- Saturday, 06 October 2012 10:53
ភ្នំពេញ:
បើទោះបីជាព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ
មិនគង់ប្រថាប់នៅក្នុងមាតុប្រទេសក៏ដោយនៅពេលនេះ ក៏រាជរដ្ឋាភិបាលកម្ពុជា
បានប្រកាស ចាត់តាំងរៀបចំព្រះរាជពិធីបុណ្យចម្រើនព្រះជន្ម
ថ្វាយព្រះអង្គ ក្នុងគម្រប់ព្រះជន្ម ៩០ យាងចូល ៩១ ព្រះវស្សា។
ផែនការណែនាំ
ស្តីពីការចាត់តាំងរៀបចំព្រះរាជពិធីបុណ្យចម្រើនព្រះជន្មថ្វាយ
ព្រះករុណា សម្តេចព្រះ នរោត្តម សីហនុ ត្រូវបានសម្តេចចៅហ្វាវាំង គង់ សំអុល
ប្រធានគណៈកម្មាធិការជាតិរៀបចំបុណ្យជាតិ-អន្តរជាតិ បានចេញជាលិខិត
ចុះហត្ថលេខា កាលថ្ងៃទី១៧ ខែកញ្ញា ឆ្នាំ២០១២។ ផែនការណែនាំនោះ
ត្រូវបានផ្សព្វផ្សាយដល់អ្នកកាសែត នៅថ្ងៃទី៥ ខែតុលា ឆ្នាំ២០១២។
លិខិតបានលើកឡើងថា "ព្រះរាជពិធីបុណ្យចម្រើនព្រះជន្ម គឺជាអាយុវឌ្ឍនមង្គលមួយដ៏ល្អប្រសើរថ្លៃថ្លារបស់ប្រជារាស្ត្រខ្មែរ ដែលប្រារព្ធឡើង ដើម្បីសម្តែងនូវកតញ្ញុតាធម៌ចំពោះព្រះមហាករុណាទិគុណ ថ្វាយព្រះរាជសព្ទសាធុការពរ និងថ្វាយព្រះរាជកុសល ចំពោះព្រះអតីតព្រះមហាក្សត្រ ព្រះករុណា ព្រះបាទសម្តេចព្រះ នរោត្តម សីហនុ ដែលព្រះអង្គជាព្រះអគ្គមគ្គុទ្ទេសក៍ដ៏ឆ្នើម ជាព្រះបិតាឯករាជ្យជាតិ ផ្សះផ្សាជាតិ និងបង្រួបបង្រួមជាតិ ទ្រង់មានព្រះជន្មាយុយឺនយូរ ព្រះរាជសុខមាលភាពល្អបរិបូណ៌ ព្រះកាយពលរឹងមាំ និងព្រះបញ្ញាញាណភ្លឺថ្លា ដើម្បីបានគង់ប្រថាប់ នៅជាម្លប់ដ៏ត្រជាក់របស់ប្រជារាស្ត្រខ្មែរ យូរអង្វែងតរៀងទៅ"។
សេចក្តីណែនាំ ក៏បានបង្ហាញថា "ឆ្នាំនេះ រាជរដ្ឋាភិបាលនៃ ព្រះរាជាណាចក្រកម្ពុជា រួមជាមួយព្រះសង្ឃ ព្រះរាជវង្សានុវង្ស ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ គ្រប់ក្រសួង រដ្ឋលេខាធិការដ្ឋាន ស្ថាប័ន រាជធានី និងគ្រប់ខេត្ត ព្រមទាំងប្រជាពលរដ្ឋទូទាំងប្រទេស នឹងប្រារព្ធព្រះរាជពិធីបុណ្យចម្រើនព្រះជន្មថ្វាយព្រះករុណាព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ ក្នុងរយៈពេល ១ ថ្ងៃ គឺនៅថ្ងៃទី៣១ ខែតុលា តាមប្រពៃណីជាតិ និងប្រពៃណីព្រះពុទ្ធសាសនា"។
