ថ្ងៃទី 05 ខែតុលា ឆ្នាំ2012, ម៉ោង 03:22 AM ឈ ភ
CEN: លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានអំពាវនាវដល់អ្នកកាសែត បង្កើនការចាប់អារម្មណ៍លើអត្ថបទព័ត៌មាន ពាក់ព័ន្ធនឹងជីវភាពប្រចាំថ្ងៃរបស់ប្រជាពលរដ្ឋ កម្ពុជា នោះគឺការធ្វើសេចក្តីរាយការណ៍ ព័ត៌មាន ដែលអាចជឿទុកចិត្តបាន ពាក់ព័ន្ធនឹងការធានារ៉ាប់រងជីវិត។
សេចក្តីអំពាវនាវរបស់ប្រធានក្លឹបអ្នកកាសែតកម្ពុជាខាងលើនេះ បានធ្វើឡើង ក្នុងសិក្ខាសាលា ស្តីពី សារៈប្រយោជន៍ នៃសេវាធានារ៉ាប់រងអាយុជីវិត ដែលបានប្រព្រឹត្តទៅ នៅម៉ោង ៩ ព្រឹក ថ្ងៃទី៥ ខែតុលា ឆ្នាំ២០១២ នៅសណ្ឋាគារ រាហ្វល ឡឺ រ៉ូយ៉ាល់ ក្នុងរាជធានីភ្នំពេញ។
ចំពោះមុខអ្នកកាសែត លោក ប៉ែន សមិទ្ធិ បានលើកឡើងថា កន្លងមក អ្នកកាសែតយើង បានសរសេរសេចក្តីរាយការណ៍ច្រើន ពាក់ព័ន្ធនឹងឧក្រិដ្ឋកម្ម បទល្មើស ឬក៏ករណីរំលោភសេពសន្ថវៈ ជាដើម។ ដូច្នេះចាប់ពីពេលនេះទៅ លោកសូមអំពាវនាវដល់ក្រុមអ្នកកាសែតយើង បង្កើនការយកចិត្តទុកដាក់ ធ្វើសេចក្តីរាយការណ៍ព័ត៌មាន ដោយសុក្រឹត្យពាក់ព័ន្ធនឹងសេវាធានារ៉ាប់រងជីវិត ដែលផ្តល់សារប្រយោជន៍ដល់ប្រជាពលរដ្ឋយើង។
ក្លឹបអ្នកកាសែត កម្ពុជា និងក្រុមហ៊ុនធានារ៉ាប់រងអាយុជីវិត បានសហការរៀបចំ សិក្ខាសាលា សម្រាប់អ្នកសារព័ត៌មាន ស្តីពី "សារៈប្រយោជន៍នៃសេវាធានារ៉ាប់រងអាយុជិវិត"។ សិក្ខាសាលានោះ នឹងណែនាំពីសារៈប្រយោជន៍នៃសេវាធានារ៉ាប់រងអាយុជិវិត ដែលជាផលិតផល និងឧស្សាហកម្មថ្មី ទើបតែចាប់ផ្តើម នៅក្នុងប្រទេសកម្ពុជា ក្នុងឆ្នាំ២០១២នេះ។ សិក្ខាសាលានោះ មានការចូលរួមពីនិពន្ធនាយក និពន្ធនាយករង និងអ្នកសារព័ត៌មាន មកពីគ្រប់ស្ថាប័នកាសែត ទស្សនាវដ្តី ទូរទស្សន៍ និងវិទ្យុ៕akt