ថ្ងៃទី 05 ខែតុលា ឆ្នាំ2012, ម៉ោង 08:18 AM
ក្នុងទិវាគ្រូបង្រៀនពិភពលោក ថ្ងៃ៥តុលានេះ ក្រុមគ្រូបង្រៀនជាង ២០០ នាក់ មកពីតាមបណ្តាខេត្ត រាជធានី ចំនួន ១៦ បានមកប្រមូលផ្តុំនៅសួនប្រជាធិបតេយ្យ នៅជិតសាលារាជធានីភ្នំពេញ ដោយមានលើកបដា ទាមទារដំឡើងប្រាក់ខែផងដែរ។
លោក រ៉ុង ឈុន បានឡើងអានញត្តិរបស់សមាគមគ្រូបង្រៀន ដែលផ្តោតលើបញ្ហា ៩ ចំណុច ដែលរួមមាន៖ ដំឡើងតម្លៃឯកត្តាសន្ទស្សន៍នៃបៀវត្សរ៍មូលដ្ឋនរបស់ មន្ត្រីរាជការស៊ីវិល ( គ្រូបង្រៀន ) ឲ្យបានចំនួន ៦.៧០០ រៀល ក្នុងមួយសន្ទស្សន៍ នៅដើមឆ្នាំ២០១៣, ប្រើប្រាស់ប្រព័ន្ធធនាគារ បើកប្រាក់ជូនគ្រូបង្រៀន និងថវិការបស់សាលារៀន ព្រមទាំងស្នើសុំបង្កើតផ្នែកស៊ើបអង្កេតរបស់អង្គភាពប្រឆាំង អំពើពុករលួយ នៅក្នុងក្រសួងអប់រំ ដើម្បីត្រួតពិនិត្យភាពមិនប្រក្រតីនៃអំពើពុករលួយ ឧទាហរណ៍ ដូចជា សេវាប្រាក់បង់ក្រៅផ្លូវការ ជាដើម។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានលើកឡើងដែរថា ក្រុមគ្រូបង្រៀន ទាមទារឲ្យរដ្ឋាភិបាល រដ្ឋសភា និងស្ថាប័នពាក់ព័ន្ធដោះស្រាយ ជូនដល់គ្រូបង្រៀននូវសំណើមួយចំនួន ដែលរួមមាន៖ ការដំឡើងប្រាក់ខែគ្រូបង្រៀន ១ លានរៀល ស្មើប្រមាណ ២៥០ ដុល្លារ ក្នុងមួយខែ ការដំឡើងប្រាក់អតីតភាពការងារ និងដំឡើងប្រាក់ថែមម៉ោង ជាដើម។
តាមសមាគមគ្រូបង្រៀន ប្រាក់ខែគ្រូបង្រៀនបច្ចុប្បន្ននៅបឋមសិក្សា គឺចាប់ពីចំនួន ២៤០.០០០ រៀល ស្មើប្រមាណ ៦០ ដុល្លារ។ សម្រាប់គ្រូអនុវិទ្យាល័យ មានចំនួន ៣០០.០០០ រៀល ស្មើប្រមាណ ៨០ ដុល្លារ និង ៤៤០.០០០ រៀល ស្មើប្រមាណ ១០០ ទៅ ១១០ ដុល្លារ ក្នុងមួយខែសម្រាប់គ្រូវិទ្យាល័យ។
ទិវាគ្រូបង្រៀនពិភពលោកឆ្នាំនេះ បានប្រារព្ធឡើងលើប្រធានបទ “យើងប្រកាន់ជំហរ ដើម្បីគ្រូបង្រៀន”។ សមាគមគ្រូបង្រៀន សង្ឃឹមថា រដ្ឋសភា រដ្ឋាភិបាល និងក្រសួងអប់រំ ចូលរួមសហការជាមួយអ្នកតំណាងសមាគមគ្រូបង្រៀន ដើម្បីស្វែងរកនូវដំណោះស្រាយ ក្នុងការជួយលើកកម្ពស់គុណភាពអប់រំ ៕akt
