ដោយ វិជ័យ អានន្ទ
2012-08-07
វិទ្យុអាស៊ីសេរី
អង្គការជួយសង្គ្រោះកម្មករចំណាកស្រុកធ្វើការនៅបរទេសមួយ ឈ្មោះ ខារ៉ាម (caram) នាំកម្មករចំនួន២៦នាក់ ត្រឡប់មកដល់ប្រទេសកម្ពុជា វិញហើយ នៅថ្ងៃទី៧ សីហា នេះ បន្ទាប់ពីកម្មករទាំងនោះចាញ់បោកមេខ្យល់នាំយកទៅធ្វើការនៅ ប្រទេសម៉ាឡេស៊ី និងត្រូវថៅកែធ្វើទុក្ខបុកម្នេញអស់ជាច្រើនខែ។
កម្មករ ដែលអង្គការខារ៉ាម ជួយសង្គ្រោះពីប្រទេសម៉ាឡេស៊ី ផ្ដល់បទសម្ភាសន៍ដល់អ្នកសារព័ត៌មាន នៅអង្គការខារ៉ាម រាជធានីភ្នំពេញ កាលពីថ្ងៃទី៧ ខែសីហា ឆ្នាំ២០១២។
RFA/Vichey Anandh
RFA/Vichey Anandh
លោកមានប្រសាសន៍ថា ភាពជោគជ័យក្នុងការជួយកម្មករទាំងនោះឲ្យត្រឡប់មកស្រុកកំណើតរបស់ ពួកគេវិញនោះ ដោយសារអង្គការធ្វើការយ៉ាងជិតស្និទ្ធជាមួយស្ថានទូតខ្មែរប្រចាំនៅ ប្រទេសម៉ាឡេស៊ី និងក្រសួងមហាផ្ទៃ។
លោក យ៉ា ណាវុធ ថ្លែងបន្តថា កម្មករទាំងនោះមានសេចក្ដីសប្បាយរីករាយយ៉ាងខ្លាំង បន្ទាប់ពីពួកគេត្រឡប់ដល់ស្រុកកំណើតរបស់ពួកគេ។
កម្មករម្នាក់ឈ្មោះ ទុន យ៉ាន់ណាក់ ដែលមានស្រុកកំណើតនៅភូមិអូរ ឃុំព្រៃកប្បាស ស្រុកព្រៃកប្បាស ខេត្តតាកែវ អះអាងថា លោកមានអារម្មណ៍រំភើបរីករាយឥតអ្វីប្រៀបនោះឡើយ ខណៈដែលលោកដឹងថាមានអង្គការនាំយករូបលោកមកប្រទេសកំណើតវិញ។ លោក ទុន យ៉ាន់ណាក់ លើកឡើងបន្តថា វាជារឿងអស្ចារ្យក្នុងឆាកជីវិត ព្រោះលោកមិនធ្លាប់គិតថា លោកនឹងត្រូវគេបញ្ជូនមកស្រុកកំណើតវិញនោះឡើយ។
ស្របពេលនឹងការសប្បាយចិត្តក្នុងការត្រឡប់មកស្រុកកំណើត លោកក៏ឲ្យដឹងដែរអំពីទុក្ខលំបាកមួយចំនួន ក្នុងដំណើរជីវិតរបស់លោក ដែលត្រូវគេបង្ខំឲ្យធ្វើការទាំងយប់ទាំងថ្ងៃគ្មានពេលសម្រាក។
លោក ទុន យ៉ាន់ណាក់ និយាយថា ថៅកែទូកនេសាទតែងបង្ខំលោកឲ្យធ្វើការដោយគ្មានការអាណិតអាសូរនោះ ឡើយ មិនតែប៉ុណ្ណោះ ពេលលោកអស់កម្លាំងធ្វើការលែងកើត គេបង្ខំលោកឲ្យប្រើថ្នាំញៀន ដើម្បីមានកម្លាំងធ្វើការបន្ត។
ដោយសារយល់ដឹងខ្លះៗ ពីផលប៉ះពាល់នៃថ្នាំញៀននោះ លោកប្រកែកមិនសេពគ្រឿងនោះ តែត្រូវថៅកែប្រើកម្មករផ្សេងទៀត ដែលសេពគ្រឿងនោះ ឲ្យវាយរូបលោក។ លោកបញ្ជាក់ថា ដោយសារលំបាកខ្លាំងពេក លោកព្យាយាមលួចរត់ជាច្រើនលើក តែត្រូវថៅកែចាប់បាន និងវាយធ្វើបាប។
ស្រដៀងគ្នានេះដែរ កម្មការិនីឈ្មោះ អែម ណេង មានស្រុកកំណើតនៅភូមិស្វាយ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ដែលចាញ់បោកគេទៅធ្វើអ្នកបម្រើតាមផ្ទះនៅប្រទេសម៉ាឡេស៊ី មានប្រសាសន៍ទាំងទឹកភ្នែកថា ក្នុងមួយយប់មួយថ្ងៃ អ្នកស្រីសម្រាកបាន ២ឬ៣ម៉ោង។ ក្រៅពីនោះ អ្នកស្រីត្រូវគេប្រើឲ្យជូតផ្ទះចំនួនបី ដាច់ដោយឡែកពីគ្នា និងប្រើឲ្យបោកគក់គ្មានពេលទំនេរនោះទេ។
ដោយមិនអាចទ្រាំនឹងការធ្វើទុក្ខបុកម្នេញពីសំណាក់ម្ចាស់ផ្ទះ ទីបំផុតអ្នកស្រីសម្រេចចិត្តរត់ចេញពីផ្ទះថៅកែនោះ ហើយត្រូវប៉ូលិសចាប់ដាក់គុក។ អ្នកស្រីឲ្យដឹងបន្តថា អ្នកស្រីធ្លាប់តែលឺថាការជាប់គុកត្រូវរងទុក្ខសោក ផ្ទុយទៅវិញ សម្រាប់អ្នកស្រីពេលជាប់គុកនៅប្រទេសម៉ាឡេស៊ី គឺជារឿងសប្បាយចិត្តទៅវិញ ព្រោះអ្នកស្រីបានហូបចុកឆ្អែត មានពេលសម្រាក ខុសស្រឡះពីកាលដែលអ្នកស្រីនៅផ្ទះថៅកែ។
កម្មករចំនួន២៦នាក់នោះ អ្នកខ្លះត្រូវចាញ់បោកក្រុមហ៊ុន រីឯអ្នកខ្លះត្រូវចាញ់បោកមេខ្យល់។ ក្នុងចំណោមកម្មករទាំងនោះ មួយចំនួនជាកម្មករសំណង់ ខ្លះទៀតជាកម្មករបម្រើតាមផ្ទះ រីឯអ្នកខ្លះទៀត ជាកម្មករតាមទូកនេសាទ។
អង្គការខារ៉ាម បានសង្គ្រោះកម្មករអន្តោប្រវេសន៍ទៅធ្វើការនៅបរទេសចំនួនប្រមាណ ៤០នាក់ គិតចាប់តាំងពីដើមខែមករា មកទល់នឹងខែសីហា ឆ្នាំ២០១២ នេះ។ ក្នុងពេលខាងមុខ អង្គការខារ៉ាម នឹងធានាខ្លួនកម្មករមួយចំនួនទៀត នៅប្រទេសឥណ្ឌូនេស៊ី និងម៉ាឡេស៊ី៕cambodai news
