ដោយ វណ្ណ វិចារ
2013-07-10
អតីត
អភិបាលក្រុងបាវិត ខេត្តស្វាយរៀង លោក ឈូក បណ្ឌិត
ដើរចូលសវនាការសាលាឧទ្ធរណ៍ កាលពីថ្ងៃទី២៨ កុម្ភៈ ឆ្នាំ២០១៣។
RFA/Ouk Savborey
មន្ត្រីការផ្សាយរបស់គេហទំព័រ ដើមត្នោត (WWW.DTN7.COM) លោក រដ្ឋា នៅថ្ងៃទី១០ ខែកក្កដា មានប្រសាសន៍ថា ប្រាក់ចំនួន ៧លានរៀលនេះបានមកពីសាធារណជនជាច្រើននាក់ រៃអង្គាសគ្នាដើម្បីជំរុញឲ្យមានការលុបបំបាត់និទ្ទណ្ឌភាពនៅ កម្ពុជា។ លោកបន្តថា សារព័ត៌មានដើមត្នោត ជាអ្នកទទួលខុសត្រូវផ្សព្វផ្សាយពីដំណឹងប្រាក់រង្វាន់នេះ និងជាអ្នកតម្កល់ប្រាក់រង្វាន់នេះទុកផ្ដល់ជូនសមត្ថកិច្ច និងពលរដ្ឋទូទៅដែលអាចចាប់ខ្លួនលោក ឈូក បណ្ឌិត បាន។ លោកបញ្ជាក់ថា ប្រាក់ចំនួន ៧លានរៀលនេះ ជាប្រាក់តិចតួចមួយ ប៉ុន្តែជាទឹកចិត្តដ៏ស្មោះសររបស់ប្រជាពលរដ្ឋ ដែលចង់ឃើញសង្គមខ្មែរមានយុត្តិធម៌។
ទន្ទឹមនឹងនេះ ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា ការផ្ដល់រង្វាន់នេះជាសញ្ញាថ្មីមួយទៀត ដែលបង្ហាញឲ្យកាន់តែច្បាស់ថា សាធារណជនមិនសុខចិត្តឲ្យលោក ឈូក បណ្ឌិត រួចខ្លួនឡើយ។ លោកបន្តថា ការចាប់ខ្លួនលោក ឈូក បណ្ឌិត ជាចំណោទមួយដែលរដ្ឋាភិបាលមិនអាចមើលរំលងទេ ព្រោះថាវានឹងអាចប៉ះពាល់ដល់ការសម្រេចចិត្តបោះឆ្នោតរបស់កម្មករ រាប់ម៉ឺននាក់។
ទាក់ទងនឹងការស្វែងរកចាប់ខ្លួនលោក ឈូក បណ្ឌិត មន្ត្រីអ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធិ កាលពីថ្ងៃទី៩ ខែកក្កដា បានថ្លែងប្រាប់វិទ្យុក្នុងស្រុកថា សមត្ថកិច្ចកំពុងតែតាមចាប់ខ្លួនលោក ឈូក បណ្ឌិត យ៉ាងមមាញឹក ប៉ុន្តែមិនទាន់ទទួលដំណឹងប្រាកដថា ជនជាប់ចោទកំពុងរស់នៅលាក់ខ្លួននៅឯណាទេ។ លោកបន្តថា ម្ដងឮថានៅមណ្ឌលគិរី ម្ដងរតនគិរី តែលោកធានាថា បុគ្គល ឈូក បណ្ឌិត មិនអាចចេញក្រៅស្រុកបានឡើយ។
កាលពីថ្ងៃទី២៥ ខែមិថុនា តុលាការខេត្តស្វាយរៀង បានប្រកាសសាលក្រមផ្ដន្ទាទោសលោក ឈូក បណ្ឌិត កំបាំងមុខឲ្យជាប់ពន្ធនាគាររយៈពេល ១ឆ្នាំកន្លះ និងពិន័យជាប្រាក់ ៣៨លានរៀល ក្នុងសំណុំរឿងបាញ់កម្មករឲ្យរបួស កាលពីដើមឆ្នាំ២០១២។ ក្រោយពីប្រកាសសាលក្រមមួយថ្ងៃ គឺនៅថ្ងៃទី២៦ មិថុនា ព្រះរាជអាជ្ញាអមសាលាដំបូងខេត្តស្វាយរៀង លោក ហ៊ីង ប៊ុនជា បានចេញដីកាឲ្យប៉ូលិសតាមចាប់ខ្លួនលោក ឈូក បណ្ឌិត យកមកអនុវត្តទោសក្នុងពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
