| Friday, 21 June 2013 00:59 | |
| បុរសជនជាតិអ៊ុយក្រេននិងរុស្សី ៣នាក់ ត្រូវសមត្ថកិច្ចនគរបាលខេត្តព្រះសីហនុ ឃាត់ខ្លួនដោយជាប់ពាក់ពន្ធ័ក្នុងបទល្មើស បង្ឃាំងមនុស្សខុសច្បាប់ធ្វើទារុណកម្មនិងកាត់មេដៃជនជាតិខ្មែរ ដោយសារតែជនរងគ្រោះមានបំណងចូលលួចសំភារៈក្នុងផ្ទះ នៅពេលយប់។
លោកវរសេនីយ៍ទោ ម៉ែន មុន្នី នាយការិយាល័យនគរបាលព្រហ្មទណ្ឌកំរិតស្រាល បានអោយដឹងថា រឿងហេតុកើតឡើងតាំងពីម៉ោង ២៣និង៣០នាទី ថ្ងៃទី១៧ ខែមិថុនា ឆ្នាំ២០១៣ មកម្លេះ រហូតដល់ម៉ោង ២០និង០០នាទី ថ្ងៃទី១៨ ខែមិថុនា ទើបសមត្ថកិច្ចទៅធ្វើអន្តរាគមន៍រំដោះយកជនរងគ្រោះ ចេញពីក្នុងបរិវេណផ្ទះជនល្មើសបាន ។
លោក ម៉ែន មុន្នី បានបន្តថា ដំបូងឡើយនៅម៉ោង ២៣និង៣០នាទី ថ្ងៃទី១៧ ខែមិថុនា ឈ្មោះ មុំ រិ ទ្ធ ភេទប្រុស អាយុ២៧ឆ្នាំ ជនជាតិខ្មែរ ស្នាក់នៅបណ្តោះអាសន្នភូមិ៣ សង្កាត់លេខ៣ ក្រុងព្រះសីហនុ ពុំមានមុខរបរពិតប្រាកដ បានចូលក្នុងផ្ទះជនជាតិអ៊ុយក្រេន ឈ្មោះ SUNDAROV VADYM ភេទប្រុស អាយុ៣៣ឆ្នាំ នៅក្រុមទី៤០ ភូមិ៣ សង្កាត់៣ ក្រុងព្រះសីហនុ ដែលមានទីតាំងខាងក្រោយផ្ទះពស់ ដោយមានបំណងចូលលួចសំភារៈ ភ្លាមៗនោះគ្នីគ្នារបស់ម្ចាស់ផ្ទះបានឃើញ ហើយចាប់ឈ្មោះ មុំ រិទ្ធ បានដោយយកខ្សែចងដៃទៅក្រោយ យកច្រវ៉ាក់ទាក់ក យកបំពង់ទីបជ័រដាក់អោយខាំចងជាប់មាត់ (ដូចបង្ហៀសេះ) ហើយវាយតប់ធ្វើទារុណកម្ម ដោយមិនបានប្តឹងរាយការណ៍មកសមត្ថកិច្ចឡើយ ។ លុះដល់ម៉ោង១ឈាន ចូល ថ្ងៃទី១៨ ឈ្មោះ SUNDAROV VADYM បានយកកន្ត្រៃដែកមកកាត់មេដៃស្តាំ របស់ជនរងគ្រោះបោះចោល ហើយចងជនរងគ្រោះទុកចោលនៅគៀនផ្ទះ ត្រូវភ្លៀង ត្រូវសន្សើម រហូតដល់ព្រលប់ថ្ងៃទី១៨ ដោយសារឮសំលេងស្រែកយំ ប្រជាពលរដ្ឋដែលនៅក្បែរនោះ អើតមើលឃើញ ហើយប្តឹងរាយការណ៍មកសមត្ថកិច្ចនគរបាល ។
លោក ម៉ែន មុន្នី បានបញ្ជាក់ទៀតថា ពេលចូលឆែកឆេរផ្ទះជនល្មើសទាំងយប់នោះ ដោយមានព្រះរាជអាជ្ញាចូលរួមផងដែរ ដោយឃើញអំពើឃោឃៅ អមនុស្សធម៌យ៉ាងនេះ លោកស្នងការក៍បានបញ្ជាអោយនាំខ្លួនជនជាតិអ៊ុយក្រេននិងរុស្ស៊ី ទាំងបីនាក់ មកឃាត់ខ្លួន ដើម្បីចាត់ការតាមនីតិវិធី រីឯជនរងគ្រោះបាននាំយកទៅព្យាបាលនៅមន្ទីរពេទ្យបង្អែកខេត្ត ៕
Comments ()
|
