ថ្ងៃទី 09 ខែសីហា ឆ្នាំ2012, ម៉ោង 09:59 AM ហេង សុខា
រាជធានីភ្នំពេញ ៖ នារីម្នាក់ ត្រូវរថយន្តដឹកខ្សាច់កិនបែកក្បាលស្លាប់ នៅនឹងកន្លែងកើតហេតុ ខណៈពេលជិះម៉ូតូ ទាក់ដៃចង្កូតជាមួយម៉ូតូមួយគ្រឿងទៀត បណ្តាលឲ្យដួលចូលក្រោមរថយន្ត ។
ហេតុការណ៍អកុសលនេះ កើតឡើងនៅវេលាម៉ោង៥ និង៤០ នាទីល្ងាចថ្ងៃទី៨ សីហា តាមផ្លូវលេខ២១៧ ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ ។
សាក្សីឃើញហេតុការណ៍ បានឲ្យដឹថា មុនពេលកើតហេតុម៉ូតូមីអូ ពណ៌លឿងលាយខ្មៅ បើកបរដោយនាម្នាក់ តាមផ្លូវលេខ២១៧ ពីត្បូងទៅជើង ស្របទិសគ្នាជាមួយរថយន្តកាម៉ាស់ដឹកខ្សាច់ ពណ៌កណ្តុរប្រមេះ ខណៈមកដល់ចំណុចខាងលើ ម៉ូតូមីអូ ទាក់ដៃចង្កូតជាមួយម៉ូតូ មួយគ្រឿងទៀត ជិះទន្ទឹមគ្នា បណ្តាលឲ្យមីអូដួលខ្ទាតចូលក្រោមរថយន្តទាំងមនុស្ស និងម៉ូតូ ដោយចូលកង់ក្រោយរថយន្ត ហើយរថយន្តអត់ដឹងបើកទៅមុខទៀត បណ្តាលឲ្យកិនបែកក្បាលខ្ទេចស្លាប់បាត់បង់ជីវិត នៅកន្លែងកើតហេតុ ។
ចំណែកម៉ូតូមួយគ្រឿងទៀត ដែលទាក់ដៃចង្កូតគ្នាជាមួយម៉ូតូស្រ្តី រងគ្រោះមិនបានដួលទេ បានជិះទៅមុខបាត់ទៅ ។ រថយន្តបង្កហេតុត្រូវសមត្ថកិច្ចឃាត់បាននៅកន្លែងកើតហេតុ ចំណែកតៃកុងរថយន្តរត់គេចខ្លួនបាត់ ។ នារីស្លាប់បាត់បង់ជីវិតមានឈ្មោះ អ៊ឹម ចន្ធូ អាយុ២៤ឆ្នាំ មានស្រុកកំណើតនៅស្រុកសំរោង ខេត្តតាកែវ ។
សពត្រូវសាច់ញាតិដឹកយកទៅស្រុកកំណើតធ្វើបុណ្យតាមប្រពៃណី ចំណែកម៉ូតូខូចខាតផ្នែកខាងមុខ និងរថយន្តត្រូវប៉ូលិស យកទៅរក្សាទុកនៅការិយាល័យចរាចរណ៍ផ្លូវគោក រង់ចាំធ្វើការដោះស្រាយតាមនីតិវិធីច្បាប់ ៕Agkor thom
