Aug-29-2012
ពោធិ៍សាត់ ៖ មានមនុស្សមួយក្រុមបានទាញដំបង និង បំពង់ទីបស្ទាក់វាយបុរសម្នាក់រហូតដល់ស្លាប់ បន្ទាប់ពីបញ្ជូនទៅសង្គ្រោះនៅមន្ទីរពេទ្យខេត្តពោធិ៍សាត់ ហើយករណីនេះសមត្ថកិច្ចជំនាញឲ្យដឹងថាជរឿងគំនុំ។
ហេតុការណ៍ ខាងលើនេះបានកើតឡើងកាលពីវេលាម៉ោង៦ល្ងាចថ្ងៃទី ២៨ ខែសីហា ឆ្នាំ២០១២ នៅចំណុចភូមិទួលគ្រោះ សង្កាត់ចំរើនផល ក្រុងពោធិ៍សាត់។
លោក នូវ ហៀម នាយប៉ុស្ដិ៍រដ្ឋបាលទីនោះបានប្រាប់ឲ្យដឹងថា ជនរងគ្រោះឈ្មោះ ស្នា ជក់ អាយុ ៣១ឆ្នាំ រស់នៅភូមិលាវសង្កាត់ចំរើនផល ក្រុងពោធិ៍សាត់។
សាក្សី នៅកន្លែងកើតហេតុបានឲ្យដឹងថា មុនពេលកើតហេតុ ជនរងគ្រោះបានជិះម៉ូតូចេញពីភូមិលាវ ទៅទួលគ្រួស ដើម្បីទៅហូបបង្អែម ដោយមានគ្នា៤នាក់ ជិះម៉ូតូ៣គ្រឿង។ ជនរងគ្រោះជិះម៉ូតូឌុបគ្នាមកមុនគេ រួចក៏ឈប់ម៉ូតូនៅភូមិទួលគ្រួសរង់ចាំមិត្តភ័ក្ដិមកតាមក្រោយ។ ខណៈនោះជនសង្ស័យក៏បានចេញពីតូបនៅចំណុចនោះ រួចសួរជនរងគ្រោះថាតើឈប់ម៉ូតូត្រង់នេះធ្វើ។ ប្រភពព័ត៌មានបន្តទៀតថា បន្ទាប់ពីជនរងគ្រោះឆ្លើយហើយនោះ ជនសង្ស័យក៏បានចូលក្នុងតូបរួចចេញមកវិញគ្នា៥-៦ នាក់ទាញដំបង និងបំពង់ទីបដេញវៃ។ ពេលនោះដោយឃើញសភាពការណ៍មិនស្រួលអ្នកអង្គុយខាង ក្រោយ បានហក់រត់បាត់ នៅតែជនរងគ្រោះត្រូវជនសង្ស័យទាំងនោះវាយប្រហារដោយដំបងឈើជ្រុង និង បំពង់ទីបយ៉ាងព្រៃផ្សៃបែកក្បាល សន្លប់ក្នុងថ្លុកឈាម។ សាក្សីដដែលបានឃើញបានបន្តទៀតថា បន្ទាប់ពីជនសង្ស័យទាំងនោះចេញបាត់អស់ ទើបគ្នីគ្នាមិត្តភ័ក្ដិបញ្ជូនជនរងគ្រោះទៅកាន់មន្ទីរពេទ្យ តែដោយស្ថានភាពធ្ងន់ធ្ងរមិនអាចជួយសង្គ្រោះបានក៏ដាច់ខ្យល់ស្លាប់នៅ ម៉ោង៣ទៀបភ្លឺថ្ងៃទី២៩ ខែសីហា តែម្ដង។
ករណីនេះនគរបាលប៉ុស្ដិ៍ និងផ្នែកជំនាញបានកំពុងស្រាវជ្រាវស្វែងរកចាប់ខ្លួនជនដៃដល់យកមកផ្ដន្ទាទោសតាមច្បាប់៕cam111