នាឱកាសដ៏នក្ខត្តឫក្ស នៃព្រះរាជពិធីបុណ្យចម្រើនព្រះជន្មរបស់ព្រះករុណា សម្តេចព្រះ នរោត្តម សីហនុ គម្រប់ព្រះជន្ម ៩០ យាងចូល ៩១ ព្រះវស្សានេះ គណៈកម្មាធិការជាតិរៀបចំបុណ្យជាតិ-អន្តរជាតិ សូមធ្វើការណែនាំដល់ក្រសួងស្ថាប័នពាក់ព័ន្ធ និងអាជ្ញាធររាជធានី-ខេត្ត ជាដើម ត្រូវចាត់តាំងរៀបចំព្រះរាជពិធី ឲ្យបានសមស្របទៅនឹងប្រពៃណីជាតិ និងប្រពៃណីសាសនា រៀបចំតុបតែងលំអរចនាដោយភ្លើងពណ៌ តាំងព្រះឆាយាល័ក្ខណ៍ព្រះករុណាព្រះមហាវីរក្សត្រ ព្រមទាំងបំផុសប្រជារាស្ត្រ ចូលរួមអបអរសាទរ ដោយដោតទង់ជាតិ ទង់ជ្វាលាគ្រប់គេហដ្ឋាន បដាពាក្យស្លោក ថ្វាយព្រះពរ និងសារលិខិតថ្វាយព្រះពរ ជាដើម។ សិល្បៈកំសាន្ត និងចម្រៀងបុរាណ-សម័យ ក៏ត្រូវអាជ្ញាធរ រៀបចំសំដែងនៅតាមទីសាធារណៈទូទាំងប្រទេសផងដែរ។
គណៈកម្មាធិការជាតិរៀបចំបុណ្យជាតិ-អន្តរជាតិ ក៏បានដាក់ផែនការបែងចែកតាមក្រសួង រដ្ឋលេខាធិការដ្ឋាន មន្ទីរ ស្ថាប័ន អំពាវនាវសប្បុរសជន អង្គការក្រៅរដ្ឋាភិបាល អង្គការ មនុស្សធម៌ ក្រុមហ៊ុនឯកជន ជួយឧបត្ថម្ភសម្ភារៈ ថវិកា គ្រឿងឧបភោគបរិភោគផ្សេងៗ ចុះសួរសុខទុក្ខដល់អ្នកជំងឺកំពុងសម្រាកព្យាបាលនៅតាមមន្ទីរពេទ្យ យុទ្ធជនពិការតាមមណ្ឌលពិការ កុមារកំព្រា ចាស់ព្រឹទ្ធាចារ្យគ្មានទីពឹង ដើម្បីសម្តែងមនោសញ្ចេតនាអាណិតស្រឡាញ់រាប់អាន លើកទឹកចិត្ត និងជួយគ្នាទៅវិញទៅមក។
សូមរម្លឹកថា ក្នុងព្រះរាជពិធីបុណ្យចម្រើនព្រះជន្មព្រះករុណាព្រះបាទសម្តេចព្រះ នរោត្តម សីហនុ កាលពីឆ្នាំមុន ក្នុងគម្រប់ព្រះជន្ម ៨៩ យាងចូល ៩០ ព្រះវស្សា រាជរដ្ឋាភិបាលកម្ពុជា បានរៀបចំប្រារព្ធព្រះរាជពិធីទ្រង់ទ្រាយធំ នៅមុខព្រះបរមរាជវាំង និងបានថ្វាយវេទិកាដល់ព្រះករុណាសម្តេចព្រះ នរោត្តម សីហនុ ឡើងមានព្រះរាជបន្ទូល ដោយផ្សាយបន្តផ្ទាល់តាមកញ្ចក់ទូរទស្សន៍ និងវិទ្យុ ថែមទៀតផង។
កាលណោះ ព្រះករុណាព្រះបាទសម្តេចព្រះ នរោត្តម សីហនុ បានមានព្រះរាជបន្ទូល ដោយបង្ហាញពីព្រះរាជសុខភាព រឹងមាំរបស់ព្រះអង្គ បើទោះបីព្រះអង្គមានព្រះរោគាពាធ ដែលត្រូវការឲ្យក្រុមគ្រូពេទ្យចិន ត្រូវព្យាបាលព្រះអង្គជាប្រចាំក៏ដោយ។
