ក្រចេះ៖ បទល្មើសនៃការកាប់បំផ្លាញព្រៃឈើនិងការដឹកជញ្ជូនធ្វើអាជីវ កម្មនៅតែមានសកម្មភាពយ៉ាងគក្រឹកគគ្រែងស្ទើរគ្រប់ខេត្តក្រុង ក្នុងប្រទេស ដោយពុំមានចំណាត់ការណាមួយពីមន្រ្តីជំនាញក្នុងការបង្រ្កាបនិង ទប់ស្កាត់នោះឡើយ ផ្ទុយទៅវិញបែរជាមានមន្រ្តីខ្លះយកតួនាទីរបស់ខ្លួនទៅប្រមូល លុយ សម្រាប់ចំណូលសេដ្ឋកិច្ចគ្រួសារដែលធ្វើឲ្យមានការរិះគន់ដូចជា លោក គង់ ងីមនាយកដែនជម្រកសត្វព្រៃស្នូលជាដើម ។
បើតាមប្រជាពលរដ្ឋនៅក្នុងស្រុកស្នូលខេត្តក្រចេះនិយាយថា បទល្មើសព្រៃឈើគេឃើញកើតមានជាហូរហែ ប៉ុន្តែពុំដែលឃើញមន្រ្តីជំនាញធ្វើការ
បង្រ្កាបនោះឡើយ តែបើប្រជាពលរដ្ឋដឹកឈើតិចតួចធ្វើផ្ទះឫសូម្បីចំនៀរឈើក៏ត្រូវបានលោក គង់ ងីមដាក់កម្លាំងស្ទាត់ចាប់ទារលុយដែរជាក់ស្តែង
កាលពីថ្ងៃទី៩ កក្កដា មន្រ្តីបរិស្ថានរបស់លោក គង់ ងីមបានឃាត់រថយន្តមួយគ្រឿងម៉ាកហ៊ីយ៉ាន់ដាយ ពាក់ស្លាកលេខ កំពង់ចាម3A 3008 ពណ៌ទឹកក្រូចលាយបៃតងចាស់ ដែលដឹកចំនៀរឈើនៅលើផ្លូវ៧៦A ត្រង់ចំណុច១០១ ដែលដឹកចេញពីក្រុមហ៊ុនដីព្រៃសម្បទានសេដ្ឋកិច្ច មកកាន់ខេត្តកំពង់ចាមនោះគឺដើម្បីគាបយកលុយ។
ពលរដ្ឋនិយាយទៀតថា បើឡានដឹកឈើរបស់ឈ្មួញធំៗ គឺគេសុទ្ធតែបង់ប្រាក់ដាក់ខែឲ្យទៅសមត្ថកិច្ច ដោយពុំមានការឆែកឆេរត្រួតពិនិត្យនាំរំខាននោះឡើយ ហើយការចាប់ត្រួតពិនិត្យបានត្រឹមតែពលរដ្ឋធម្មតាដែលមិនរកស៊ីប៉ុណ្ណោះ ដើម្បីគាបជំរិតយកលុយ។
ពាក់ព័ន្ធនឹងព័ត៌មាននេះលោក គង់ ងីម មិនអាចទាក់ទងដើម្បីសុំការបំភ្លឺបានទេកាលពីម្សិលមិញ ។
