ថ្ងៃទី 07 ខែមករា ឆ្នាំ2013, ម៉ោង 10:56 AM ដោយ៖ ហេង សុខា
រាជធានីភ្នំពេញ ៖ ទារិកកំសត់ម្នាក់ គ្រាន់តែប្រសូត្រមកនៅប្រឡាក់ឈាមក្រហមរងាលពេញខ្លួន មិនទាន់ទាំងជ្រុះទងសុកផង ត្រូវម្តាយចិត្តអប្រិយយកដាក់ក្នុងវ៉ាលីស រួចច្រកការ៉ុងពណ៌ស យកទៅគ្រវាត់ចោល នៅព្រៃរបោះ នៅចិញ្ចើមផ្លូវ ធ្វើឲ្យប្រជាពលរដ្ឋប្រទះឃើញមានការភ្ញាក់ផ្អើលឆោឡោ នៅវេលាម៉ោង ១និង៤៥ នាទី រសៀលថ្ងៃទី៦ ខែមករា ឆ្នាំ២០១៣ នៅតាមផ្លូវលំ ចូលទៅសួនទឹកសន្តិភាព ក្នុងភូមិមិត្តភាព សង្កាត់ព្រែកឯង ខណ្ឌមានជ័យ ។
បើតាមប្រជាពលរដ្ឋនៅជិតកន្លែងកើតហេតុ បានឲ្យដឹងថា នៅវេលាម៉ោងខាងលើ ប្រទះឃើញមានការ៉ុងពណ៌សមួយនៅថ្មីសន្លាងនៅជិតព្រៃរបោះ តាមចិញ្ចើមផ្លូវបាននាំគ្នាទៅមើល ស្រាប់តែឃើញមានវ៉ាលីសមួយនៅក្នុងការ៉ុងនោះ ក៏នាំគ្នាបើកមើល ស្រាប់តែឃើញទារិកាម្នាក់ ប្រឡាក់ឈាមក្រហមរងាល និងមិនទាន់ជ្រុះទងសុកផង ហាក់ដូចជា ទើបនឹងប្រសូត្រមកថ្មី ប៉ុន្តែបានស្លាប់បាត់បង់ជីវិតទៅហើយ ក៏រាយការណ៍ទៅសមត្ថកិច្ចមូលដ្ឋាន ចូលទៅនាំយកទារិកាដាក់ក្នុងវ៉ាលីសនោះ យកទៅវត្តព្រែកឯង ។
សពទារិកានោះ ត្រូវបានសមត្ថកិច្ចនាំយកទៅពិនិត្យនៅវត្តព្រែកឯង ដោយមានការចូលរួមពីលោកស៊ុំ មុន្នី នាយផ្នែកបច្ចេកទេសខណ្ឌមានជ័យ លោក ឡុង ង៉ែត នាយរដ្ឋបាលសាលាខណ្ឌមានជ័យ លោក នេត សារ៉េន ចៅសង្កាត់ព្រែកឯង លោក ប៊ន វុទ្ធី នាយប៉ុស្តិ៍រដ្ឋបាលនគរបាលព្រែកឯង បានធ្វើការពិនិត្យសពការិកានោះនៅវត្តព្រែកឯង ។ បន្ទាប់ពីធ្វើការពិនិត្យរួច លោកនាយផ្នែកបច្ចេកទេសបានសន្និដ្ឋានថា ទារិកានេះ ទើបស្លាប់មុនពេលប្រទះឃើញប្រមាណ ២ម៉ោងប៉ុណ្ណោះ ហើយសពនេះពេលដែលប្រសូត្រមកមិនទាន់ស្លាប់ទេ ស្លាប់ដោយសារតែច្រកវ៉ាលីសយកមកដាក់ចោលហាលថ្ងៃ ក្តៅ និងថប់ដង្ហើម ទើបស្លាប់បែបនេះ ។
ក្រោយពេលពិនិត្យរួចហើយ សពទារិកបានប្រគល់ទៅលោកចៅសង្កាត់ រៀបចំចាត់ចែងធ្វើពិធីតាមប្រពៃណី ក្នុងនោះលោក ហៀក ចាន់លាង អភិបាលរងខណ្ឌមានជ័យបានជួយឧបត្ថម្ភ ជាទឹកប្រាក់ចំនួន ៥០ដុល្លារ សម្រាប់ចាត់ចែងពិធីបញ្ចុះសពទារិកានោះ នៅក្នុងវត្តព្រែកឯង ឲ្យបានត្រឹមត្រូវតាមប្រពៃណី ៕akt
