មន្ត្រីអង្គការសង្គមស៊ីវិល ១៧ស្ថាប័ន ត្រូវបានសាលារាជធានីភ្នំពេញ កោះអញ្ជើញឲ្យចូលរួមប្រជុំពិភាក្សាស្ដីពីការរៀបចំវេទិកាសាធារណៈ ដើម្បីរួមគ្នាដោះស្រាយបញ្ហាទាមទារជម្រកស្នាក់នៅរបស់ពលរដ្ឋដែល សេសសល់ក្នុងសហគមន៍បុរីកីឡា។
ក្នុងលិខិតអញ្ជើញចំនួន ១៧ផ្សេងគ្នា ផ្ញើទៅអង្គការសង្គមស៊ីវិលដែលវិទ្យុអាស៊ីសេរី ទទួលបាននៅថ្ងៃទី២៨ មេសា បានឲ្យដឹងថា សាលារាជធានីភ្នំពេញ បានអញ្ជើញខាងប្រធានមជ្ឈមណ្ឌលអប់រំច្បាប់សម្រាប់សហគមន៍ (CLEC) ប្រធានអង្គការអាដហុក អង្គការលីកាដូ ខាងអង្គការសមាគមធាងត្នោត មជ្ឈមណ្ឌលសិទ្ធិមនុស្សកម្ពុជា និងប្រធានការិយាល័យឧត្ដមស្នងការអង្គការសហប្រជាជាតិទទួលបន្ទុក សិទ្ធិមនុស្សប្រចាំកម្ពុជា និងអង្គការសំខាន់មួយចំនួនចំនួនទៀត ឲ្យចូលរួមកិច្ចប្រជុំនោះ នៅវេលាម៉ោង ៣រសៀល ថ្ងៃពុធ ទី២៩ មេសា នៅសាលារាជធានីភ្នំពេញ ជាមួយអភិបាលរាជធានីភ្នំពេញ លោក ប៉ា សុជាតិវង្ស និងមន្ត្រីពាក់ព័ន្ធមួយចំនួនទៀត។
តំណាងសហគមន៍បុរីកីឡា លោកស្រី ឆាយ គឹមហ៊ន ឲ្យដឹងថា ខាងសាលារាជធានីភ្នំពេញ មិនបានយកលិខិតអញ្ជើញទាំងនោះទៅចែកជូនផ្ទាល់ដល់អង្គការទាំង ១៧នោះទេ។ ប៉ុន្តែបានហៅលោកស្រីឲ្យជួប និងបានឲ្យយកលិខិតអញ្ជើញនោះទៅចែកដល់អង្គការទាំងអស់។
លោកស្រីបន្តថា ការប្រជុំពិភាក្សាស្ដីពីការរៀបចំវេទិកាសាធារណៈនេះ ធ្វើឡើងតបតាមការស្នើសុំរបស់ក្រុមសហគមន៍ដែលចង់ឲ្យខាងសាលា រាជធានីភ្នំពេញ រៀបចំវេទិកានេះ ដោយមានការពិគ្រោះយោបល់ជាមួយមន្ត្រីអង្គការ ដើម្បីឈានទៅរកដំណោះស្រាយផ្តល់ជម្រកឲ្យពលរដ្ឋបុរីកីឡា ដែលនៅសេសសល់។
លោកស្រី ឆាយ គឹមហ៊ន៖ «ការបើកវេទិកាសាធារណៈនេះ បើសិនជាការដោះស្រាយនៅតែធ្វើជម្រកបណ្ដោះអាសន្នដដែល ឬឲ្យពួកខ្ញុំទៅនៅទួលសំបូរ ឬភ្នំបាត គឺបញ្ជាក់ថា ពួកខ្ញុំអត់ទទួលទេ អ្វីដែលពួកខ្ញុំត្រូវការ បើកវេទិកាសាធារណៈក្នុងពេល ២សប្ដាហ៍ទៀតក៏ដោយ គឺសុំធ្វើអាគារទី៩ ទី១០ ឲ្យពួកខ្ញុំមក ព្រោះនេះនៅក្នុងកិច្ចសន្យា។ ក្នុងកិច្ចសន្យាសង់ ១០អាគារ នៅតែលោកស្រី ស៊ុយ សុផាន ក្រឡាស់នៅធ្វើ ៨អាគារបាន ចុះទម្រាំតែលោក ប៉ា សុជាតិវង្ស ទៅនិយាយតែមាត់ តើឲ្យពួកខ្ញុំជឿម៉េចបាន? សូមឲ្យវេទិកានេះឲ្យជាតិនិងអន្តរជាតិបានដឹងឮ បើសិនជាគាត់ហ៊ានក្រឡាស់សំដីខ្លួនឯងទៀត គាត់គួរតែខ្មាសខ្លួនឯងទៅ»។
សព្វថ្ងៃមានប្រជាពលរដ្ឋរស់នៅបុរីកីឡា ១៥៦គ្រួសារ ដែលនៅមិនទាន់ទទួលសំណង បន្តក្រាញរស់នៅលើគំនរសំរាម ក្រោមកៅស៊ូតង់ក្ដៅ និងក្រោមជណ្ដើរអគារនៅបុរីកីឡា ដើម្បីទាមទារឲ្យក្រុមហ៊ុនផានអ៊ីម៉ិច សង់អាគារស្នាក់នៅ ២បន្ថែមទៀតតាមកិច្ចសន្យា៕ ប្រភពពត៌មាន ៖ RFA
