ថ្ងៃទី 10 ខែសីហា ឆ្នាំ2012, ម៉ោង 09:16 AM ឈ ភ
ភ្នំពេញ: ថ្ងៃទី១០ ខែសីហា ឆ្នាំ២០១២ នេះសភាជាតិ បានពិភាក្សា និងអនុម័តលើសេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀង រវាងរាជរដ្ឋាភិបាលកម្ពុជា ជាមួយរដ្ឋាភិបាលនៃប្រទេស កាតា ស្តីពី កាគ្រប់គ្រង ការប្រើប្រាស់ ហត្ថពលកម្មនៅ រដ្ឋកាតា
ដោយមានសំឡេងអនុម័តជាឯកច្ឆន្ទ ចំនួន ៩៧ លើ ៩៧ សំឡេង។
បន្ទាប់ពីរដ្ឋសភា បញ្ចប់ការពិភាក្សា អនុម័តសេចក្តីព្រាងច្បាប់នេះមក លោក វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ដល់ក្រុមអ្នករាយការណ៍ព័ត៌មាន ថា ការបញ្ជូនពលករកម្ពុជា ទៅធ្វើការនៅប្រទេសកាតា មិនមែនជារឿងសាមញ្ញពេកទេ ប៉ុន្តែជាគោលការណ៍ប្រមុខរាជរដ្ឋាភិបាល នៃប្រទេសទាំងពីរ បានឯកភាពគ្នាជាគោលការណ៍រួចហើយ ដែលមិនមែនជារឿងហ្នឹងមួយទេ គឺមានកិច្ចសហប្រតិបត្តិជាមួយគ្នាជាច្រើនទៀត តែក្នុងហ្នឹង មានវិស័យហត្ថពលកម្មមួយដែរហើយ រដ្ឋាភិបាលទាំងពីរបានប្រគល់ឲ្យផ្នែកជំនាញធ្វើការជាមួយគ្នា ដើម្បីបង្កើតកិច្ចសហប្រតិបត្តិការ ទទួលយកពលករកម្ពុជាស្របច្បាប់ ទៅធ្វើនៅប្រទេស កាតា នៅពេលខាងមុខ។
លោករដ្ឋមន្ត្រី បានបន្តទៀតថា ស្ថានភាពអាកាសធាតុ និងទំនៀមទំលាប់ នៅប្រទេសកាតា ខុសពីប្រទេសកម្ពុជាច្រើន ហើយប្រាក់ឈ្នួល នៅប្រទេសកាតា បើប្រៀបជាមួយប្រទេសជិតខាង គឺមានតម្លៃខ្ពស់ សម្រាប់ពលករ ដែលមានជំនាញបច្ចេកទេសច្បាស់លាស់ តែបើអ្នកគ្មានជំនាញ គឺប្រាក់ឈ្នួល មិនលើសពីប្រទេសជិតខាងកម្ពុជាយើងទេ ប៉ុន្តែអ្នកដែលមានប្រាក់ខែខ្ពស់រាប់ពាន់ដុល្លារ សម្រាប់អ្នកមានជំនាញច្បាស់លាស់។
លោករដ្ឋមន្ត្រី វង សូត បានមានប្រសាសន៍បញ្ជាក់បន្តទៀតថា អនស្សារណៈយោគយល់គ្នា លោកបានចុះហត្ថលេខាតាំងពីឆ្នាំ២០១១ រួមមកហើយ ប៉ុន្តែប្រទេសនៅពិភពអារ៉ាប់តម្រូវឲ្យមានការផ្តល់សច្ចាប័នពី ស្ថាប័ននីតិបញ្ញត្តិ ទើបកិច្ចព្រមព្រៀមនោះចូលជាធរមាន។
លោក រដ្ឋមន្ត្រី បានមានប្រសាសន៍ឲ្យដឹងថា ការបញ្ជូនពលករទៅប្រទេកាតា គឺត្រូវបញ្ជូន តាមរយៈក្រុមហ៊ុនទីភ្នាក់ងារឯកជន ដែលបញ្ជូនពលកររវាងប្រទេសកម្ពុជាជាមួយទីភ្នាក់ងារឯកជន នៃប្រទេសកាតា ដែលហៅថា សមាគមបញ្ជូនពលករ ទៅធ្វើការងារនៅក្រៅប្រទេស ដោយអនុវត្តតាមអនុក្រឹតលេខ៩០ របស់រាជរដ្ឋាភិបាលកម្ពុជា។
លោករដ្ឋមន្ត្រី បានមានប្រសាសន៍ទៀតថា ប្រទេកាតា ត្រូវការកំលាំងពលកម្មកម្ពុជាច្រើន ពីព្រោះប្រទេសនេះ មានឧស្សាហកម្មប្រេង រីកចំរើនធំ និងឧស្សាហកម្មផ្សេងទៀត ក៏មានការរីកចំរើនដែរ ហើយប្រជាពលរដ្ឋ ប្រទេសកាតា មានចំណូលប្រចាំឆ្នាំ ក្នុងម្នាក់ៗ ចំនួនជាង ១០ ម៉ឺនដុល្លារសហរដ្ឋអាមេរិក៕Agkor thom