រាជធានីភ្នំពេញ ៖បុរសម្នាក់ជាជាងភ្លើងដែលកំពុងតបណ្តាញចរន្តអគ្គិសនីនៅ ផ្ទះល្វែងត្រូវបានឆក់ចរន្តអគ្គិសនីស្លាប់ ក្រោយពេលបងប្អូនជាកម្មករដូចគ្នានិងប្រជាពលរដ្ឋនៅក្បែរ កន្លែងកើតហេតុ ខិតខំជួយ អស់លទ្ធភាពក៏ដោយ ។ ឧប្បត្តិហេតុនេះកើតឡើងកាលពីវេលាម៉ោង៣និង ៤៥នាទីរសៀលនាថ្ងៃទី ០១ខែ កក្កដា ឆ្នាំ២០១៣ស្ថិតនៅក្នុងការដ្ឋានផ្ទះល្វែងមួយក្បែររោងចក្រកា ណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ តាមសាក្សីនៅកន្លែងកើតហេតុដែលត្រូវជាអ្នកមកពីស្រុកភូមិជា មួយគ្នាបានឲ្យដឹងថា
ជនរងគ្រោះមានឈ្មោះស៊ឹម វ៉ាន់ដេន ឈ្មោះហៅក្រៅ ទិត្យ ដេវ ភេទប្រុស អាយុ៣១ឆ្នាំ មានមុខរបរជាជាងតបណ្តាញចរន្តអគ្គិសនី រស់នៅភូមិទឹកឃ្លាំង ឃុំទឹកឃ្លាំង ស្រុកល្វាឯម ខេត្តកណ្តាល ទើបតែមកធ្វើការទីនេះបានបីថ្ងៃតែប៉ុណ្ណោះ ដោយស្នាក់នៅកន្លែងកើតហេតុនេះតែម្តង ។ ផ្ទះល្វែងដែលកំពុងសាងសង់មាន១២ល្វែង កំពស់ ៣ជាន់ មានម្ចាស់ឈ្មោះ ទី សាម៉ាន់ រស់នៅម្តុំអូឡាំពិក ខណ្ឌចំការមន ដោយមានឈ្មោះ ស៊ី ណា ភេទប្រុស អាយុ៣៥ឆ្នាំ ជាអ្នកមើលការខុសត្រូវ និងស្នាក់នៅក្នុងការដ្ឋានផ្វះល្វែងនេះតែម្តង។ សាក្សីបានបន្តថា ជនរងគ្រោះបានមកស៊ីឈ្នួលតបណ្តាញភ្លើងនៅផ្ទះល្វែងនេះមានគ្នាចំនួន៣នាក់ ។ មុនពេលកើតហេតុជនរងគ្រោះបានឡើងតបណ្តាញភ្លើងនៅជាន់ទី៣ ដោយរាយខ្សែភ្លើង ចាប់អំពូលតាមបន្ទប់ នៅពេលដែលកំពុងតភ្លើង ជនរងគ្រោះបានយកម៉ូទ័រស្វានមកកៀបក្លៀក ពុំបានដឹងថាខ្សែម៉ូទ័រស្វាននោះដាច់រលាត់ក៏ត្រូវចរន្តអគ្គិសនីឆក់តែម្តង ឃើញដូច្នេះកម្មករដ៏ទៃទៀតនាំគ្នាមកជួយនិងបិតប៉ារ៉ែតភ្លើង ហើយបាននាំគ្នាសែងចុះមកក្រោម ដោយកប់និងដីខ្សាច់ ភ្លាមៗនោះសមត្ថកិច្ចរួមនឹងប្រជាពលរដ្ឋបាននាំគ្នាជួយសង្គ្រោះជាបឋម ដោយសង្ស័យថាជនរងគ្រោះមិនទាន់ស្លាប់ក៏ បានហៅរថយន្តសង្គ្រោះរបស់អង្គភាព៧១១កងពលតូចលេខ៧០ ដឹកយកទៅសង្គ្រោះ ប៉ុន្តែជាអកុសល ក្រោយពេលរថយន្តសង្គ្រោះមកដល់ក្រុមសង្គ្រោះចុះ ទៅពិនិត្យមើលឃើញថាជនរងគ្រោះបានស្លាប់បាត់ទៅហើយ ។ សាកសពក្រោយពីសមត្ថកិច្ចជំនាញពិនិត្យឃើញថាពិតជាស្លាប់ដោយសារឆក់ចរន្តអគ្គីសនីពិតប្រាកដមែន ត្រូវបានប្រគល់អោយសាច់ញ្ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត ៕akt