បន្ទាយមានជ័យ៖ លោកទ្រីណារិន អភិបាលខេត្តបន្ទាយមានជ័យអមដំណើរដោយមន្ត្រីសាលាខេត្តរួមជា មួយលោកអភិបាលក្រុងប៉ោយប៉ែត និងអភិបាលស្រុកអូរជ្រៅ បានធ្វើការដោះស្រាយបញ្ហាអគ្គិសនីបន្ទាប់ពីមានប្រជាពលរដ្ឋ ប្រមាណ២០០នាក់២ឃុំនៅស្រុកអូរជ្រៅ
និង១សង្កាត់ក្នុងក្រុងប៉ោយប៉ែតនាំគ្នាមកកាន់សាលាបឋមសិស្សានិមិត្ត១ សូមឲ្យអាជ្ញាធរជួយបញ្ចុះ តម្លៃភ្លើងអគ្គិសនីកាលពីវេលាម៉ោង៣ និង៤៥នាទី
រសៀលថ្ងៃទី១០ កក្កដា ។
ប្រជាពលរដ្ឋសុំឱ្យបញ្ចុះតម្លៃភ្លើងពី១គីឡូវ៉ាត់ត្រឹមតែ១០០០រៀល ព្រោះសព្វថ្ងៃក្រុមហ៊ុនបានយកតម្លៃខ្ពស់ពីប្រជាពលរដ្ឋពី១២បាត ទៅ១៧បាតក្នុង១គីឡូវ៉ាត់។ ប្រជាពលរដ្ឋបានបន្តថា សុំឱ្យក្រុមហ៊ុនស្ថាបនិមិត្តកុំយកចំណេញខ្លាំងពេក ព្រោះពួកគាត់បានដឹងថា ក្រុមហ៊ុននោះម៉ៅពីក្រុមហ៊ុនអានកូត្រឹមតែ៦បាតទេ ក្នុង១គីឡូវ៉ាត់ ។
លោកអភិបាលខេត្តបន្ទាយមានជ័យ បានឲ្យអាជ្ញាធរមូលដ្ឋានប្រជុំបន្ទាន់នៅក្នុងសង្កាត់និមិត្ត១នោះភ្លាមៗ ដើម្បីរកដំណោះស្រាយ។ ជាលទ្ធផលក្រុមហ៊ុន ស្ថាប និមិត្តយល់ព្រមបញ្ចុះថ្លៃអគ្គិសនីត្រឹម១០បាតក្នុង១គីឡូវ៉ាត់ ស្មើនឹង១៣០០រៀល ហើយបើបងប្អូនមិនទុកចិត្តខ្លាចគីឡូដើរលឿនខុសប្រក្រតីអាចយកកុងទ័រទៅ វាស់នៅសាលាខេត្តបាន។
ប្រជាពលរដ្ឋជាច្រើនបានយល់ស្របទៅនឹងតម្លៃខាងលើនេះ ហើយបានអបអរសាទរក្នុងការរកដំណោះស្រាយនេះថាអាចទទួលយកបាន ៕nokothom
