ដោយ ៖ អារុណរះ ថ្ងៃទី 04 សីហា 2012ម៉ោង 15:56:43
ខេត្ដកណ្ដាល ៖ មានការភ្ញាក់ផ្អើលមួយបានកើតឡើងបន្ទាប់ពីប្រជាពលរដ្ឋប្រុស ស្រីចាស់ក្មេង៣ភូមិ លើកគ្នាមកពពាក់ពពូនព័ទ្ធចាប់បុរសជនជាតិវៀតណាមម្នាក់សំពងចាស់ដៃ បណ្ដាលឱ្យរងរបួសយ៉ាងធ្ងន់ធ្ងរ បើទោះបីជាសមត្ថកិច្ចនគរបាលស្រុកមុខកំពូល ក៏ដូចជាអាវុធហត្ថ បានចុះអន្ដរាគមន៍យ៉ាងណាក៏ដោយ ក៏ក្រុមប្រជាពលរដ្ឋទាំងនោះនៅតែមិនចង់ស្ដាប់ ថែមទាំងនាំគ្នាវាយជនជាតិវៀតណាមនេះរហូតដល់លែងមាត់លែង.ក ។ ការភ្ញាក់ផ្អើលលើកគ្នាមកព័ទ្ធ វាយជនជាតិវៀតណាមនេះ បន្ទាប់ពីលេចឮពាក្យចចាមអារ៉ាមថា មានជនជាតិវៀតណាមម្នាក់ដេញចាប់ក្មេងវះយក ក្រលៀននៅក្នុងភូមិ ។ករណីនេះបានកើតឡើងកាលពីថ្ងៃទី៣ ខែសីហា ឆ្នាំ២០១២ វេលាម៉ោង១៥និង៣០នាទី ស្ថិតនៅចំណុចភូមិអន្លង់ស្លែង ឃុំស្វាយអំពារ ស្រុកមុខកំពូល ខេត្ដកណ្ដាល ។
ក្នុងករណីខាងលើនេះបានធ្វើឱ្យ មានការភ្ញាក់ផ្អើលរហូតដល់ថ្នាក់លើ រួចបញ្ជាកម្លាំងមួយផ្នែកឱ្យចុះទៅពិនិត្យ ដើម្បីឱ្យដឹងពីមូលហេតុឱ្យច្បាស់លាស់ថា រឿងនេះផ្ដើមឡើងដោយមូលហេតុអ្វីពិតប្រាកដ ។ ប៉ុន្ដែអស់រយៈពេលជិត១ថ្ងៃសមត្ថកិច្ចអាវុធហត្ថ ក៏ដូចជានគរបាលស្រុកមុខកំពូល បាននាំគ្នាគ្រវីក្បាលនិងហួសចិត្ដនូវទង្វើរបស់ប្រជាពលរដ្ឋទាំង៣ ភូមិខាងលើ ធ្វើទៅលើជនជាតិវៀតណាម១រូប ។ មិនតែប៉ុណ្ណោះទង្វើរបស់ប្រជាពលរដ្ឋមិនត្រឹមតែវាយបុរសជនជាតិ វៀតណាមនេះឱ្យបែកមុខបែកមាត់សន្លប់ លែងដឹងខ្លួននោះតែ ថែមទាំងអូសយកម៉ូតូជនរងគ្រោះជិះម៉ាកសង់កូរ៉េ ដុតកម្ទេចចោលមុខផ្ទះមេភូមិទៀត ។
បុរសជនជាតិវៀតណាមដែលរងគ្រោះ នៅក្នុងករណីខាងលើនេះត្រូវបានគេស្គាល់ ឈ្មោះផាន់ ខ្វាន់មិន អាយុជាង៣០ឆ្នាំ ជា មេការជួសជុលអង់តែនក្រុមហ៊ុនទូរស័ព្ទ មិត្ដហ្វូន (០៩៧/០៨៨) មានស្រុកកំណើត នៅប្រទេសវៀតណាម ស្នាក់នៅបណ្ដោះ អាសន្នក្នុងភូមិថ្មី ឃុំស្វាយអំពា ស្រុកមុខ កំពូល ខេត្ដកណ្ដាល ។
បើតាមការឱ្យដឹងពីលោកមុត ចាន់ថន ប្រធានផ្នែកព្រហ្មទណ្ឌស្រុកមុខកំពូល ដែលចុះពិនិត្យនិងស្រាវជ្រាវករណីនេះ ពេញ១ថ្ងៃបាននិយាយឱ្យដឹងថា ដើម ចមនៃរឿងនេះ គឺផ្ដើមឡើងពីបុរសម្នាក់ ឈ្មោះម៉ាត់ ផល្លី អាយុ២៥ឆ្នាំ មានទីលំ នៅភូមិ-ឃុំកើតហេតុខាងលើ បាននិយាយ បំប៉ោងសភាពការណ៍ថា មានជនជាតិ វៀតណាមចូលទៅក្នុងភូមិចាប់ក្មេងៗវះ យកក្រលៀន ។ គាប់ជួនពេលនោះ បុរស ជនជាតិវៀតណាមដែលរងគ្រោះក៏បាន វិលត្រឡប់ពីកន្លែងជួសជុលអង់តែន ដោយជិះម៉ូតូម្នាក់ឯងមកដល់ភូមិខាងលើ ក៏ស្រាប់តែប្រជាពលរដ្ឋនាំគ្នាព័ទ្ធ ចាប់វាយស្ទើរស្លាប់ស្ទើររស់ ដោយមិន បានសួរនាំរកខុសត្រូវនោះឡើយ ហើយ ម៉ាត់ ផល្លី ក៏ចូលរួមវាយជនរងគ្រោះដែរ ។
