- Written by Neath
កម្លាំងប៉ូលិសការពារសន្តិសុខនៅតាមដងផ្លូវពេលមានក្បួនឃោសនាបោះឆ្នោតរបស់គណបក្សនយោបាយ។
វ៉ាស៊ីនតោន
— អាជ្ញាធរបានចាប់ខ្លួនជនសង្ស័យបីនាក់ដែលប្រើអំពើហិង្សាលើក្បួន
ឃោសនារបស់គណបក្សសង្គ្រោះជាតិ។ លោកសុខ ខេមរានៃ វីអូអេ
ពីរដ្ឋធានីវ៉ាស៊ីនតោនបានរាយការណ៍ថា
អ្នកធ្វើយុទ្ធនាការរបស់គណបក្សសង្គ្រោះជាតិបីនាក់ត្រូវគេធ្វើឲ្យ
របួសនិងរងការបាញ់គម្រាមនៅពេលហែក្បួនកាលពីយប់ថ្ងៃសុក្រ។
ជនសង្ស័យពីរនាក់ ក្នុងចំណោមបីនាក់ដែលត្រូវគេចាប់ខ្លួននោះ ត្រូវគេស្គាល់ ឈ្មោះអ៊ុង ចាន់ថន មន្ត្រីប៉េអឹមខេត្តកណ្តាលជាអ្នកបាញ់កាំភ្លើង និងម្ចាស់ផ្ទះ ឈ្មោះឃី តាំងលន់។ ព្រឹត្តិការណ៍នេះបានកើតឡើងក្នុងសង្កាត់ផ្សារដើមថ្កូវ ខណ្ឌចំការមន។
លោកយឹម សុវណ្ណ អ្នកនាំពាក្យគណបក្សសង្គ្រោះជាតិ បានអះអាងប្រាប់វីអូអេថា អាជ្ញាធរត្រូវតែចាប់ខ្លួនជនល្មើសមកកាត់ទោស ដែលលោកចាត់ទុកថា នេះ ជាការវាយប្រហារផ្នែកនយោបាយមកលើគណបក្សរបស់លោកដែលកំពុងកើន ប្រជាប្រិយភាព។
លោកនិយាយថា៖ «ដំបូងឡើងហ្នឹងពួកយើងហែក្បួនស្លូតបូតណាស់ អត់មានពាក្យសម្តីអីទេ។ ស្រាប់តែហែទៅដល់ផ្ទះវីឡាមួយដែលមានរបងបួនម៉ែត្រហ្នឹងស្រាប់តែ ដុំថ្មហ្នឹងហោះចេញពីក្នុងមក។ ពួកយើងខ្ញុំហ្នឹងបែកខ្ញែកគ្នានៅជួរមុខ ហើយឆ្ងល់ណាស់។ រួចពីគប់ដុំថ្មឲ្យរបួសប៉ុន្មាននាក់ហើយក៏ស្រាប់តែឮស្នូរកាំភ្លើង បាញ់ចេញពីក្នុងផ្ទះហ្នឹង៥ទៅ១០គ្រាប់ទៀត ហើយចាប់អ្នកចូលរួមក្នុងក្បួនដង្ហែហ្នឹងចូលទៅក្នុងផ្ទះទៀត។ ចាប់បីនាក់ហ្នឹង បាទ»។
លោកបានអំពាវនាវឲ្យសហគមន៍អន្តរជាតិមានវិធានការនិងតាមដានអំពីរឿង វាយប្រហារដែលមិនធ្លាប់មានពីមុននេះ។
ដោយឡែក លោកហូ វ៉ាន់មន្ត្រីជាន់ខ្ពស់គណបក្សសង្គ្រោះជាតិមួយរូបទៀត ដែលតាមឃ្លាំមើលសកម្មភាពអាជ្ញាធរ បានបញ្ជាក់ថា ជនសង្ស័យទាំងបីកំពុងស្ថិតក្នុងការឃុំឃាំងរបស់កងរាជអាវុធហត្ថ ក្រុងភ្នំពេញដើម្បីសាកសួរ។
ក្រុមអ្នកហែក្បួនគណបក្សសង្គ្រោះជាតិបានបន្តព័ទ្ធផ្ទះដែលបាន ប្រើដុំថ្មនោះ ចាប់ពីម៉ោងជិត៨យប់រហូតដល់ម៉ោងប្រមាណជាង១០យប់ ហើយក្រោយមកបានចាកចេញដោយបន្សល់ទុកប្រមាណជាង១០០នាក់ដើម្បី ឃ្លាំមើល។
