ដោយ ៖ ជា ស្រស់ ថ្ងៃទី 27 សីហា
ខេត្តសៀមរាប ៖ ស្ត្រីជាម្តាយរួមជាមួយកូនតូចម្នាក់បានស្លាប់នៅកន្លែងកើតហេតុ ចំណែកមនុស្សប្រុសស្រី៤ នាក់ផ្សេងទៀតក្នុងនោះមានជនជាតិជប៉ុនម្នាក់បានរងរបួសធ្ងន់ស្រាល នៅក្នុងគ្រោះថ្នាក់ចរាចរ រថយន្តតាក់ស៊ីបើកលឿនហើយរេចង្កូតបុកដើមគគីរ។ហេតុការណ៍បានកើតឡើងកាលពីវេលា ម៉ោង១១ ថ្ងៃទី២៧ ខែសីហា ឆ្នាំ២០១២ នៅតាមបណ្តោយផ្លូវជាតិលេខ៦ ក្នុងភូមិថ្នល់ សង្កាត់ស្រង៉ែ ក្រុងសៀមរាប ខាងលិចទីស្នាក់ការគណបក្សហ្វ៊ុនស៊ិនប៉ិចខេត្តសៀមរាបប្រមាណជា៥០ ម៉ែត្រ។
ប្រភពពីប្រជាពលរដ្ឋដែលឃើញ ហេតុការណ៍ផ្ទាល់បាននិយាយឲ្យដឹងថា នៅមុនពេលកើតហេតុគេបានឃើញ រថយន្តកាមរីមួយគ្រឿងពណ៌សម្បកឪឡឹក បើកបរយ៉ាងលឿនពីទិសខាងលិចសំដៅចូលមកក្រុងសៀមរាប។ លុះមកដល់កន្លែងកើតហេតុមិនដឹងជាមានមូលហេតុអ្វីទេស្រាប់រថយន្ត ខាងលើរេចង្កូតមកស្តាំដៃទៅប៉ះដើម គគីរមួយដើមបណ្តាលឲ្យបែកកង់ ហើយបន្តទៅបុកដើមគគីរមួយដើមទៀតទាំងកំរោលបណ្តាលឲ្យរថយន្តខូចខាត ផ្នែកខាងមុខយ៉ាងដំណំ។
ប្រភពពីប្រជាពលរដ្ឋបន្តថា ក្រោយពេលកើតហេតុការណ៍នេះភ្លាមៗ ទាំងអ្នកដំណើរ និងប្រជាពលរដ្ឋដែល នៅក្បែរកន្លែងកើតហេតុបាននាំគ្នាទៅជួយសង្គ្រោះអ្នកដែលនៅក្នុង រថយន្ត ហើយខ្លះទៀតរាយការណ៍ទៅអាជ្ញាធរ ដើម្បីជួយអន្តរាគមន៍សង្គ្រោះអ្នករងរបួស ប៉ុន្តែជាអកុសលក្នុងពេលនោះស្ត្រីម្នាក់ដែលមានបីកូននៅដៃហើយ អង្គុយ នៅកៅអីមុខបានបាត់បង់ជីវិតទៅហើយ ចំណែកអ្នកបើកបរដែលរងរបួសស្រាល ក្រោយពីមានការជួយពីប្រជាពលរដ្ឋបានរត់គេចខ្លួនបាត់។
មន្ត្រីនគរបាលចរាចរដែលចុះទៅដល់ កន្លែងកើតហេតុបាននិយាយថា រថយន្តនេះជារថយន្តតាក់ស៊ីដែលដឹកអ្នកដំណើរមកពីប៉ោយប៉ែត ខេត្តបន្ទាយមានជ័យ ចូលមកក្រុងសៀមរាប។ រថយន្តនេះពាក់ស្លាកលេខបន្ទាយមានជ័យ 2A 0114 ។ មន្ត្រីដដែលនិយាយថា ការដែលសមត្ថកិច្ចហ៊ានសន្និដ្ឋានជារថយន្តតាក់ស៊ីនោះ ដោយសារតែសមត្ថកិច្ចបានទាក់ទងទៅក្រុមគ្រួសារអ្នកស្លាប់តាមរយៈ ទូរស័ព្ទជនរងគ្រោះនោះបានឲ្យដឹងថា ស្ត្រីដែលស្លាប់នោះបានយកកូនស្រីរបស់គាត់ពីប៉ោយប៉ែត មកព្យាបាលជំងឺនៅមន្ទីរពេទ្យជ័យវរ្ម័នទី៧ (មន្ទីរពេទ្យគន្ធបុប្ផា ខេត្តសៀមរាប) ដោយជិះឡានតាក់ស៊ីនេះឯង។
ប៉ុន្តែបើទោះបីជាមានការអះអាងថា បានទាក់ទងទៅគ្រួសារជនរងគ្រោះយ៉ាងនេះក្តីក៏ក្រុមសមត្ថកិច្ចនិយាយ ថានៅមិនទាន់ដឹងអំពីអត្តសញ្ញាណទាំងអ្នកស្លាប់និងអ្នករបួសនៅឡើយ ដោយសារតែក្រុមគ្រួសារជនរងគ្រោះគ្រាន់តែឮដំណឹងភ្លាមយំទួញសោកនិយាយ ស្តាប់គ្នាមិនបាន។
ទាក់ទិននឹងមូលហេតុដែលនាំឲ្យកើតហេតុការណ៍ក្រុមសមត្ថកិច្ចបានសន្និដ្ឋានថា ទំនងមកពីអ្នកបើកបរងងុយដេក ៕nokorwat