ដោយ ហង្ស សាវយុត(អាស៊ិសេរី)
2012-08-04
អាជ្ញាធរព្រំដែនខេត្តស៊ីសាកេត របស់ថៃ ដែលប្រចាំការនៅទល់មុខច្រកទ្វារព្រំដែនជាំសាង៉ាំ នៃស្រុកអន្លង់វែង ខេត្តឧត្តរមានជ័យ តែងតែរារាំងអាជ្ញាធរព្រំដែនកម្ពុជា មិនឱ្យធ្វើការសាងសង់ប៉ុស្តិ៍ស្នាក់ការព្រំដែននៅជាប់ផ្លូវកៅស៊ូ ដែលជាទីតាំងច្រកទ្វារថ្មី។
ច្រកទ្វាព្រំដែនឈ្មោះជាំស្រង៉ាំ ស្រុកអន្លង់វែង ខេត្តឧត្ដរមានជ័យ។ រូបថតមើលពីខាងប្រទេសកម្ពុជា ថ្ងៃទី ២៥ កុម្ភៈ ២០១២។
ការរារាំងនេះ ដោយសារ តែអាជ្ញាធរថៃ បានចាត់ទុកតំបន់ដែលអាជ្ញាធរព្រំដែនកម្ពុជាបម្រុងសាងសង់ប៉ុស្តិ៍ ស្នាក់ការនោះថា គឺជាតំបន់ព្រំដែន ដែលមិនទាន់ដាច់ស្រេចជារបស់ប្រទេសណាមួយនៅឡើយ។
មន្ត្រីកម្ពុជាបានឱ្យដឹងថា អាជ្ញាធរចម្រុះប្រចាំច្រកទ្វារព្រំដែនជាំសាង៉ាំ ជាច្រើនអង្គភាព កំពុងជួបការលំបាក ដោយសារតែមិនមានការិយាល័យធ្វើការងារជាច្រើនខែមកហើយ។
ការគ្មានការិយាល័យធ្វើការនេះ បន្ទាប់ពីមានការផ្លាស់ប្ដូរទីតាំងច្រកទ្វារព្រំដែនជាំសាង៉ាំ ពីកន្លែងចាស់ទៅនៅម្តុំច្រកទ្វារផ្លូវកៅស៊ូ ក៏ប៉ុន្តែ កងកម្លាំងការពារព្រំដែននៃស្រុកភូស៊ីង ខេត្តស៊ីសាកេត របស់ថៃ បានរារាំងមិនឱ្យសមត្ថកិច្ចកម្ពុជា អាចសាងសង់ប៉ុស្តិ៍ធ្វើការនៅកន្លែងថ្មីនោះបាន។
លោក នេត្រ តារា ជាប្រធានច្រកទ្វារព្រំដែនជាំសាង៉ាំ នៃស្រុកអន្លង់វែង ខេត្តឧត្តរមានជ័យ របស់កម្ពុជា លោកបានមានប្រសាសន៍កាលពីរសៀលថ្ងៃសៅរ៍ ទី៤ ខែសីហា ថា ភាគីថៃបានអះអាងថា កន្លែងដែលកម្ពុជាគ្រោងសាងសង់ប៉ុស្តិ៍សម្រាប់កិច្ចការព្រំដែននោះ គឺជាតំបន់ស ហើយថៃបានហាមឃាត់កម្ពុជា មិនឱ្យទាន់ធ្វើការសាងសង់អ្វីឡើយ។ មន្ត្រីដដែល បានបញ្ជាក់ថា ពេលបច្ចុប្បន្ននេះ អាជ្ញាធរកម្ពុជា ជាច្រើនអង្គភាពមិនមានការិយាល័យធ្វើការទេ គឺមានតែខ្ទមមួយធ្វើការរួមគ្នាប៉ុណ្ណោះ។
លោក នេត្រ តារា៖ «គេអត់ឱ្យធ្វើ គេឱ្យធ្វើមកឆ្ងាយពីព្រំដែនចម្ងាយ២១០ម៉ែត្រ។ យើងមិនអាចធ្វើបានទេ។ យើងធ្វើបានតែរោងមួយធ្វើការរួមគ្នា។ យើងមានផលលំបាកដែរ ការងារខែភ្លៀង ខែអីផង យើងជួបការលំបាកតែម្ដងកន្លែងធ្វើការយើង»។
តំបន់ដែលថៃបានរារាំងមិនឱ្យអាជ្ញាធរកម្ពុជា សាងសង់ប៉ុស្តិ៍ ត្រូវបានគេដឹងថា គឺជាចំណុចព្រំដែនចន្លោះបង្គោលឡាក់លេខ១ និងលេខ២ ដែលគណៈកម្មការព្រំដែននៃប្រទេសទាំងពីរ នៅមិនទាន់ធ្វើការដោះស្រាយនៅឡើយ។
មន្ត្រីកម្ពុជា បានឱ្យដឹងថា កាលពីថ្ងៃទី១០ ខែកក្កដា កន្លងទៅ លោក វ៉ា គឹមហុង ដែលជាប្រធានគណៈកម្មការដោះស្រាយបញ្ហាព្រំដែនកម្ពុជា បានអញ្ជើញទៅដល់តំបន់ព្រំដែនទីនោះ ដើម្បីនឹងធ្វើការជជែកដោះស្រាយបញ្ហាព្រំដែនត្រង់ចំណុចបង្គោលឡាក់ លេខ១ លេខ២ និងលេខ៣។
ភាគីថៃ បានប្រាប់អាជ្ញាធរកម្ពុជាថា នៅពេលណាដែលគណៈកម្មការព្រំដែននៃប្រទេសទាំងពីរដោះស្រាយបញ្ហា ព្រំដែនទីនោះចប់សព្វគ្រប់ ទើបគេយល់ព្រមឱ្យកម្ពុជាអាចសាងសង់ប៉ុស្តិ៍ព្រំដែននៅទីនោះបាន។
ទោះយ៉ាងណា លោក វ៉ា គឹមហុង ប្រធានគណៈកម្មការដោះស្រាយបញ្ហាព្រំដែនកម្ពុជា បានច្រានចោលមិនធ្វើការអធិប្បាយបញ្ហានេះយ៉ាងណាឡើយ៖ «បើថាចង់នេះ សូមមេត្តាផ្ញើសំណួរមកខាងខ្ញុំ។ ម៉េចៗចាំខ្ញុំផ្ញើចម្លើយតាម អឹម.អេស.អិន (MSN)»។
មន្ត្រីច្រកទ្វារព្រំដែនជាំសាង៉ាំ របស់កម្ពុជា បានឱ្យដឹងថា គេបានធ្វើការផ្លាស់ប្ដូរទីតាំងច្រកទ្វារព្រំដែនពីកន្លែងចាស់ ទៅកន្លែងថ្មី តាំងតែពីអំឡុងខែកុម្ភៈ កន្លងទៅ។ រហូតមកដល់ពេលនេះ មានរយៈពេលប្រមាណ៦ខែហើយ ដែលអាជ្ញាធរច្រកទ្វារព្រំដែនកម្ពុជា ពុំអាចសាងសង់ប៉ុស្តិ៍ព្រំដែន និងគ្មានការិយាល័យសម្រាប់ធ្វើការងារ៕
