ក្រសួងសុខាភិបាល កំពុងបន្តពង្រឹងសេវាថែទាំសុខភាពជូនប្រ ជាពលរដ្ឋឲ្យល្អប្រសើរជាងមុន តាមផែនការ និងយុទ្ធសាស្ត្ររបស់រដ្ឋាភិបាល ដើម្បីកាត់បន្ថយអត្រាមរណភាពរបស់មាតា និងទារក នៅពេលសម្រាលកូន នៅមណ្ឌលថែទាំសុខភាព។
ថ្មីៗនេះលោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានអះអាងថា ក្រសួងសុខាភិបាលបានទទួលជោគជ័យកន្លងទៅថ្មីៗនេះ ក្នុងការកាត់បន្ថយអត្រាស្លាប់របស់មាតា និងទារក នៅប្រទេសកម្ពុជា ដោយសារគុណភាព សេវាព្យាបាល របស់ក្រុមគ្រូពេទ្យនៅតាមមន្ទីរពេទ្យ និងមណ្ឌលថែទាំសុខភាពបានល្អប្រសើរជាងមុន។អត្រាស្លាប់របស់ទារកនៅ ពេលកើត បានថយចុះពីចំនួន ៤០០នាក់ មកនៅចំនួនជាង ២០០នាក់ នៅក្នុងចំណោមទារកកើតចំនួន១សែននាក់ នៅទូទាំងប្រទេសកម្ពុជា ចាប់តាំងពីឆ្នាំ២០១០ កន្លងមក។
រដ្ឋមន្ត្រីក្រសួងសុខាភិបាល បានបញ្ជាក់ថា យើងពេញចិត្តចំពោះការថយចុះនៃអត្រាស្លាប់របស់ទារកនេះ។ យើងរៀបចំប្រព័ន្ធចាត់ចែងរបស់យើងឆ្លើយតបនឹងសុខភាពមាតា និងទារក និងជាពិសេស ការពង្រឹងផ្នែកសម្ភព នៅមណ្ឌលសុខភាព នៅមន្ទីរពេទ្យបង្អែក ហើយនិងការចូលរួមរបស់សហគមន៍ទាំងអស់។ រយៈពេលកន្លងមក គឺថាយើងបានខិតខំបន្ថែម គឺការពង្រីកឆ្មប បណ្ដុះបណ្ដាលឆ្មប ភាគច្រើនយើងយកឆ្មបដែលបំពេញការងារនៅមូលដ្ឋានហ្នឹងហើយ។
លោក ម៉ម ប៊ុនហេង បន្តថាកន្លងមកក្រសួងសុខាភិបាល មានក្រមសីលធម៌ សម្រាប់អប់រំគ្រូពេទ្យ ឲ្យយកចិត្តទុកដាក់ព្យាបាលអ្នកជំងឺ ដោយគ្មានការរើសអើងអ្នកមាន ឬអ្នកក្រីក្រ ឬប្រើពាក្យសម្ដីទ្រគោះបោះបោកមកលើអ្នកជំងឺទេ គឺធ្វើយ៉ាងណាឲ្យអ្នកជំងឺទទួលភាពកក់ក្តៅ។ មួយវិញទៀត ក្រសួងសុខាភិបាលកំពុងតែរៀបចំឲ្យមានក្រមសីលធម៌ សម្រាប់ពេទ្យឆ្មបដែរ នៅថ្ងៃខាងមុខនេះ។ ប៉ុន្តែ គ្រូពេទ្យមួយចំនួននៅមូលដ្ឋាន ត្រូវការប្រាក់ នៅមុនពេលព្យាបាលអ្នកជំងឺ។ ករណីខ្លះទៀត គ្រូពេទ្យបានទុកឲ្យស្ត្រីដែលកំពុងឈឺពោះសម្រាលកូននោះ ឲ្យរង់ចាំរហូតដល់ស្លាប់ក៏មាន ដោយសារតែគ្មានប្រាក់គ្រប់គ្រាន់តាមការចង់បានពីគ្រូពេទ្យ។
ក្នុងករណីដែលអ្នកជំងឺ ឬស្ត្រីសម្រាលកូន ជាគ្រួសារទីទាល់ក្រ គ្មានប្រាក់បង់សេវាព្យាបាល គឺក្រសួងសុខាភិបាលមានគោលការណ៍មួយ អនុគ្រោះឲ្យអ្នកជំងឺនោះ មិនចាំបាច់បង់ប្រាក់ទេ ដោយសារតែក្រសួងសុខាភិបាលមានមូលនិធិសមធម៌ ដើម្បីជួយបង់ប្រាក់ឲ្យគ្រួសារអ្នកជំងឺនោះ លើការធ្វើដំណើរ ការហូបចុក និងការព្យាបាលជាដើម។
បច្ចុប្បន្ន ក្រសួងសុខាភិបាល មានមណ្ឌលថែទាំសុខភាពចំនួនជាង ១.០០០កន្លែង នៅប្រទេសកម្ពុជា។ ក្រៅពីនេះ ក្រសួងសុខាភិបាលមានវេជ្ជបណ្ឌិតចំនួនសរុបជាង ៥.០០០នាក់។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានមានប្រសាសន៍ថា រហូតមកដល់ពេលនេះ ក្រសួងសុខាភិបាលបានជួយសង្គ្រោះអ្នកជំងឺទីទាល់ក្រ តាមរយៈមូលនិធិសមធម៌នោះ ចំនួនជាង ២លានករណីហើយ៕Agkor thom