- Tuesday, 13 November 2012 09:06
ភ្នំពេញៈ
របាំងផ្លូវចំនួន៦កន្លែងតាមផ្លូវសហព័ន្ធរុស្ស៊ីនឹងត្រូវបិទ
ជាបណ្តោះអាសន្នចាប់ពីថ្ងៃអង្គារ រហូតដល់ថ្ងៃទី២៣វិច្ឆិកា
ដើម្បីសម្រួលឲ្យមានសណ្ដាប់ធ្នាប់
របៀបរៀបរយនិងចរាចរណ៍ដល់ការធ្វើដំណើររបស់គណៈប្រតិភូមក
ចូលរួមកិច្ចប្រជុំកំពូលអាស៊ានលើកទី២១
ដែលប្រទេសកម្ពុជាធ្វើជាម្ចាស់ផ្ទះ
ហើយកងសន្តិសុខជាង១ម៉ឺននាក់នឹងត្រូវដាក់ពង្រាយតាំងពីជាយក្រុង
រហូតដល់ក្នុងទីក្រុង។
ចរាចរណ៍តាមដងមហាវិថីសហព័ន្ធរុស្ស៊ី ជិតមហាវិថីមុនីវង្ស ក្បែរអគារកាណាឌីយ៉ា។ រូបថត ហេង ជីវ័ន
សាលារាជធានីភ្នំពេញបានប្រកាសជូន
ដំណឹងពី ថ្ងៃព្រហស្បតិ៍មុនថា ដើម្បីរក្សានូវសណ្ដាប់ធ្នាប់
របៀបរៀបរយល្អ ការសម្រួលចរាចរណ៍
និងការធានាបានសន្តិសុខដល់ការធ្វើដំណើររបស់គណៈប្រតិភូមកចូល
រួមកិច្ចប្រជុំកំពូលអាស៊ាននេះ សាលារាជធានីនឹងបិទរបាំងចែក
ទ្រូងផ្លូវនៅតាមបណ្ដោយផ្លូវសហព័ន្ធរុស្ស៊ីត្រង់ចំណុចផ្លូវ
ឆ្លងកាត់ចំនួន៦កន្លែង។
លិខិតនេះឲ្យដឹងទៀតថា៖«ផ្លូវឆ្លងកាត់
ទាំង៦
តាមមហាវិថីសហព័ន្ធរុស្ស៊ីនេះនឹងត្រូវបិទច្រកផ្លូវលេខ២១៥
ច្រកផ្លូវចូលវត្តទឹកថ្លា មុខស្ថានីយប្រេងឥន្ធនៈតេលាទឹកថ្លា
ច្រកផ្លូវខាងលិចរោងចក្រទឹកថ្លានិងច្រកចូលផ្សារកាណាឌីយ៉ា
ប្លាហ្សា មុខធនាគារអេស៊ីលីដា និងភោជនីយដ្ឋានពោធិចិនតុង
មុខធនាគារកាណាឌីយ៉ា និងផ្លូវចូលវត្តអង្គតាមិញ»។
តាមលិខិត
ដដែលនេះសម្រាប់ក្រុមអាជីវករលក់ផ្កានិងដើមឈើ
និងរថយន្តនៅតាមដងមហាវិថីសហព័ន្ធរុស្ស៊ី និងមហាវិថីព្រះនរោត្តម
ក៏ត្រូវឲ្យផ្អាកអាជីវកម្មចាប់ពីថ្ងៃទី១៣ ដល់ទី២៣
ខែវិច្ឆិកាផងដែរ។
លិខិតបន្តថា៖
«សាលារាជធានីសង្ឃឹមនិងជឿថា
បងប្អូនប្រជាពលរដ្ឋដែលត្រូវធ្វើដំណើរតាមមហាវិថីសហព័ន្ធ រុស្ស៊ី
និងព្រះនរោត្ដម នឹងយល់អធ្យាស្រ័យ
និងសហការអនុវត្តសេចក្ដីជូនដំណឹងនេះ»។
អ្នកនាំពាក្យ
អគ្គស្នងការនគរបាលជាតិលោក គៀត ច័ន្ទថារិទ្ធ
បានឲ្យដឹងកាលពីម្សិលមិញថា
កងសន្តិសុខជាង១ម៉ឺននាក់នឹងត្រូវដាក់ពង្រាយ
ដើម្បីការពារសន្តិសុខនិងសុវត្ថិភាពជូនដល់គណៈប្រតិភូសម្រាប់
កិច្ចប្រជុំកំពូលអាស៊ានលើកនេះ។
លោកបានថ្លែងថា៖«យើងដាក់
ពង្រាយនគរបាល កងរាជអាវុធហត្ថ កងអង្គរក្ស កងទ័ពជើងគោក ជើងទឹក
ជើងអាកាស ក្រុម CMAC
និងសមត្ថកិច្ចមូលដ្ឋានទាំងថ្ងៃទាំងយប់ដើម្បីការពារសន្តិសុខ»។
លោក ថ្លែងដែរថា
កម្លាំងចម្រុះទាំងនោះនឹងការពារចាប់តាំងពីជាយក្រុងរហូតដល់
ក្នុងទីក្រុង និងនៅតាមសណ្ឋាគារ និងផ្ទះសំណាក់។ លោកបន្តថា៖
«យើងបានដាក់ពង្រាយកម្លាំងខ្លះៗជាច្រើនថ្ងៃមកហើយ
ហើយនឹងបន្ថែមទៀតនៅថ្ងៃទី១៣ វិច្ឆិកា
នៅពេលគណៈប្រតិភូធ្វើដំណើរមក»។
លោកថ្លែងថា៖ «យើងដឹងថា
ចរាចរណ៍នឹងមានការលំបាកបន្តិចដល់បងប្អូន
ដូច្នេះទើបបានជាសាលារាជធានីប្រកាសជូនដំណឹងឲ្យដឹងជាមុន
ដើម្បីឲ្យបងប្អូនជួយសហការនិងមានការយល់អធ្យាស្រ័យ»។
លោក សេង វណ្ណៈ
ប្រធាននាយកដ្ឋាននគរូបនីយកម្មពីដើមខែនេះ បានឲ្យដឹងថា
សាលារាជធានីចំណាយកន្រ្តកផ្កាជាង១២ម៉ឺនដើម្បីតុបតែងសួនច្បារ
នៅខាងមុខអគារវិមានសន្តិភាព៕ ដោយៈ មុំ គន្ធា - ភ្នំពេញប៉ុស្តិ៍