទុកការិយាល័យព្រហ្មទណ្ឌបានឱ្យដឹងថា អន្ទិតជាប់ចោទឈ្មោះ ជា ប៉ាវ អាយុ១៩ឆ្នាំ ស្រុកកំណើតនៅភូមិ ចង្កោន ឃុំព្រែកត្នោត ស្រុកកំពត ខេត្តកំពត ។ មុនពេលឃាត់ខ្លួនគឺជាព្រះសង្ឃ គង់នៅវត្តសីហរតនារាម ស្ថិតនៅភូមិ-សង្កាត់ខាងលើ ។ ថ្នាំញៀនដែលរកឃើញនៅខ្លួនព្រះសង្ឃនោះជាថ្នាំញៀនប្រភេទម៉ាទឹកកក ចំនួន ១៤ថង់ផ្លាសស្ទិក មានទម្ងន់ ១៤២,៦ក្រាម ។
ក្នុងករណីខាងលើនេះ ជនសង្ស័យមិនឆ្លើយសាភាពទេ ហើយបានបដិសេធថា ថ្នាំញៀនទាំងអស់ គឺជនមិនស្គាល់មុខ បានយកមកទុកឱ្យ ហើយបានខ្ចីលុយពីរូបគេចំនួន ៤០០ដុល្លារ រួចគេចខ្លួនបាត់ទៅ។ ទោះបីយ៉ាងណាក៏ដោយផ្អែកតាម ការស្រាវជ្រាវ និងវត្ថុតាង ដែលមានស្រាប់ទុកឱ្យតុលាការជាអ្នកសម្រេច៕ ប្រភពពត៌មាន ៖ CEN
