(ដោយ៖អ៊ិនសាមិត្តប៉ោយប៉ែត)៖ជនបង្កហិង្សា៣នាក់ត្រូវកម្លាំងកងរាជអាវុធហត្ថក្រុងប៉ោយប៉ែត ឃាត់ខ្លួនពីបទប្រព្រឹត្ដអំពើហិង្សាដោយចេតនា កាលពីថ្ងៃទី៥ ខែសីហា ឆ្នាំ២០១២ វេលាម៉ោង១០និង៣០នាទីយប់ បន្ទាប់ពីម្ចាស់ហាងខារ៉ាអូខេមួយកន្លែង ស្ថិតនៅមុខសាលារៀនចិន ក្នុងភូមិគីឡូម៉ែត្រលេខ៤ សង្កាត់កណ្ដាល ក្រុងបោយប៉ែតប្ដឹងឱ្យជួយធ្វើអន្ដរាគមន៍ ។
មេបញ្ជាការកងរាជអាវុធហត្ថក្រុង ប៉ោយប៉ែតលោក ហម ម៉ុត បានឱ្យដឹងថា ជនប្រើហិង្សាបង្កឱ្យខូចខាតទ្រព្យសម្បត្ដិ ក្នុងហាងខារ៉ាអូខេ ហើយត្រូវបានសមត្ថ កិច្ចឃាត់ខ្លួនទី១-ឈ្មោះ យង់ រិទ្ធី អាយុ ១៨ឆ្នាំ, ទី២-ឈ្មោះ ឈួន ចន្ធី អាយុ២០ ឆ្នាំ និងទី៣-ឈ្មោះ គួន រី អាយុ៣០ឆ្នាំ អ្នកទាំង៣ជាកម្មករសំណង់រស់នៅភូមិ-សង្កាត់-ក្រុង កើតហេតុខាងលើ ។
ម្ចាស់ហាងខារ៉ាអូខេឈ្មោះ ស្រីម៉ី អាយុ២២ឆ្នាំ បានឱ្យដឹងថា នៅមុនពេល មានអំពើហិង្សាកើតឡើង បុរសឈ្មោះ គួន រី បានចូលមកផឹកស៊ីនៅក្នុងហាង ខារ៉ាអូខេរបស់គាត់ដោយមានគ្នាទាំងអស់៥នាក់ ទាំងឈ្មោះ គួន រី នេះផងដែរ។ ម្ចាស់ហាងបានបន្ដថា ក្រោយពីឈ្មោះ គួន រី គិត លុយរួចក៏បានដើរចេញទៅក្រៅ ហើយក្រោយមកក៏ឃើញឈ្មោះ យង់ រិទ្ធី និង ឈ្មោះ ឈួន ចន្ធី វិលត្រឡប់ មកហាងរបស់គាត់ រួចឈានដល់កើត អំពើ ហិង្សាជាមួយនឹងបក្ខពួករបស់ខ្លួន ដែលកំពុងអង្គុយផឹកបន្ដ ។ ឃើញដូច្នេះ គាត់ក៏បានរត់ទៅប្ដឹងសមត្ថកិច្ចឱ្យចាប់ ខ្លួនតែម្ដង ។ជនប្រើហិង្សាធ្វើឱ្យខូចខាតទ្រព្យសម្បត្ដិ ក្នុងហាងខារ៉ាអូខេឈ្មោះ គួន រី បានអះអាងថា មូលហេតុដែលនាំឱ្យគេខឹងនិង ទៅហៅឈ្មោះ យង់ រិទ្ធី និងឈ្មោះ ឈួន ចន្ធី មកវាយទៅលើមនុស្ស៤នាក់ទៀតនោះ ព្រោះតែខឹងនឹងពួកគេនេះផឹកស៊ីទាំងអស់គ្នា ហើយឱ្យគេចេញលុយតែ ម្នាក់ឯង ។
ច្រានចោលនឹងពាក្យចោទប្រកាន់ របស់ជនប្រើ ហិង្សាឈ្មោះ គួន រី ជនរងគ្រោះដែលត្រូវ គួន រី, យង់ រិទ្ធី និងឈួន ចន្ធី លើកគ្នាមកវាយពួកខ្លួន នោះបានអះអាងថា ការលើកឡើង របស់ឈ្មោះ គួន រី គឺពុំពិតទេ តែតាម ការពិតពួកគេឱ្យឈ្មោះ គួន រី ចេញ លុយមុនទៅ ហើយចាំពេលចេញទៅ ក្រៅហាងទើបពួកគេរៃអង្គាសគ្នាឱ្យវិញ ព្រោះវាអស់តែ៨ម៉ឺនរៀល និងជា ទម្លាប់មិនចង់ឱ្យខ្មាសម្ចាស់ហាង តែមិន ដឹងថា ឈ្មោះ គួន រី គិតបែបណាក៏ទៅ បបួលបក្ខពួកមកវាយពួកខ្លួនបែបនេះ។
គួរបញ្ជាក់ថា នៅពេលកំពុងកើត ហិង្សាវាយតប់គ្នា និងស្របពេលម្ចាស់ ហាងខារ៉ាអូខេរត់ទៅប្ដឹងសមត្ថកិច្ចកង រាជអាវុធហត្ថ ហើយពេលសមត្ថកិច្ច មកដល់បានឆែករកឃើញកាំបិតប៉័ង តោមួយផងដែរនៅនឹងដៃជនប្រើហិង្សា។
លោក ហម ម៉ុត បានឱ្យដឹងថា យោងតាមបណ្ដឹងម្ចាស់ហាងខារ៉ាអូខេ និងយោងតាមវត្ថុតាងកាំបិតប៉័ងតោ ជនសង្ស័យប្រើហិង្សាទាំង៣ត្រូវបានបញ្ជូន ទៅទីបញ្ជាការកងរាជអាវុធហត្ថខេត្ដ ដើម្បីចាត់ការបន្ដ ។
ចំពោះមនុស្ស៤នាក់ដែលផឹកស៊ីដំបូងជាមួយនឹងជនសង្ស័យឈ្មោះ គួន រី សមត្ថកិច្ចមិនបានឃាត់ខ្លួនទេ ព្រោះ ពួកគេជាជនរងគ្រោះ និងមិនបានបង្ក សកម្មភាពនៅក្នុងហាងខារ៉ាអូខេមួយនេះឡើយ៕