នៅពេលនេះ ព្រះករុណាអតីតព្រះមហាក្សត្រ សម្តេចព្រះ នរោត្តម សីហនុ កំពុងគង់ប្រថាប់ នៅប្រទេសចិន ដើម្បីព្យាបាលព្រះរោគ ដោយព្រះអង្គ បានប្រកាសកាលពីពេលថ្មីនេះថា ព្រះអង្គនឹងគង់នៅប្រទេសចិន ក្នុងពេលប្រារព្ធព្រះរាជពិធីបុណ្យចម្រើនព្រះជន្មព្រះអង្គ នាថ្ងៃទី៣១ ខែតុលា។ ថ្ងៃចម្រើនព្រះជន្មព្រះករុណា សម្តេចព្រះ នរោត្តម សីហនុ ត្រូវបានរាជរដ្ឋាភិបាល កំណត់ជាថ្ងៃបុណ្យជាតិ ដែលតម្រូវឲ្យមន្ត្រីរាជការ និយោជិត កម្មករ និងសិស្សនិស្សិត ជាដើម ត្រូវឈប់សម្រាក៕ ដោយ: លី សិលា (CEN)
លិខិតបានលើកឡើងថា "ព្រះរាជពិធីបុណ្យចម្រើនព្រះជន្ម គឺជាអាយុវឌ្ឍនមង្គលមួយដ៏ល្អប្រសើរថ្លៃថ្លារបស់ប្រជារាស្ត្រខ្មែរ ដែលប្រារព្ធឡើង ដើម្បីសម្តែងនូវកតញ្ញុតាធម៌ចំពោះព្រះមហាករុណាទិគុណ ថ្វាយព្រះរាជសព្ទសាធុការពរ និងថ្វាយព្រះរាជកុសល ចំពោះព្រះអតីតព្រះមហាក្សត្រ ព្រះករុណា ព្រះបាទសម្តេចព្រះ នរោត្តម សីហនុ ដែលព្រះអង្គជាព្រះអគ្គមគ្គុទ្ទេសក៍ដ៏ឆ្នើម ជាព្រះបិតាឯករាជ្យជាតិ ផ្សះផ្សាជាតិ និងបង្រួបបង្រួមជាតិ ទ្រង់មានព្រះជន្មាយុយឺនយូរ ព្រះរាជសុខមាលភាពល្អបរិបូណ៌ ព្រះកាយពលរឹងមាំ និងព្រះបញ្ញាញាណភ្លឺថ្លា ដើម្បីបានគង់ប្រថាប់ នៅជាម្លប់ដ៏ត្រជាក់របស់ប្រជារាស្ត្រខ្មែរ យូរអង្វែងតរៀងទៅ"។
សេចក្តីណែនាំ ក៏បានបង្ហាញថា "ឆ្នាំនេះ រាជរដ្ឋាភិបាលនៃ ព្រះរាជាណាចក្រកម្ពុជា រួមជាមួយព្រះសង្ឃ ព្រះរាជវង្សានុវង្ស ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ គ្រប់ក្រសួង រដ្ឋលេខាធិការដ្ឋាន ស្ថាប័ន រាជធានី និងគ្រប់ខេត្ត ព្រមទាំងប្រជាពលរដ្ឋទូទាំងប្រទេស នឹងប្រារព្ធព្រះរាជពិធីបុណ្យចម្រើនព្រះជន្មថ្វាយព្រះករុណាព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ ក្នុងរយៈពេល ១ ថ្ងៃ គឺនៅថ្ងៃទី៣១ ខែតុលា តាមប្រពៃណីជាតិ និងប្រពៃណីព្រះពុទ្ធសាសនា"។
នាឱកាសដ៏នក្ខត្តឫក្ស នៃព្រះរាជពិធីបុណ្យចម្រើនព្រះជន្មរបស់ព្រះករុណា សម្តេចព្រះ នរោត្តម សីហនុ គម្រប់ព្រះជន្ម ៩០ យាងចូល ៩១ ព្រះវស្សានេះ គណៈកម្មាធិការជាតិរៀបចំបុណ្យជាតិ-អន្តរជាតិ សូមធ្វើការណែនាំដល់ក្រសួងស្ថាប័នពាក់ព័ន្ធ និងអាជ្ញាធររាជធានី-ខេត្ត ជាដើម ត្រូវចាត់តាំងរៀបចំព្រះរាជពិធី ឲ្យបានសមស្របទៅនឹងប្រពៃណីជាតិ និងប្រពៃណីសាសនា រៀបចំតុបតែងលំអរចនាដោយភ្លើងពណ៌ តាំងព្រះឆាយាល័ក្ខណ៍ព្រះករុណាព្រះមហាវីរក្សត្រ ព្រមទាំងបំផុសប្រជារាស្ត្រ ចូលរួមអបអរសាទរ ដោយដោតទង់ជាតិ ទង់ជ្វាលាគ្រប់គេហដ្ឋាន បដាពាក្យស្លោក ថ្វាយព្រះពរ និងសារលិខិតថ្វាយព្រះពរ ជាដើម។ សិល្បៈកំសាន្ត និងចម្រៀងបុរាណ-សម័យ ក៏ត្រូវអាជ្ញាធរ រៀបចំសំដែងនៅតាមទីសាធារណៈទូទាំងប្រទេសផងដែរ។
