ភ្នំពេញៈ
កំណើនសេដ្ឋកិច្ចប្រកបដោយភាពរឹងមាំ
និងនយោបាយមានស្ថិរភាពបានជំរុញឲ្យចលនាទិញដីទុកសម្រាប់លក់យក
ចំណេញចាប់ផ្តើមកក្រើកឡើងវិញនៅក្នុងរាជធានីភ្នំពេញ
ព្រោះជាតំបន់ដែលគេមើលឃើញមានហានិភ័យទាប។
លោក គីម ហ៊ាង
នាយកក្រុមហ៊ុនអចលនទ្រព្យខ្មែរ បាននិយាយថា
ចលនាទិញដីទុកលក់បានចាប់ផ្តើមមានសកម្មភាពឡើងវិញច្រើនជាពិសេស
តំបន់ដែលស្ថិតនៅក្នុងរាជធានីភ្នំពេញ និងតំបន់ជាយៗ
ពីព្រោះពួកគេមើលឃើញថា តម្លៃដីធ្លីនឹងហក់ឡើងថែមទៀតនៅភ្នំពេញ
ខណៈតាមបណ្តាខេត្តមានសភាពនៅនឹង។
លោកបានប្រាប់ទៀតថា
តម្លៃដីនៅតំបន់ពាណិជ្ជកម្មក្នុងរាជធានីភ្នំពេញបានកើនឡើងចន្លោះ
ពី១០ទៅ១៥ភាគរយប្រចាំឆ្នាំ ចំណែកដីឧស្សាហកម្ម
មានកំណើនកាន់តែខ្ពស់
ខណៈដីនៅជាយក្រុងមានកំណើនក្នុងរង្វង់១០ភាគរយប្រចាំឆ្នាំ។
លោកអះអាងថា៖«ការវិនិយោគបែបនេះនឹង
បានទទួលផលចំណេញច្រើន
ប៉ុន្តែអ្នកវិនិយោគគួរតែមើលសមត្ថភាពខ្លួនឯងដែរ
ព្រោះបើមានត្រឹម១០ទិញដល់៥០វានឹងជួបហានិភ័យខ្ពស់តែបើមាន១០០
ទិញអស់៩០ទុក១០នោះវានឹងមិនមានបញ្ហាអ្វីទេ»។
តែទោះបីជាយ៉ាងណាលោកបញ្ជាក់ថា៖«ប្រសិនបើគ្មានប្រាក់ហើយទៅ
ខ្ចីប្រាក់ពីធនាគារដើម្បីវិនិយោគក្នុងវិស័យនេះពួកគេនឹងជួប
ហានិភ័យខ្ពស់»។
លោក ឌឹត ចណ្ណា
ប្រធានគ្រប់គ្រងទូទៅក្រុមហ៊ុន វីអឹមស៊ី
បានយល់ឃើញដូចគ្នានឹងការលើកឡើងរបស់លោក គីម ហ៊ាង ដែរ
ដោយលោកមានប្រសាសន៍ថា
ចលនាទិញដីទុកលក់យកប្រាក់ចំណេញពិតជាមានការកម្រីកឡើងវិញ
ហើយអ្វីដែលប្លែកនៅត្រង់ថា
នៅជិតពេលបោះឆ្នោតនាពេលកន្លងមកការទិញ លក់
និងតម្លៃដីធ្លីស្ថិតក្នុងសភាពទ្រឹង
ប៉ុន្តែសម្រាប់ការបោះឆ្នោតនាពេលខាងមុខនេះមិនត្រឹមតែសកម្មភាព
ទិញលក់កើនឡើងនោះទេ សូម្បីតែតម្លៃក៏ហក់ឡើងខ្ពស់ផងដែរ។
ប្រធានគ្រប់គ្រងទូទៅក្រុមហ៊ុន
វីអឹមស៊ី ខាងលើបានប្រាប់ទៀតថា
មានមូលហេតុចំនួន៥ដែលធ្វើឲ្យចលនាទិញ លក់ ដី
និងតម្លៃដីក្នុងទីក្រុងកើនឡើងដូចជា៖
-ទី១ សេដ្ឋកិច្ចរបស់ប្រទេសយើងមានកំណើនប្រកបដោយភាពរឹងមាំ។
-ទី២ ស្ថិរភាពនយោបាយ និងសង្គម
-ទី៣ វិនិយោគិនជាច្រើនចូលមកកម្ពុជា
ជាពិសេសវិនិយោគិនមកពីប្រទេសជប៉ុនដែលជាអ្នកវិនិយោគមិនងាយទៅរក
ទីផ្សារណាមួយទេ
ប៉ុន្តែនៅពេលពួកគេចូលមកមានន័យថាទីផ្សារនោះល្អ។
-ទី៤
ការបោះឆ្នោតអាណត្តិទី៥នាពេលខាងមុខនេះត្រូវបានអ្នកវិនិយោគនានា
គិតថា នឹងមិនប៉ះពាល់ទៅដល់បរិយាកាសអាជីវកម្មទេ
