អាហ្វហ្គានីស្ថាន (BBC): កងសន្តិសុខ ៣នាក់ និងក្រុមបះបោរ ៤នាក់ បានស្លាប់ បន្ទាប់ពីរងការវាយប្រហារពីក្រុមសកម្មប្រយុទ្ធតាលីបង់ បានបើកការវាយប្រហារក្បែរវិមានប្រធានាធិបតីអាហ្វហ្គានីស្ថាន ដែលជាតំបន់មួយ ដែលមានសន្តិសុខបំផុត នៅក្រុងកាប៊ុល។
ការវាយប្រហារនេះ កើតឡើងនៅស្រុកសាស ដារ៉ាក់(Shash Darak) នៅវេលាម៉ោង ៦ និង ៣០នាទី (ម៉ោងក្នុងតំបន់) ។
ក្រុមសកម្មប្រយុទ្ធបានយកគោលដៅវាយប្រហារ នៅចំណុចរបងខាងកើតវិមានប្រធានាធិបតី ដែលមានចម្ងាយប្រមាណ២-៣រយម៉ែត្រ ពីតួវិមាន ដែលនៅទីនោះ មានក្រុមអ្នកកាសែតរាប់សិបនាក់ ជួបជុំគ្នា នៅក្នុងសន្និសីទកាសែតមួយ ជាមួយលោកប្រធានាធិបតីកាហ្សៃ ដែលនឹងចាប់នៅវេលាម៉ោង ៩ និង ០០នាទី។
ក្រុមអ្នកកាសែត បានឮសម្លេងផ្ទុះ ៣-៤ដង និងមានរបាយការណ៍ថា គ្រាប់បែកដៃជាច្រើនគ្រាប់ ត្រូវបានគប់ នៅម្តុំនោះ។
បើតាមសម្តីអ្នកនាំពាក្យក្រសួងការពារជាតិអាហ្វហ្គានីស្ថាន បានប្រាប់BBC ថា ក្រុមជនវាយប្រហារ ៤នាក់ បានពាក់ឯកសណ្ឋានសន្តិសុខ និងកាន់កាតសម្គាល់ខ្លួនក្លែងក្លាយ ហើយចាប់ផ្តើមបើកការវាយប្រហារ ក្នុងនោះមានម្នាក់ បានបំផ្ទុះខ្លួនឯង ។ នៅទីបំផុត ពួកគេ ត្រូវបានបាញ់សម្លាប់ ដោយកម្លាំងសន្តិសុខឯកជន នៅ សណ្ឋាគារមួយ ក្បែរនោះ។ សណ្ឋាគារនេះ ឈ្មោះ អារីណា (Ariana Hotel) ត្រូវបានគេស្គាល់ថា ជាការិយាល័យCIA។
លោកអាយុប សាឡាងហ្គី (Ayub Salangi) ស្នងការប៉ូលិសក្រុងកាប៊ុល បាននិយាយថា ការវាយប្រហារ ត្រូវបានបញ្ចប់ក្នុងរយៈពេល ២ម៉ោង ក្រោយពីគ្រាប់កាំភ្លើងទី១ បានបាញ់។
កងកម្លាំងជំនួយសន្តិសុខ អន្តរជាតិ ដែលដឹកនាំ ដោយអង្គការណាតូ(NATO) ដែលស្ថិតនៅមិនឆ្ងាយពីកន្លែងកើតហេតុ បានសរសេរតាម Twitter ថា នេះជាការឆ្លើយតបមួយ របស់កងកម្លាំងសន្តិសុខជាតិអាហ្វហ្គានីស្ថាន។
កាលពីសប្តាហ៍មុន កងកម្លាំងសន្តិសុខអាហ្វហ្គានីស្ថាន បានបន្តកិច្ចការទទួលខុសត្រូវលើសន្តិសុខទូទាំងប្រទេស ជាលើកដំបូង ចាប់តាំងពីរដ្ឋាភិបាលតាលីបង់ ត្រូវបានបណ្តេញចេញពីអំណាចនៅឆ្នាំ២០០១ មុនពេលដែលកងកម្លាំងអន្តរជាតិ ត្រូវដកចេញចុងឆ្នាំ២០១៤ ប៉ុន្តែ អន្តរជាតិ នឹងនៅតែបន្តការគាំទ្រផ្នែកយោធា នៅពេលណាដែលអាហ្វហ្គានីស្ថាន ត្រូវការ៕akt