ថ្ងៃទី 02 ខែសីហា ឆ្នាំ2012, ម៉ោង 02:26 PM ហេង សុខា
ហេតុការណ៍នេះ ផ្អើលឆោឡោ កាលពីវេលាម៉ោង១២ និង១៥នាទី រំលងអធ្រាត្រឈានចូលថ្ងៃទី០២ សីហា នៅផ្ទះលេខ 40BE2 ផ្លូវលេខ១៣៨ ភូមិ៧ សង្កាត់ផ្សារដេប៉ូ២ ខណ្ឌទួលគោក ។
នារីរងគ្រោះមានឈ្មោះ ផល្លា អាយុ១៧ឆ្នាំ ជាបុគ្គលិកបម្រើការនៅភោជនីយដ្ឋានច្រឡំគូ ដែលមានទីតាំងនៅជិតកន្លែងកើតហេតុ ស្នាក់នៅផ្ទះជួលកើតហេតុខាងលើ មានស្រុកកំណើតនៅស្រុកបាកាន ខេត្តពោធិ៍សាត់ ។ ចំណែកជនបង្កមានឈ្មោះ រិន ដានិត ហៅប៉ ភេទប្រុស អាយុ១៩ ឆ្នាំ ជានិស្សិតឆ្នាំទី១ ជំនាញ IT នៅសាកលវិទ្យាល័យភូមិន្ទភ្នំពេញ ស្នាក់នៅកន្លែងកើតហេតុ ត្រូវជាក្មួយរបស់ម្ចាស់ផ្ទះ ។
បើតាមសាក្សីឈ្មោះ រស្មី ធីតា ហៅអាវី ភេទស្រី អាយុ១៨ ឆ្នាំ ជាបុគ្គលិកធ្វើការតាមហាង ស្នាក់នៅជាមួយនារីរងគ្រោះ ត្រូវជាមិត្តភក្កិនឹងគ្នា បានឲ្យដឹងថា ឈ្មោះ ផល្លា មកស្នាក់នៅជាមួយគ្នាបាន៣ ខែកន្លងមក ដោយនៅផ្ទះជួលជាមួយគ្នា ប្រមាណ៣ ទៅ៤ នាក់ នៅជាន់ទី២ ។ នៅយប់កើតហេតុនេះ ផល្លាចេញពីធ្វើការមកនៅសម្រាកក្នុងផ្ទះ ក្រៅបន្ទប់ ស្រាប់តែឃើញជនសង្ស័យឈ្មោះ រិន ដានិត នៅអង្គុយជិតនាង ហើយផឹកភេសជ្ជៈសាំមូរៃ ដាក់ចូលក្នុងមាត់ ហើយខ្ពុរដាក់ចូលក្នុងមាត់ផល្លា ទំនងដូចជាដាក់ថ្នាំសម្រើបលាយជាមួយផង ។ ឃើញបែបនេះពួកនាងក៍រត់ទៅប្តឹងប៉ូលិស ។
ប៉ុន្តែតាមការបំភ្លឺពីឈ្មោះ រិន ដានិត បានឲ្យដឹងថា កន្លងមក រូបគេជាអ្នកដើរយកលុយថ្លៃផ្ទះជួល ហើយរូបគេនឹងផល្លា បានទាក់ទងសេចក្តីស្នេហាជាមួយគ្នារយៈពេលពីរថ្ងៃកន្លងមកនេះ ស្រាប់តែនៅយប់កើតហេតុ ពេលដែលរូបគេទើបនឹងមកពីស៊ីជាមួយមិត្តភក្កិនៅខាងក្រៅ ហើយមានមិត្តភក្កិមកអង្គុយនិយាយគ្នាលេងនៅផ្ទះ ស្រាប់តែឃើញនាងដើរមកពីធ្វើការក្នុងស្ថានភាពស្រវឹងទ្រេតទ្រោត ចូលទៅក្នុងផ្ទះ រួចដេកនៅក្រៅបន្ទប់ ឃើញទំនងពេក រូបគេក៏ផ្លោះបង្កាន់ដៃចូលទៅអង្គុយជិតនាងឃើញនាងក្អួតបានបីនាងយកទៅលាងទឹក នៅបន្ទប់ទឹក មិនបានប៉ះពាល់រាងកាយនាងទេ ។ រូបគេ បានកាន់កំប៉ុងសំាមូរ៉ៃ យកទៅពិតមែន តែមិនបានដាក់ថ្នាំសម្រើបអីទេ បើសិនជាដាក់ថ្នាំសម្រើបមែននោះ រូបគេច្បាស់ជារវើរវាយមិនខាន ។
ពេលប៉ូលិសចុះទៅដល់កន្លែងកើតហេតុ ឃើញជនសង្ស័យរូបនោះ ផ្លោះបង្កាន់ដៃចេញពីក្នុងផ្ទះនោះ ពិតប្រាកដមែន ។ ចំណែកនារីរងគ្រោះសន្លប់ស្តូកស្តឹងបានបញ្ជូនទៅព្យាបាលនៅគ្លីនិកឯកជន តែគ្លីនិកមិនហ៊ានទទួលព្យាបាល ដោយសារខាងមិត្តភក្កិនារីរងគ្រោះ ប្រាប់ថា ត្រូវថ្នាំសណ្តំ ទើបបញ្ជូនទៅព្យាបាលនៅមន្ទីរពេទ្យព្រះកុសុមៈ ។
ទាក់ទិននឹងករណីស្រីប្រកាន់ប្រុសប្រកែកនេះ ជនសង្ស័យត្រូវបានប៉ូលិសឃាត់ខ្លួនទៅសាកសួរ នៅប៉ុស្តិ៍ផ្សារដេប៉ូ២ រួចបញ្ជូនបន្តទៅខណ្ឌទួលគោកដើម្បីចាត់ការតាមនីតិវិធីច្បាប់ ៕agkor thom