ដោយ ៖ ចន្ថា|ថ្ងៃទី 10 កក្កដា 2013 ម៉ោង 18:43:46
សមត្ថកិច្ចដែលចុះពិនិត្យកន្លែង កើតហេតុបានឲ្យដឹងថា ក្មេងប្រុសរងគ្រោះទាំងពីរនាក់នេះ ម្នាក់ឈ្មោះ បាត់ ណេន អាយុ៧ឆ្នាំ និងម្នាក់ទៀតឈ្មោះ បាត់ នីន អាយុ៦ឆ្នាំ ។ ពួកគេទាំងពីរនាក់ ត្រូវជាបងប្អូនបង្កើតនឹងគ្នាដែលឪពុកម្តាយ ធ្វើជាកម្មករ ឡឥដ្ឋនៅក្បែរកន្លែងកើតហេតុ ។
សមត្ថកិច្ច បានឲ្យដឹងទៀតថា នៅវេលាម៉ោងប្រមាណជា១រសៀល ក្មេងប្រុសទាំងពីរនាក់បាននាំគ្នាចេញពីកន្លែងម្តាយធ្វើការ ទៅលេងនៅខាងក្រៅ។ ដោយបាត់កូនយូរពេក នៅវេលាម៉ោង៤ និង ៣០នាទីរសៀល ឪពុកម្តាយនិងអ្នកធ្វើការជាមួយ បាននាំគ្នាដើររក ក៏ឃើញ ខោអាវរបស់ពួកគេនៅក្បែរមាត់ទឹក រណ្តៅដែលគេជីកអាចម៌ដីយកធ្វើផ្លូវ មានការសង្ស័យ បាននាំគ្នាចុះរាវក្នុងទឹក ក៏ប្រទះឃើញសាកសពក្មេងប្រុសពីរនាក់បងប្អូនស្លាប់នៅក្បែគ្នា ។
សមត្ថកិច្ចបានសន្និដ្ឋានថា ក្នុងខណៈពេលដែលក្មេងប្រុស ទាំងពីរនាក់ចុះលេង ទឹកនោះ អាចមានម្នាក់ត្រូវរអិលជើងធ្លាក់ទៅទឹកជ្រៅបណ្តាលឲ្យលង់ ហើយម្នាក់ទៀត ចូលទៅជួយ ក៏ត្រូវលង់ស្លាប់ទាំងពីរនាក់តែម្តង ៕
