ថ្ងៃទី 15 ខែមីនា ឆ្នាំ2013, ម៉ោង 10:05 PM ដោយ៖ ចាន់ សុខលន់
បន្ទាយមានជ័យ៖ យ៉ាងហោចណាស់ មនុស្សម្នាក់ បានស្លាប់ ដោយសារន្ទះបាញ់ ២នាក់រងរបួសធ្ងន់ ព្រមទាំងលំនៅឋាន សាលាឆទាន ជង្រុកស្រូវទ្រព្យសម្បត្តិមួយចំនួនធំ របស់អ្នកស្រុកស្វាយចេក និងស្រុកថ្មពួក សរុប ៣៥៩ខ្នង រងការខូចខាតយ៉ាងដំណំ ដោយសារភ្លៀងកក់ខែដំបូង នាំមកនូវខ្យល់ព្យុះនិងរន្ទះក្នុង ខេត្តបន្ទាយមានជ័យ។
គ្រោះធម្មជាតិដ៏អាក្រក់នេះ បានកើតឡើងកាលពីវេលាម៉ោង ៦និង៥០ នាទីល្ងាចថ្ងៃទី១៤ ខែមីនា ឆ្នាំ២០១៣ ។
តាមការឲ្យដឹងពីប្រជាពលរដ្ឋ នៅមុនពេលភ្លៀង ផ្ទៃមេឃ មានពណ៌ខ្មៅងងឹត និងមានខ្យល់ព្យុះបោកបក់ កួចយ៉ាងខ្លាំងលាយឡំ និងទឹកភ្លៀង មានផ្គររន្ទះ គួរឲ្យភ័យខ្លាចបំផុត ។ ខ្យល់ព្យុះ បានបោកកួច ធ្វើឲ្យលំនៅឋានរបស់ពួកគាត់ ត្រូវនូវការខូចខាត ។
តាមតួលេខបឋម របស់សមត្ថកិច្ចនគរបាល និងអាជ្ញាធរស្រុក រួមទាំងសាខាកាកបាទក្រហមកម្ពុជា ខេត្តបន្ទាយមានជ័យ លំនៅឋានប្រជាពលរដ្ឋ ក៏ដូចជាជង្រុកស្រូវ សាលាឆទាននៅស្រុកថ្មពួក ត្រូវនូវផលប៉ះពាល់ដោយខ្យល់ព្យុះដ៏កំណាចនេះ មាន ៣ឃុំ គឺឃុំថ្មពួក ចំនួនចំនួន ៤០ខ្នង, ឃុំគំរូចំនួន ២៦ខ្នង, ឃុំភូមិថ្មី ចំនួន ២៤៤ខ្នង សរុបចំនួន ៣១០ខ្នង និងខូចគោយន្តកន្ត្រៃ១គ្រឿង, ម៉ូតូ ១គ្រឿង របួសមនុស្សធ្ងន់ ដោយសារផ្ទះបាក់ សង្កត់ចំនួន២នាក់ ម្នាក់ឈ្មោះ ប៊ុន ស៊ីអឿយ ភេទប្រុស អាយុ៣៣ ឆ្នាំ កំពុងសម្រាកព្យាបាលនៅមន្ទីរពេទ្យបង្អែកស្រុកថ្មពួក និងម្នាក់ទៀតឈ្មោះ ពេក ជឿ ភេទប្រុស អាយុ ១៣ឆ្នាំ ត្រូវបានបញ្ជូនទៅមន្ទីរពេទ្យកុមារនៅខេត្តសៀមរាប ។ជនរងគ្រោះទាំង២នាក់ នៅភូមិកាប់ចោរ ឃុំភូមិថ្មី ។
ស្ត្រីម្នាក់ឈ្មោះ ហឿ ភ័ណ្ឌ អាយុ ៣១ឆ្នាំ មានកូនប្រុសតូចចំនួន ២នាក់ បានស្លាប់ ដោយសាររន្ទះបាញ់។
ស្ត្រីដែលស្លាប់នោះ នៅព្រឹកថ្ងៃទី១៥ ខែមីនា សាខាកាកបាទក្រហមកម្ពុជា បាននាំយកថវិកាចំនួន ១លានរៀល និងសាលាស្រុកថ្មពួក ចំនួន ១០ម៉ឺនរៀល យកទៅចូលរួមក្នុងកម្មវិធីបុណ្យសពនោះផងដែរ។
ដោយឡែក នៅស្រុកស្វាយចេក ក៏មានផលប៉ះពាល់ ដោយសារខ្យល់ព្យុះនេះដែរ លើ៤ ឃុំ គឺឃុំ តា បែន ស្លរក្រាម ទ្រាសនិងឃុំតាផូ សរុប ៤៩ខ្នង របួសមនុស្សនិងខូចគោយន្តកន្ត្រៃ១ គ្រឿងផងដែរ។
ទោះជាយ៉ាងណា គណៈកម្មការ ចុះត្រួតពិនិត្យលំនៅឋានប្រជាពលរដ្ឋ ដែលរងគ្រោះដោយធម្មជាតិនេះ បាននិយាយថា៖ ចំនួនខាងលើនេះ គឺជាចំនួនបឋម ចំណែកតួលេខច្បាស់ការណ៍នោះ នៅមិនច្បាស់នៅឡើយទេ កាលណា បានតួលេខច្បាស់ការណ៍ គណៈកម្មាការ និងអាជ្ញាធរ នឹងធ្វើរបាយការណ៍ជូនប្រធានគណៈកម្មការគ្រោះមហន្តរាយថ្នាក់ខេត្តពិនិត្យ និងយកអំណោយមកប្រគល់ជូនប្រជាពលរដ្ឋ ដែលរងគ្រោះដោយគ្រោះធម្មជាតិ នេះ។
ប្រជាពលរដ្ឋជាច្រើនបានសម្ដែងនូវការសោកស្តាយ ដោយអ្នកខ្លះខំទៅស៊ីឈ្នួលគេនៅ ប្រទេសថៃ សន្សំទម្រាំបានប្រាក់ខ្លះខ្ចីគេខ្លះ យកមកសង់ផ្ទះនៅមិនបានប៉ុន្មានផង ត្រូវខូចខាត ដោយសារគ្រោះធម្មជាតិបែបនេះទៅវិញ៕Akt