Wednesday, April 30, 2014
សកម្មភាពដឹកជញ្ជូនឈើ ធ្វើអាជីវកម្មចេញពីតំបន់អភិរក្សសត្វព្រៃភ្នំឱរ៉ាល់ សមត្ថកិច្ច សប្បាយទទួលលុយ
ពោធិសាត់៖ សេចក្តីរាយការណ៍ពីប្រជាពលរដ្ឋនៅ ខេត្តពោធិសាត់ បានអោយដឹងថា សព្វថ្ងៃឈ្មួញធ្វើសកម្មភាពកាប់ឈើដឹកធ្វើអាជីវកម្មជារៀងរាល់ថ្ងៃនៅក្នុងស្រុកក្រវ៉ាញនិងស្រុកវាលវែងខេត្តពោធិសាត់ សមត្ថកិច្ចមួយចំនួនពាក់ព័ន្ធ និងបញ្ហានេះហើយការបង្ក្រាបហាក់បីដូចជាគ្មានឆន្ទៈក្នុងការបង្ក្រាប ។ ឈើប្រណិតបច្ចុប្បន្នត្រូវបានគេចរាចរណ៍ ដឹកចេញពីភូមិសាស្ត្រខាងលើ តាមរថយន្តស៊េរីទំនើបៗចូលទៅលក់នៅទីក្រុងភ្នំពេញ ឬ ខេត្តកំពង់ចាមឆ្លងដែនទៅប្រទេសវៀតណាម ។ សេចក្តីរាយការណ៍បានបន្តអោយដឹងថា ឈ្មួញបានកាប់ឈើប្រភេទធ្នង់ នាងនួន និងគ្រញូងជាដើម ដឹកចេញពីជួរភ្នំក្រវ៉ាញតាមរយៈគោយន្តកន្ត្រៃ រទេះគោ-ក្របី និងរ៉ឺម៉កម៉ូតូ និងម៉ូតូ ចល័តរូបភាពជាកណ្តៀរយកមកស្តុបទុកនៅក្នុងផ្ទះប្រជាពលរដ្ឋក្នុងស្រុកក្រវ៉ាញ និងទឹកដីតំបន់បំណក់ ឃុំឈើតុំ ខេត្តពោធិសាត់ រួចពួកគេយករថយន្តដឹកជញ្ជូនចេញទៅលក់តែម្តង។
ឈ្មួញឈើខាងលើត្រូវបានគេស្គាល់ឈ្មោះ ឌឿម ជាមន្ត្រីប៉ូលីស , ឈ្មោះ វីរៈ , ឈ្មោះ ផាន្នី ជាមន្ត្រីយោធា, ឈ្មោះ ទូច ជាមន្ត្រីយោធា, ឈ្មោះ និត , ឈ្មោះ សល់ , ឈ្មោះ ជ្រុយ , ឈ្មោះវន , ឈ្មោះ ធី ដោយឡែកបទល្មើសឈើប្រណិតក្នុងស្រុកក្រគរ មានឈ្មោះ ហេង, ភណ្ឌ, ឈ្មោះ ពៅ , តាយុយ , យូរា, គ្រូធី ហៅសេកមាស, ញ៉ាំងនិងឈ្មោះ ពៅ ។ ឯថៅកែល្បីឈ្មោះ នៅស្រុកបាកាន មានឈ្មោះ ចែផល្លី ឈ្មោះ ស្រី និង ឈ្មោះ ស៊ុយ អាន ជាមន្ត្រីប៉េអឹមស្រុកបាកាន ក៍មានសកម្មភាពមិនចាញ់ថៅកែនៅស្រុកភ្នំក្រវ៉ាញដែរ ។
ប្រភពពត៌មានដោយឡែកមួយទៀតបន្តអោយដឹងថា ឈ្មោះ ស្រៀវ ជាមន្ត្រីបរិស្ថានប្រចាំនៅតំបន់ភ្នំយ៉ោកបាននឹងកំពុងតែប្រមូលលុយពីឈ្មួញឈើយ៉ាងសប្បាយដែលឈើទាំងនោះក្រុមឈ្មួញបានដឹកចេញ ពីចំណុចតំបន់ខាងលើ សសរស្តំ កាត់តាមទឹកដីរាំងខ្វាវ អូរអំពុះ និងទឹកដីយ៉ោក ឆ្ពោះចេញមកទឹកដីខេត្តកំពង់ឆ្នាំង និង ទឹកដីបំណក់ខេត្តពោធិសាត់ ហើយប្រភពបានបញ្ជាក់អោយដឹងផងដែរថា មន្ត្រីបរិស្ថានរូបនេះក្រៅពីប្រមូលលុយពីក្រុមឈ្មួញ ក៍ជាអ្នកប្រមូលទិញឈើប្រណិតលក់បន្តអោយឈ្មួញផងដែរ។
ពាក់ព័ន្ធពត៌មានខាងលើនេះ ប្រជាពលរដ្ឋសូមសំណូមពរទៅដល់ ឯកឧត្តម ឆេង គឹមស្រ៊ុន ប្រតិភូមរាជរដ្ឋាភិបាល ទទួលបន្ទុករដ្ឋបាលព្រៃឈើចាត់វិធានការណ៍ទប់ស្កាត់ផង ។ ឯកឧត្តម រដ្ឋមន្ត្រីក្រសួងបរិស្ថាន គួរមានវិធានការណ៍យ៉ាងណាចំពោះមន្ត្រីក្រោមឱវាទដែលពាក់ព័ន្ធក្នុងសកម្មភាពបទល្មើសព្រៃឈើខាងលើនេះ ? ៕