ថ្លែងពេលកំពុងឃ្លាំមើលនៅកន្លែងកើតហេតុ លោកចាន់ សុវ៉េត មន្ត្រីស៊ើបអង្កេតអង្គការសិទ្ធិមនុស្សអាហុក បានអះអាងថា ដោយសារតែអាជ្ញាធរដែលមិនបានចាត់វិធានការឆាប់ រួចផ្ទះនោះក៏មិនព្រមបើកទ្វារ ហើយជនបីរូបដែលត្រូវគេចាប់ដាក់ក្នុងផ្ទះនោះមិនអាចចេញមកវិញផង ក្រុមអ្នកហែក្បួនឃោសនាបានបង្ហាញកំហឹងក្រេវក្រោធដាក់អាជ្ញាធរ។ តែគ្មានអំពើហិង្សាដែលកើតមានទេ។
លោកនិយាយថា៖ «និយាយរួម បើស្ថានភាពនេះមិនអាចដោះស្រាយគ្នាបានដោយផ្លូវច្បាប់ ដោយសន្តិវិធីនិងដោយយុត្តិធម៌ទេ មើលទៅវាអាចជះឥទ្ធិពលមិនល្អដល់ស្រុកយើងដែរ»។
លោកអ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជា ដែលស្ថិតនៅកន្លែងកើត ហេតុដែរនោះ បានអះអាងថា ក្រុមដង្ហែក្បួនមិនអស់ចិត្តទេ ដោយសារម្ចាស់ផ្ទះមិនបើកទ្វារឲ្យមើលមនុស្សបីនាក់ដែលគេសង្ស័យថា ត្រូវចាប់ឃុំទុកក្នុងផ្ទះនោះ។
ក្រុមអាជ្ញាធរមិនផ្តល់អត្ថាធិប្បាយជាផ្លូវការនៅឡើយទេ ដោយគ្រាន់តែបាន បញ្ជាក់ក្នុងលក្ខខណ្ឌពុំឲ្យប្រាប់ឈ្មោះថា ជនសង្ស័យទាំងបីកំពុងស្ថិតនៅក្នុងការ ឃុំខ្លួន។ តែបានបញ្ជាក់បន្ថែមថា គ្មានអ្នកហែក្បួនបីនាក់ត្រូវគេចាប់ដាក់ក្នុងផ្ទះ នោះទេ។ មន្ត្រីអាជ្ញាធរទាំងនោះបានអះអាងថា ពួកគេកំពុងស្រាវជ្រាវបញ្ហានេះ បន្ត ក្រោយពីបានបង្ហាញឲ្យឃើញថា មានការខូចខាតទ្រព្យសម្បត្តិម្ចាស់ផ្ទះនិងរថយន្តផងដែរក្នុងពេល ប៉ះទង្គិចគ្នា។ ពួកគេបានអះអាងថា នឹងជម្រាបជូន សារធារណជនឲ្យបានដឹងតាមរយៈទូរទស្សន៍ជាតិកម្ពុជានៅថ្ងៃនេះ។
គណបក្សសង្គ្រោះជាតិត្រូវគេដឹងថា ជាគណបក្សដែលមានសំឡេងនិងកម្លាំង ប្រហាក់ប្រហែលនឹងគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែនដែលកាន់កាប់អំណាចជាង៣០ឆ្នាំ។ គណបក្សទាំងពីរកំពុងធ្វើការ ឃោសនាអំពីគោលនយោបាយរៀងៗខ្លួន។
ការបាញ់កាំភ្លើងពេលមានការហែក្បួន និងការវាយប្រហារដោយគប់ដុំថ្មទៅលើ គណបក្សសង្គ្រោះជាតិនេះកើតឡើងក្រោយប៉ុន្មានថ្ងៃដែលមានការអំពាវ នាវពីគណបក្សនយោបាយ មន្ត្រីសង្គមស៊ីវិល និងមន្ត្រីរៀបចំការបោះឆ្នោតសុំឲ្យអាជ្ញាធរ និងគណបក្សនយោបាយទាំងអស់ទប់ស្កាត់មិនឲ្យមានអំពើហិង្សាលើការឃោសនា បោះឆ្នោតនិងដំណើរការបោះឆ្នោត៕ ប្រភព ៖ VOA
