ថ្ងៃទី 10 ខែសីហា ឆ្នាំ2012, ម៉ោង 08:36 AM ឈ ភ
ភ្នំពេញ:នៅថ្ងៃទី១០ ខែសីហា ឆ្នាំ២០១២ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្ដីប្រកាសព័ត៌មាន អំពីភាពមិនប្រក្រតី ស្ដីពីការអនុវត្តគម្រោងសម្បទានដីសង្គមកិច្ច សម្រាប់កងកម្លាំងប្រដាប់អាវុធ និងគ្រួសារ និងការព្យួរការងាររបស់ប្រធាននាយកដ្ឋានផែនការសេដ្ឋកិច្ច
និងហិរញ្ញវត្ថុរបស់ក្រសួងដើម្បីបំភ្លឺចំពោះការផ្សព្វផ្សាយព័ត៌មានពាក់ព័ន្ធនឹងការចាប់ខ្លួនមន្ត្រីចំនួន ៤រូប ។
សេចក្តីប្រកាសព័ត៌មាន បានឲ្យដឹងថា ក្រសួងសូមជម្រាបជូនសាធារណជន ឲ្យបានជ្រាបថា៖
- ក្រោយពីបានទទួលព័ត៌មានអំពីភាពមិនប្រក្រតី ស្ដីពីការអនុវត្តគម្រោងសម្បទានដីសង្គមកិច្ច សម្រាប់អតីកងកម្លាំងប្រដាប់អាវុធ និងគ្រួសារ ដែលបានចុះផ្សាយនៅក្នុងសារព័ត៌មានរស្មីកម្ពុជា លេខចេញផ្សាយថ្ងៃទី១៤ ខែមិថុនា ឆ្នាំ២០១២ ក្រសួងបានបង្កើតគណៈកម្មការមួយ ចុះទៅពិនិត្យស្ថានភាព លទ្ធផលសម្រេចជាក់ស្ដែង នៃគម្រោង។
-បន្ទាប់មក ក្រសួងបានព្យួរការងាររបស់លោក ផូរ វុឌ្ឍី ប្រធាននាយកដ្ឋានផែនការសេដ្ឋកិច្ច និងហិរញ្ញវត្ថុរបស់ក្រសួង នៅថ្ងៃទី១៩ ខែមិថុនា ឆ្នាំ២០១២ ដើម្បីឲ្យគណៈកម្មការសវនកម្មរបស់ក្រសួងធ្វើអធិការកិច្ចដោយចំហ និងមានកិច្ចសហការជាមួយអង្គភាពប្រឆាំងអំពើពុករលួយ ដើម្បីចាត់ការតាមនីតិវិធី។
សេចក្តីប្រកាសបានកត់សម្គាល់ថា ជាលទ្ធផល មកដល់ពេលនេះ មន្ត្រីរបស់ក្រសួងចំនួន ៤រូប ដែលជាប់ការសង្ស័យ បានត្រូវអង្គភាពប្រឆាំងអំពើពុករលួយបញ្ជូនទៅតុលាការ ដើម្បីបន្តការស្រាវជ្រាវ និងសម្រេចតាមនីតិវិធីនៃច្បាប់។
សូមជម្រាបថា មន្ត្រីទាំង ៤នាក់នោះ មានឈ្មោះ សារ៉េត បូរ៉ាមី អគ្គនាយករងក្រសួងរៀបចំដែនដី នគរូបនីយកម្ម និងសំណង់, ឈ្មោះ ផូរ វុឌ្ឍី ប្រធាននាយកដ្ឋានផែនការសេដ្ឋកិច្ច និងហិរញ្ញវត្ថុ, ឈ្មោះ មាស ឥស្សរ៉ា អនុប្រធាននាយកដ្ឋាន និងឈ្មោះ ទុយ ឡាយរិទ្ធី ជាមន្ត្រីបម្រើការនៅក្រសួងរៀបចំដែនដី នគរូបនីយកម្ម និងសំណង់។ មន្ត្រីសង្ស័យទាំង ៤រូបនោះ បានត្រូវលោក សុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ពីបទពុករលួយ ដោយយោងតាមមាត្រា៣២ នៃច្បាប់ប្រឆាំងអំពីពុករលួយ មាត្រា៥៩៧ និង៥៩៨ នៃក្រមព្រហ្មទណ្ឌ ដែលចែងអំពីការកេងយកផលប្រយោជន៍ដោយខុសច្បាប់ និងសម្រេចឃុំខ្លួនបណ្ដោះអាសន្ន កាលពីរសៀលថ្ងៃទី៩ ខែសីហា ឆ្នាំ២០១២៕Agkor thom