ថ្ងៃទី 14 ខែសីហា ឆ្នាំ2012, ម៉ោង 03:30 PM ឈ.ភ
នៅព្រឹកថ្ងៃទី១៤ ខែសីហា ឆ្នាំ២០១២ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ថា ការអនុញ្ញាតឲ្យជនជាប់ចោទទាំង ៤ នាក់ ស្ថិតនៅក្រៅឃុំបណ្តោះអាសន្ននោះ មានន័យថា តុលាការបានទទួលចោទប្រកាន់ការស៊ើបអង្កេតរបស់អង្គភាពប្រឆាំង អំពើពុករលួយ ហើយ។
លោក ឱម យ៉ិនទៀង បានបន្តថា ការដែលដោះលែងជនជាប់ចោទទាំង ៤នាក់ នៅក្រៅឃុំបណ្តោះអាសន្ននេះ មានន័យថា តុលាការបានទទួលឃុំខ្លួនជនជាប់ចោទទាំង ៤ នាក់ ជាបណ្តោះអាសន្ន តាមការស៊ើបអង្កេតរបស់អង្គភាពប្រឆាំងអំពើពុករលួយហើយការអនុញ្ញាត នៅក្រៅឃុំបែបនេះ ជាសមត្ថកិច្ចច្បាប់ ដែលក្នុងទោសប្រព្រឹត្តអំពើពុករលួយ មានទោសឧក្រិដ្ឋទោសថ្នាក់មជ្ឈិម និងទោសស្រាលជាងហ្នឹង ជាប់ឃុំ ៦ ទៅ ៧ ថ្ងៃ។ តុលាការអាចយល់ឃើញថា អ្វីដែលអង្គភាពប្រឆាំងអំពើពុករលួយ ដាក់ទៅ នាពេលនេះ ចូលក្នុងបទល្មើសមជ្ឈិមអីចឹង មេធាវីរបស់ពួកគេ អាចធានាកូនក្តី ឲ្យនៅក្រៅឃុំបាន ប្រសិនបើទោសនោះ ស្ថិតនៅក្នុងកម្រិតមជ្ឈិម"។
លោកទេសរដ្ឋមន្ត្រី បានបន្តទៀតថា តុលាការពិចារណាឃើញថា អ្វីដែលជាភស្តុតាងរបស់អង្គភាពប្រឆាំងអំពើពុលរលួយ ដាក់ទៅនោះ ទើបតែបង្ហាញកំហុស ដែលស្ថិតនៅក្នុងកំរិតមជ្ឈិមនៅឡើយ ហើយនៅមានកិច្ច ត្រូវធ្វើបន្តទៀតនៅឡើយ ទាំងខាងតុលាការ ហើយទាំងអង្គភាពប្រឆាំងអំពើពុករលួយ ក៏ត្រូវបន្តការងាររបស់ខ្លួនទៀតដែរ។
លោកទេសរដ្ឋមន្ត្រី បានបញ្ជាក់ថា ប្រអប់សំបុត្រ ដែលអង្គភាពប្រឆាំងអំពើពុករលួយ ដាក់នៅផ្លូវព្រះមុនីវង្ស បានទទួលបណ្តឹង ចំនួន ៥០ ករណី ហើយអាចមានករណីពុករលួយចំនួន ៤ ទៅ ៥ ដែលអង្គភាពប្រឆាំងអំពើពុករលួយ បញ្ជូនទៅតុលាការ។
សូមរម្លឹកថា ជនជាប់ទាំង ៤ នាក់ ដែលជាមន្ត្រីរបស់អង្គភាពប្រឆាំងអំពើពុករលួយ កាលពីថ្ងៃទី៩ ខែសីហា ឆ្នាំ២០១២ ត្រូវបានចៅក្រមតុលាការសាលាដំបូងរាជធានីភ្នំពេញ ឃុំខ្លួនបណ្តោះអាសន្ន នៅពន្ធនាគារព្រៃស ក្រោមការចោទប្រកាន់ពីបទ ពុករលួយ ពាក់ព័ន្ធនឹងកេងប្រវ័ញ្ចថវិការដ្ឋជិត ២ លានដុល្លារអាមេរិក តាមរូបភាពកាត់ភាគរយ លើគម្រោងផ្តល់ដីសម្បទានសង្គមកិច្ច និងសាងសង់លំនៅស្ថាន ជូនអតីតយុទ្ធជន និងជនក្រីក្រ ដើម្បីធ្វើជាប្រយោជន៍ផ្ទាល់ខ្លួន។
កាលពីព្រឹកថ្ងៃទី១៤ ខែសីហា ឆ្នាំ២០១២ លោក លាង សំណាត់ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឱ្យជនជាប់ទាំង ៤ នាក់ នៅក្រៅឃុំបណ្តោះអាសន្ន បន្ទាប់ពីមានការដាក់ពាក្យស្នើសុំធានាកូនក្តីទាំង ៤ នាក់ ពីសំណាក់មេធាវីការពារក្តីរបស់ពួកគេ តែដាក់ឱ្យស្ថិតក្រោមការត្រួតពិនិត្យតាមផ្លូវតុលាការ។
អង្គភាពប្រឆាំងអំពើពុករលួយ បានចាប់ខ្លួនមន្ត្រីនៃក្រសួងដែនដីនគរូបនីយកម្ម ចំនួន ៤ នាក់នោះ កាលពីថ្ងៃទី៦ ខែសីហា ឆ្នាំ២០១២ និងបានបញ្ជូនមកកាន់សាលាដំបូងរាជធានីភ្នំពេញ។ មន្ត្រីទាំង៤នាក់នោះ បានត្រូវលោក សុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ពីបទ ពុករលួយ រួចត្រូវចៅក្រមស៊ើបសួរ និងឃុំខ្លួនបណ្តោះនៅពន្ធនាគារព្រៃស កាលពីរសៀលថ្ងៃទី៩ ខែសីហា ឆ្នាំ២០១២៕agtkor thom