បើតាមប្រភពព័ត៌មានបានឱ្យដឹងទៀត ថា ចំពោះឈ្មោះម៉ាត់ ផល្លី ដែលមានសភាពទន់ល្វតល្វន់ ហើយថាខ្លួនត្រូវថ្នាំពុលនោះ គឺជាការប្រឌិតហើយ ធាតុពិត ម៉ាត់ ផល្លី បានផឹកស្រាសមួយ យប់ទល់ភ្លឺកំដរបុណ្យសពប្រជាពលរដ្ឋ ក្នុងភូមិកើតហេតុខាងលើ ។
ប្រជាពលរដ្ឋទាំង៣ភូមិដែលលើកគ្នា រាប់រយនាក់មកព័ទ្ធចាប់វាយជនជាតិ វៀតណាម បណ្ដាលឱ្យរងរបួសយ៉ាងធ្ងន់ ធ្ងរនេះ មានភូមិអន្លង់ស្លែង, ភូមិកំពង់ ប្រាសាទ និងភូមិថ្មី ឃុំស្វាយអំពា ស្រុកមុខកំពូល ខេត្ដកណ្ដាល ។
ចំពោះករណីខាងលើនេះ សមត្ថកិច្ច នគរបាលស្រុកមុខកំពូលកំពុងតែស្រាវ ជ្រាវយ៉ាងដុតដៃដុតជើងបំផុតចំពោះ ករណីខាងលើនេះ ហើយលោក មុត ចាន់ថន នាយផ្នែកព្រហ្មទណ្ឌស្រុកមុខ កំពូល ក៏បានបញ្ជាក់ផងដែរថា ចំពោះ ពាក្យចចាមអារ៉ាមថាចាប់ក្មេងៗវះ យកក្រលៀនខាងលើនេះមិនពិតទេ ។
នៅព្រឹកថ្ងៃទី៤ ខែសីហា ឆ្នាំ២០១២ លោកវេជ្ជបណ្ឌិតម្នាក់នៅមន្ទីរពេទ្យ កាល់ម៉ែតសុំមិនបញ្ចេញឈ្មោះបានឱ្យ ដឹងថា ការវះយកក្រលៀនមនុស្ស វាមិន ងាយៗដូចដែលយើងគិតនោះទេ បើគេ ចង់ធ្វើ គឺមានទីតាំងស្អាតបាត ឧបករណ៍ គ្រប់គ្រាន់ មិនមែនធ្វើនៅលើភ្លឺស្រែ ឡើយ ហើយពាក្យចចាមអារ៉ាមនេះ មិន មែនទើបតែកើតឡើងនោះទេ គឺច្រើនលើកច្រើនសាមកហើយ តាំងពីសណ្ដែកខៀវចប់ ផ្អើលខ្លាញ់មនុស្ស រហូតមកដល់ វះក្រលៀននេះ តែធាតុពិតទាំងអស់គឺជាការប្រឌិតប៉ុណ្ណោះ ។
បើពាក្យចចាមអារ៉ាមដែលច្រើនតែ បំប៉ោងបំផ្លើសសភាពការណ៍ ហើយប្រជា ពលរដ្ឋនាំគ្នាធ្វើបែបនេះច្បាស់ជាមាន ជនរងគ្រោះជាច្រើនទៀតអាចរងគ្រោះ ដោយសារការលាបពណ៌ ហើយជា ពិសេសនោះក៏មានក្រុមពួកប្រឆាំងមួយ ចំនួននាំគ្នាបំភ្លៃសភាពការណ៍នេះដើម្បី ឱ្យច្របូកច្របល់ ។ ដូច្នេះដើម្បីកុំឱ្យមាន ពាក្យចចាមអារ៉ាមហើយគ្រោះថ្នាក់ទៅ ដល់ជនស្លូតត្រង់ សូមឱ្យក្រសួង ស្ថាប័នពាក់ព័ន្ធ ក៏ដូចជាសមត្ថកិច្ចត្រូវចាត់ វិធានការ ឬក៏បើកយុទ្ធនាការផ្សព្វផ្សាយ ចៀសវាងការនិយាយតៗគ្នាអាចក្លាយទៅ បញ្ហាដូចករណីខាងលើនេះតទៅទៀត ៕nokorwat