គណៈកម្មាធិការជាតិរៀបចំបុណ្យជាតិ-អន្តរជាតិ ក៏បានដាក់ផែនការបែងចែកតាមក្រសួង រដ្ឋលេខាធិការដ្ឋាន មន្ទីរ ស្ថាប័ន អំពាវនាវសប្បុរសជន អង្គការក្រៅរដ្ឋាភិបាល អង្គការ មនុស្សធម៌ ក្រុមហ៊ុនឯកជន ជួយឧបត្ថម្ភសម្ភារៈ ថវិកា គ្រឿងឧបភោគបរិភោគផ្សេងៗ ចុះសួរសុខទុក្ខដល់អ្នកជំងឺកំពុងសម្រាកព្យាបាលនៅតាមមន្ទីរពេទ្យ យុទ្ធជនពិការតាមមណ្ឌលពិការ កុមារកំព្រា ចាស់ព្រឹទ្ធាចារ្យគ្មានទីពឹង ដើម្បីសម្តែងមនោសញ្ចេតនាអាណិតស្រឡាញ់រាប់អាន លើកទឹកចិត្ត និងជួយគ្នាទៅវិញទៅមក។
សូមរម្លឹកថា ក្នុងព្រះរាជពិធីបុណ្យចម្រើនព្រះជន្មព្រះករុណាព្រះបាទសម្តេចព្រះ នរោត្តម សីហនុ កាលពីឆ្នាំមុន ក្នុងគម្រប់ព្រះជន្ម ៨៩ យាងចូល ៩០ ព្រះវស្សា រាជរដ្ឋាភិបាលកម្ពុជា បានរៀបចំប្រារព្ធព្រះរាជពិធីទ្រង់ទ្រាយធំ នៅមុខព្រះបរមរាជវាំង និងបានថ្វាយវេទិកាដល់ព្រះករុណាសម្តេចព្រះ នរោត្តម សីហនុ ឡើងមានព្រះរាជបន្ទូល ដោយផ្សាយបន្តផ្ទាល់តាមកញ្ចក់ទូរទស្សន៍ និងវិទ្យុ ថែមទៀតផង។
កាលណោះ ព្រះករុណាព្រះបាទសម្តេចព្រះ នរោត្តម សីហនុ បានមានព្រះរាជបន្ទូល ដោយបង្ហាញពីព្រះរាជសុខភាព រឹងមាំរបស់ព្រះអង្គ បើទោះបីព្រះអង្គមានព្រះរោគាពាធ ដែលត្រូវការឲ្យក្រុមគ្រូពេទ្យចិន ត្រូវព្យាបាលព្រះអង្គជាប្រចាំក៏ដោយ។
នៅពេលនេះ ព្រះករុណាអតីតព្រះមហាក្សត្រ សម្តេចព្រះ នរោត្តម សីហនុ កំពុងគង់ប្រថាប់ នៅប្រទេសចិន ដើម្បីព្យាបាលព្រះរោគ ដោយព្រះអង្គ បានប្រកាសកាលពីពេលថ្មីនេះថា ព្រះអង្គនឹងគង់នៅប្រទេសចិន ក្នុងពេលប្រារព្ធព្រះរាជពិធីបុណ្យចម្រើនព្រះជន្មព្រះអង្គ នាថ្ងៃទី៣១ ខែតុលា។ ថ្ងៃចម្រើនព្រះជន្មព្រះករុណា សម្តេចព្រះ នរោត្តម សីហនុ ត្រូវបានរាជរដ្ឋាភិបាល កំណត់ជាថ្ងៃបុណ្យជាតិ ដែលតម្រូវឲ្យមន្ត្រីរាជការ និយោជិត កម្មករ និងសិស្សនិស្សិត ជាដើម ត្រូវឈប់សម្រាក៕ ដោយ: លី សិលា (CEN)