ពីព្រោះអ្នកនយោបាយនៅកម្ពុជាមានភាពចាស់ទុំ។
-ទី៥
វិស័យអចលនទ្រព្យជាវិស័យដែលអាចផ្តល់ប្រាក់ចំណេញច្រើនព្រោះអ្នក
វិនិយោគជឿថា ក្រោយពេលបោះឆ្នោតវិស័យនេះនឹងហក់ឡើងខ្ពស់ថែមទៀត។
លោកបានបញ្ជាក់ថា៖«ការសម្រេចចិត្ត
វិនិយោគនៅពេលនេះគឺជាការ
សម្រេចចិត្តដ៏ត្រឹមត្រូវហើយក្រុមអ្នកជំនាញអចលនទ្រព្យសុទ្ធតែ
យល់ឃើញបែបនេះ
ស្របពេលដែលការធ្វើសមាហរណកម្មសេដ្ឋកិច្ចទៅក្នុងតំបន់អាស៊ានកាន់
តែខិតជិតមកដល់»។
លោកបានបន្ថែមទៀតថា៖«នៅពេលកម្ពុជាធ្វើសមាហរណកម្មសេដ្ឋកិច្ចជាមួយ
អាស៊ាននឹងមានវិនិយោគិនកាន់តែច្រើនចូលមកវិនិយោគនៅកម្ពុជា។
នៅពេលអ្នកវិនិយោគចូលមកកម្ពុជាពួកគេសុទ្ធតែមានតម្រូវការផ្នែក
អចលនទ្រព្យ បើទោះបីជាពួកគេវិនិយោគក្នុងផ្នែកណាក៏ដោយ
ដូច្នេះតម្លៃអចលនទ្រព្យនឹងឡើងថ្លៃជាមិនខាននៅពេលនោះ»។
តាមការនិទស្សន៍(ការគិតប្រមើលមើល)
របស់លោក ឌឹត ចណ្ណា បានឲ្យដឹងថា នៅក្នុងចន្លោះឆ្នាំ២០១២
និងឆ្នាំ២០១៣នេះតម្លៃដីធ្លីក្នុងរាជធានីភ្នំពេញកើនឡើងក្នុង
រង្វង់១៥ទៅ២០ភាគរយ
និងតំបន់ត្រូវប៉ាន់នៅជាយក្រុងអាចកើនឡើងក្នុងរង្វង់ពី៣០ភាគរយ
ឬខ្ពស់ជាងនេះ។
នៅឆ្នាំ២០១៤កំណើននេះនឹងមានប្រហាក់ប្រហែលឆ្នាំនេះដែរ
តែឆ្នាំ២០១៥តម្លៃរបស់វានឹងហក់ខ្ពស់។
លោក ឌឹត ចណ្ណា
បានថ្លែងថា៖«ការវិនិយោគលើដីធ្លីនាពេលបច្ចុប្បន្នអាចមាន
ហានិភ័យ តែមិនធំដូចអំឡុងឆ្នាំ២០០៨-២០០៩នោះទេ
ពីព្រោះការកើនឡើងនៅពេលនេះគឺដោយសារមានតម្រូវការពិតប្រាកដ»។
លោកបានបន្តថា៖«ប្រសិនបើរង់ចាំរយៈពេលពី២ទៅ៣ឆ្នាំខាងមុខ
អាចយឺតពេល
ព្រោះពេលនោះការផ្គត់ផ្គង់និងតម្រូវការមានតុល្យភាពគ្នាហើយ»។
លោក គុយ វ៉ាត អគ្គនាយកក្រុមហ៊ុន VTrust
Group មានប្រសាសន៍ថា ស្ថានភាពទិញ
លក់ដីធ្លីនៅរាជធានីភ្នំពេញពិតជាមានការកើនឡើងខ្ពស់មែន។
លោកបានទទួលស្គាល់ថា
កាលៈទេសៈនេះការទិញដីលក់ទុកចំណេញពិតជាមានឱកាសចំណេញច្រើន។
លោក
បានបញ្ជាក់ថា៖«ដល់ពេលដែលត្រូវវិនិយោគផ្នែកអចលនទ្រព្យហើយ
តែអ្នកវិនិយោគក៏ត្រូវពិនិត្យមើលទីតាំងឲ្យបានច្បាស់ផងដែរបើទោះ
បីយើងដឹងថា ទីតាំងណាក៏អាចចំណេញប្រាក់បានដែរ
គ្រាន់តែទីតាំងខ្លះត្រូវចំណាយពេលយូរ»។
លោកបានបន្តថា៖«ប្រសិនបើមានលទ្ធភាពទិញបាននៅកណ្តាលរាជធានី
ភ្នំពេញពិតជាល្អណាស់
ព្រោះនឹងមានឱកាសទទួលបានប្រាក់ចំណេញកាន់តែខ្ពស់»៕ ភ្នំពេញប៉ុស្តិ៍