ភ្នំពេញ: សម្តេចនាយករដ្ឋមន្ត្រី ហ៊ុន សែន បានបញ្ចេញប្រតិកម្មជាលើកដំបូង មិនចេញឈ្មោះ តែត្រូវបានគេយល់ថា សំដៅលើករណីរបស់លោកម៉ម សូណង់ដូ ថាដើម្បីរួចពីទោសទណ្ឌ ត្រូវបង្កើតអង្គការក្រៅរដ្ឋាភិបាល ឬក៏ធ្វើអ្នកកាសែត ឬធ្វើបក្សនយោបាយព្រោះបើយើងចាប់គេដាក់គុក អានឹង គេថា បិទសិទ្ធិគេ ។
នាព្រឹកថ្ងៃទី១០ ខែតុលា ឆ្នាំ២០១២ ក្នុងពិធីចែកប័ណ្ណកម្មសិទ្ធិដីធ្លី ដល់ប្រជាពលរដ្ឋ នៅខេត្តកំពត សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "ដើម្បីរួចពីទោសទណ្ឌ ត្រូវបង្កើតអង្គការក្រៅរដ្ឋាភិបាល ឬក៏ធ្វើអ្នកកាសែត ឬធ្វើបក្សនយោបាយ។ អានឹង ទោះបីទៅលួចគេ ទៅវ៉ៃគេបែកក្បាល ក៏អត់មានរឿងដែរ ព្រោះបើយើងចាប់គេដាក់គុក អានឹង គេថា បិទសិទ្ធិគេ។ ដូចអាការកាត់ទោសកន្លងទៅ គេមិនមែនបិទវិទ្យុឯណា? គេកាត់អារឿងបំផុសបំផុល ប្រឆាំងអាជ្ញាធរសាធារណៈនោះតើ!។ អីចឹងបើចង់រួចទោសទណ្ឌ ឧបមាថា អញចង់មិនស្រួលហើយ ទៅបង្កើតអង្គការក្រៅរដ្ឋាភិបាលមួយទៅ ដល់យើងចាប់មកផ្តន្ទាទោស អានឹង ឆាប់រួចខ្លួន"។ សម្តេចបញ្ជាក់ថា ការផ្តន្ទាទោសជនល្មើសច្បាប់នោះ គឺមិនគិតពីគណបក្សនយោបាយ អង្គការសង្គមស៊ីវិល ឬក៏មន្ត្រីប៉ូលិសទាហានប៉េអឹម ផ្កាយប៉ុន្មានទេ។
សម្តេចនាយករដ្ឋមន្ត្រី បាន បញ្ជាក់ថា " នែ៎វ៊ើយ! និយាយឲ្យច្បាស់ អ្នកឯងបក្សនយោបាយ ឬក៏ស្អី ខ្ញុំអត់ដឹងទេ តែធើខុសច្បាប់ គុកដូចតែគ្នាហ្នឹង!។ មិនថា បក្សនយោបាយ មិនថា អង្គការក្រៅរដ្ឋាភិបាល មិនថា នរណាទេ សូម្បីតែមន្ត្រីទាហានផ្កាយពីរ ផ្កាយបី ទាហានប៉ូលិសប៉េអឹម ក៏ជាប់ទោស ដូចតែគ្នានឹង"៕by agkor thom