(ថ្ងៃទី 14 ខែកញ្ញា ឆ្នាំ2012, ម៉ោង 03:44 PM ដោយ ៖ ចាន់ សុខលន់
បើតាមលោកសៅ ប៊ុន អធិការស្រុកម៉ាឡៃ បានឲ្យដឹងថា ការតាមចាប់ខ្លួននេះ ធ្វើឡើង ក្រោយពីមានពាក្យបណ្តឹងពីឈ្មោះ កុយ សាមុត ភេទប្រុស អាយុ៣៥ ឆ្នាំ ជាអាជីវករលកចាប់ហួយ ដែលមានទីលំនៅ នៅភូមិភ្នំរូង ឃុំ បឹងបេង ស្រុកម៉ាឡៃ ដែលបានចោទប្រកាន់បុរសម្នាក់ ឈ្មោះ ឆន ទិត្យ អាយុ៤៦ ឆ្នាំ មានទីស្នាក់នៅផ្ទះជួល នៅប៉ោយប៉ែត និងស្ត្រីម្នាក់ឈ្មោះនួន ស៊ីថា ហៅនួយន មួយ អាយុ៤៣ ឆ្នាំ ស្នាក់នៅភូមិគីឡូម៉ែត្រ លេខ៤ សង្កាត់ផ្សារកណ្តាល ក្រុងប៉ោយប៉ែត ពីបទចាយវាយប្រាក់ក្លែងក្លាយ។
លោកអធិការបានបន្តទៀតថា កុយ សាមុត បានអះអាងថា ជនសង្ស័យទាំងពីរនេះ តែងតែយកប្រាក់មកដូរនៅហាងរបស់គាត់ ម្តង១.០០០ បាត ប៉ុន្តែលើកនេះ គាត់សង្ស័យ ក៏ពិនិត្យប្រាក់នេះ ដឹងថាជាប្រាក់ក្លែងក្លាយ ក៏ប្តឹងសមត្ថកិច្ចឲ្យចាប់ខ្លួនតែម្តង។ ក្រោយពីទទួលបានពាក្យបណ្តឹង លោកបានដឹកនាំកម្លាំង តាមចាប់ខ្លួនជនសង្ស័យ ដោយសហការជាមួយប៉ុស្តិ៍រដ្ឋបាលឃុំអូរសំព័រ និងទួលពង្រ រហូតដល់ប្រទះឃើញជនសង្ស័យ កំពុងជិះម៉ូតូ ដោយឈ្មោះ ឆន ទិត្យ ជាអ្នកបើកម៉ូតូសេ១២៥ ស៊េរី២០០៨ ឡើងស៊េរី២០១១ ពាក់ស្លាកលេខ សៀមរាប 1G 7941។ ពេលឃើញសមត្ថកិច្ច ជនសង្ស័យ ហាក់ដូចជាដឹងខ្លួនមុន ក៍បើកម៉ូតូ បំបុកបារ៉ាស ហើយជិះរត់គេចខ្លួន មកសម្ងំលាក់ខ្លួនក្នុ្ងងព្រៃ នៅក្រោយវត្តពោធិ៍រតនសាមគ្គី ។
ប្រភពដដែលបានបន្តទៀតថា សមត្ថកិច្ចបានតាមរុករកអស់រយៈពេលជាច្រើនម៉ោង ទើបចាប់ខ្លួនជនសង្ស័យបាន នៅវេលាម៉ោង១២ និង៤៥នាទី។ ក្រោយការចាប់ខ្លួន សមត្ថកិច្ចប៉ុស្តិ៍រដ្ឋបាលមូលដ្ឋាន មិនបានឆែកឆេររកប្រាក់ក្លែងក្លាយទេ ប៉ុន្តែជនសង្ស័យទាំងពីរ បានសារភាពថា ពិតជាបានចាយវាយប្រាក់ក្លែងក្លាយមែន ហើយប្រាក់មួយចំនួន ដែលនៅសល់ ខ្លួនបានបោះចោលអស់ហើយ។
ជនសង្ស័យ ត្រូវបានបញ្ជូនទៅកាន់អធិការដ្ឋាន ស្រុកម៉ាឡៃ ដើម្បីកសាងសំណុំរឿង បញ្ជូនទៅតុលាការតាមនីតិវិធី។
លោកអធិការបានឲ្យដឹងបន្ថែមទៀតថា មកទល់ពេលនេះ មានអាជីវករ២នាក់ ហើយ ដែលបានមកប្តឹងសមត្ថកិច្ច ដែលក្នុងការចាយវាយម្តងៗ ជាក្រដាសប្រាក់១.០០០ បាត ។ លោករំពឹងថា នឹងមានអាជីវករជាច្រើនទៀត ដែលរងគ្រោះ ដោយការចាយវាយប្រាក់ក្លែងក្លាយ របស់ជនសង្ស័យទាំងពីរ ។ ខណៈដែលពេលសមត្ថកិច្ចឆែកឆរ នៅអធិការដ្ឋាន គេមិនបានរកឃើញភស្តុតាងអ្វីពីជនសង្ស័យទេ៕Agkor thom
