ថ្ងៃទី 01 ខែកក្កដា ឆ្នាំ2013, ម៉ោង 12:47 AM ដោយ៖ ហេង សុខា
ភ្នំពេញ៖ គ្រាន់តែឈានចូលថ្ងៃទី១ ដើមខែកក្កដា ឆ្នាំ២០១៣ អគ្គិភ័យឆេះបន្ទប់ខារ៉ាអូខេ X.O អស់៤ បន្ទប់ ធ្វើឲ្យផ្អើលក្រុមពន្លត់អគ្គិភ័យរបស់ស្នងការនគរបាលរាជធានី ភ្នំពេញ រត់ជាន់ជើងគ្នា ប្រមូលរថយន្តទាំងអស់ ទៅជួយអន្តរាគមន៍ភ្លាម ។
អគ្គិភ័យនេះ ឆាបឆេះ នៅវេលាម៉ោង ២រសៀលថ្ងៃទី១ ខែកក្កដា ឆ្នាំ ២០១៣ នៅក្នុងខារ៉ាអូខេ X.O ដែលមានទីតាំងនៅតាម ផ្លូវលេខ ១៦៣ ក្រុម៤៥ ភូមិ៦ សង្កាត់ទួលស្វាយព្រៃទី១ ខណ្ឌចំការមន ។
អគ្គិភ័យនេះ ឆាបឆេះចេញពីបន្ទប់ ផ្ទាល់ដី បង្កជាផ្សែងហុយឃ្មួលខ្មាញ់ ធ្វើឲ្យមានការភ្ញាក់ផ្អើលដល់ សមត្ថកិច្ច ជួយអន្តរាគមន៍ទូរស័ព្ទហៅរថយន្តពន្លត់អគ្គិភ័យរបស់ស្នងការ នគរបាលរាជធានីភ្នំពេញ ប្រមាណជាង ១០គ្រឿង យកទៅបាញ់ទឹកជួយពន្លត់ និងមានរថយន្តប្រភេទកន្រ្តៃមួយគ្រឿងបានទៅកាត់ដំបូលស័ង្កសី និងទ្វារ ដើម្បីបាញ់ទឹកបញ្ចូលពន្លត់ផ្សែង ដែលហុយឃ្មួលខ្មាញ់ ។
អគ្គិភ័យនេះ មានការជួយអន្តរាគមន៍ ពីលោក ឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជា ស្នងការនគរបាល រាជធានីភ្នំពេញ លោកអធិការ ខណ្ឌចំការមន នគរ បាលសណ្តាប់រាជធានីភ្នំពេញ ដឹក នាំ ដោយលោកវរសេនីយ៍ទោ អេម សម្បតិ្ត អាជ្ញាធរមូលដ្ឋាន និងលោក នេត វត្ថា នាយការិយាល័យនគរបាលរាជធានីភ្នំពេញ បានចុះទៅជួយអន្តរាគមន៍ដល់កន្លែងកើតហេតុ ។
ផ្សែងហុយខ្មួលខ្មាញ់ បានជះចូលទៅក្នុងភោជនីយដ្ឋានទន្លេបាសាក់ នៅជាប់កន្លែងកើតហេតុ ធ្វើឱ្យបិទទ្វារផ្អាកការលក់ដូរមួយថ្ងៃសិន ។
តាមការសន្និដ្ឋានរបស់សមត្ថកិច្ចជាជំហានដំបូង អគ្គិភ័យនេះ បណ្តាលមកពីទុស្សេខ្សែភ្លើង ។
ពាក់ព័ន្ធនឹងអគ្គិភ័យនេះ បង្កឲ្យបុរសជាបុគ្គលិករបស់ខារ៉ាអូខេ X.O ម្នាក់របួសរយះដៃ ។
អគ្គិភ័យនេះប្រើប្រាស់រថយន្តពន្លត់អគ្គិភ័យជាង១០គ្រឿង រហូតដល់៤និង៣០ល្ងាច ហើយរថយន្តពន្លត់អគ្គិភ័យ នៅតែបន្តបាញ់ទឹកពន្លត់ មិនទាន់រលត់អស់នៅឡើយទេ ដោយឆាបឆេះខូចខាតអស់ ៤បន្ទប់ បន្ទប់កណ្តាល ព្រៃវែង ស្វាយរៀង និងតាកែវ។
ដោយឡែក កាលពីវេលាម៉ោង ១រសៀលថ្ងៃទី១ ខែកក្កដា ឆ្នាំ២០១៣ មានករណីទុស្សេខ្សែភ្លើង ឆាបឆេះបន្ទប់ទទួលភ្ញៀវ របស់អាហារដ្ឋានសុវណ្ណា១ ស្ថិតនៅផ្ទះលេខ២សេ ផ្លូវលេខ២១ សង្កាត់ទន្លេបាសាក់ ខណ្ឌចំការមន បណ្តាលឲ្យខូចខាតរបស់របរក្នុងបន្ទប់ទទួលភ្ញៀវ អស់មួយចំនួន តែមិនបណ្តាលឲ្យមាន អណ្តាតភ្លើងទេ ៕ akt