ថ្ងៃទី 15 ខែតុលា ឆ្នាំ2012, ម៉ោង 06:19 AM ស៊ុនហ្វាន
សម្តេចព្រះនរោត្តម សីហនុ អតីតព្រះមហាក្សត្រកម្ពុជាសម្តេចព្រះនរោត្តម សីហនុ អតីតព្រះមហាក្សត្រកម្ពុជា និងមេដឹកនាំនយោបាយដ៏មានឥទ្ធិពល នៅកម្ពុជាបានសោយទីវង្គត នៅមន្ទីរពេទ្យមួយក្នុងទីក្រុងប៉េកាំង នៅវេលាម៉ោង១ និង២0នាទី ឈានចូលថ្ងៃទី១៥ តុលា ២០១២ បន្ទាប់ពីយាងទៅសម្រាកព្យាបាលព្រះរោគនៅទីនោះ។
ដំណឹងដ៏ក្រៀមក្រំនេះ ត្រូវបានផ្សព្វផ្សាយតាមរយៈទូរទស្សន៍ជាតិកម្ពុជា។ សេចក្តីជូនដំណឹងនេះ បានឲ្យដឹងថា ព្រះសព នឹងត្រូវដង្ហែមកកាន់រាជធានីភ្នំពេញ ដើម្បីប្រារព្ធព្រះរាជពិធីបុណ្យសព នៅព្រះបរមរាជវាំង។
បើតាមទីភ្នាក់ងារព័ត៌មានចិនស៊ីនហួរ បានស្រង់សម្តីលោកឧបនាយករដ្ឋមន្ត្រីចិន ថា សម្តេចព្រះនរោត្តមសីហនុ បានចូលទីវង្គត នៅក្រុងប៉េកាំង នៅវេលាម៉ោង ២និង០០នាទី (ម៉ោងនៅក្រុងប៉េកាំង ស្មើនឹងម៉ោង១ និង២០នាទី ម៉ោងនៅកម្ពុជា) ។
សម្តេចព្រះនរោត្តមសីហនុ បានឡើងសោយរាជ្យនៅឆ្នាំ១៩៤១ និង បានដឹកនាំប្រទេសកម្ពុជា ទទួលបានឯករាជ្យពីបារាំងនៅឆ្នាំ១៩៥៣។ ប៉ុន្តែព្រះអង្គបាន បរាជ័យក្នុង ការ ដឹកនាំប្រទេសចៀសផុតពីសង្គ្រាមត្រជាក់ នៅអាស៊ីអាគ្នេយ៍ ក្នុងអំឡុងទសវត្សឆ្នាំ១៩៧០ រហូតដល់ពួកខ្មែរក្រហមឡើងកាន់អំណាច។ ក្រោយមក ព្រះអង្គបានរស់នៅនិរទេសមួយរយៈពេល រហូតដល់ត្រូវបានជ្រើសរើសជាព្រះមហាក្សត្រម្តងទៀត នៅឆ្នាំ១៩៩៣។ ព្រះអង្គបានដាក់រាជ្យនៅឆ្នាំ២០០៤ ដោយហេតុផលព្រះសុខភាពទន់ខ្យោយ មានព្រះរោគ និងតែងតែទៅសម្រាកព្យាបាលព្រះរោគមហារីក ទឹកនោមផ្អែម និងលើសឈាម ជាញឹកញាប់នៅក្រុងប៉េកាំង។
ប្រជាជនកម្ពុជា បានសម្តែងការសោកស្តាយ និងក្រៀមក្រំ ចំពោះការបាត់បង់មេដឹកនាំដ៏ឆ្នើម ដែលតែងតែលះបង់ព្រះកាយពល ដើម្បីបម្រើមាតុភូមិកម្ពុជា និងសូមឲ្យព្រះវិញ្ញាណក្ខ័ន្ធព្រះអង្គ យាងទៅកាន់សុគតិភព ៕akt
