ដោយ ៖ ព្រហ្ម សុផៃ ថ្ងៃទី 25 សីហា 2012ម៉ោង 16:04:04
ខេត្ដតាកែវ ៖ ប្រជាពលរដ្ឋរស់នៅស្រុកអង្គរបុរី ខេត្ដតាកែវ រាប់ពាន់នាក់ នៅតែបន្ដពពាក់ពពូនប្រជ្រៀតគ្នារង់ចាំរើសមាសនៅពេលគ្រឿងចក្ររបស់ កង វិស្វករកម្មកាយយកអាចម៍ដីធ្វើផ្លូវនៅចំណុចភូមិកំពង់ពោធិ៍ ឃុំព្រែកផ្ទោល ខាងត្បូងស្ពានឆ្លងស្ទឹងអង្គរបុរីចម្ងាយ១០០ម៉ែត្រ ។ហេតុការណ៍ប្រជាពលរដ្ឋពពាក់ពពូន ទៅឈរចាំរើសមាសខាងលើនេះបាន កើតឡើងតាំងពីថ្ងៃទី២៤ខែសីហាឆ្នាំ ២០១២មកម្ល៉េះ ហើយរហូតមកដល់ ល្ងាចថ្ងៃទី២៥ខែសីហា នៅតែមានប្រជាពលរដ្ឋរាប់ពាន់នាក់ឈរត្រៀបត្រាចាំរើសដដែល បើទោះបីជាសមត្ថកិច្ចបាន រារាំងយ៉ាងណាក៏ដោយ ក៏មិនអាចរារាំងបាននោះដែរ ។
ប្រជាពលរដ្ឋដែលទៅឈរចាំរើសមាស នៅភូមិ-ឃុំខាងលើបានឱ្យដឹងថា កន្លែង ដែលកម្លាំងកងវិស្វកម្មកាយអាចម៍ដី ដើម្បីធ្វើផ្លូវ គឺជាកន្លែងកំណប់កាលពី សម័យបុរាណ ហើយមានប្រជាពលរដ្ឋ មួយចំនួនបានរើសមាសបានយ៉ាងច្រើន ដោយខ្លះជាមាសដុំ និងខ្លះទៀតជាមាស កែច្នៃធ្វើគ្រឿងអលង្ការរួចជាស្រេច ។ ពួកគាត់បន្ដថា ដោយសារតែមានគេ រើសបានយ៉ាងច្រើនក្រាស់ក្រែលដូច្នេះ ទើបពួកគាត់មកឈររង់ចាំរើសក្រែង លោបាននឹងគេ ពីព្រោះបើតាមគាត់ដឹង កន្លែងដែលកំពុងជីកកាយយកអាចម៍ដី នេះ គឺជាទីតាំងកប់កំណប់ពីបុរាណ ដូច្នេះ ប្រាកដជាមានមាសយ៉ាងច្រើនទៀត ។
គួរបញ្ជាក់ថា នៅក្នុងពេលថ្មីៗកន្លងមកនេះ គ្រឿងចក្រកាយដីរបស់កងវិស្វករ កម្មដែលធ្វើផ្លូវ១ខ្សែពីផ្សារព្រៃល្វាទៅ រមណីយដ្ឋានប្រវត្ដិសាស្ដ្រភ្នំដា ស្រុក អង្គរបុរី បានកាយប្រទះឃើញគ្រឿង អលង្ការជាច្រើនដែលធ្វើអំពើមាស ឃើញ ដូច្នេះប្រជាពលរដ្ឋរាប់រយនាក់បានសម្រុក ចូលដណ្ដើមគ្នារើសមិនគិតពីគ្រោះថ្នាក់ ដល់អាយុជីវិត ។ ឃើញដូច្នោះ លោក អធិការស្រុកអង្គរបុរីបានដាក់សមត្ថ កិច្ចជាច្រើនដើម្បីទប់ស្កាត់ដើម្បីសម្រួល ដល់កម្លាំងកងវិស្វកម្មកុំឱ្យកកស្ទះ ដំណើរការធ្វើផ្លូវ ប៉ុន្ដែនៅតែមិនអាច ទប់ស្កាត់បាន ដោយសារតែមានប្រជា ពលរដ្ឋច្រើនឡើងបានសម្រុកចូលមក ឈរចាំរើសមាស ។
លោក ឈាវ ហ៊ អភិបាលស្រុក អង្គរបុរី មានប្រសាសន៍ថា ដោយសារមានប្រជាពលរដ្ឋជាច្រើនរើសបានមាស ដូចជាម្កុដខ្សែក្រវាត់ពាក់ឈៀងពីសម័យ បុរាណគ្រឿងអលង្ការ ជាច្រើនដែលខ្លះ មានទម្ងន់រហូតដល់១គីឡូក្រាម និងរាប់ តម្លឹងនោះ ទើបសកម្មភាពនេះចេះតែ មានប្រជាពលរដ្ឋកើនឡើងមកឈរចាំ រើស ។ លោកបន្ដថា មានប្រជាពលរដ្ឋខ្លះពិតជារើសបានហើយខ្លះទៀតបានច្រើន ក៏រត់គេចខ្លួនបាត់ព្រោះខ្លាចពីសុវត្ថិភាព ។
លោកបញ្ជាក់ឱ្យ ដឹងថា សកម្មភាពនេះប្រហែលជាពិបាកបញ្ចប់ភ្លាមៗណាស់ ពីព្រោះផ្លូវនៅចំណុចឃុំខាងលើ ទើបតែចាប់ផ្ដើមកាយបានបន្ដិចប៉ុណ្ណោះ ក៏មានរឿងហេតុបែបនេះកើតឡើង ដែលអាចធ្វើឱ្យស្ទះការងារក្រុមវិស្វកម្ម ខណៈនៅចំណុចឃុំខាងលើឱ្យតែនៅក្នុងដី គឺសុទ្ធតែមាសទាំងអស់ ដោយខ្លះជាដុំ ខ្លះជាគ្រឿងអលង្ការផ្សេងៗ ។
លោក ជា សម្បត្ដិ ប្រធានការិយាល័យវប្បធម៌ស្រុកអង្គរបុរីមានប្រសាសន៍ថា មូលហេតុដែលស្រុកអង្គរសំបូរមាស បែបនេះ ព្រោះជាទីក្រុងដំបូងបង្អស់របស់ ប្រទេសកម្ពុជា ដូច្នេះគ្រើឿងអលង្ការដែល នៅកប់ក្នុងដីគឺជារបស់របរស្ដេច និង អ្នកមាននៅសម័យនោះ ពីព្រោះសូម្បី តែចិញ្ចៀនដែលប្រជាពលរដ្ឋរើសបាន មានរង្វង់ធំជាងមេជើងទៅទៀត ។ លោក បន្ដថា បច្ចុប្បន្នសមត្ថកិច្ចកំពុងទប់ស្កាត់ មិនឱ្យប្រជាពលរដ្ឋរុករកកាយឬជីកនៅ តំបន់មួយចំនួននោះទេ ដើម្បីរក្សាទ្រព្យ កំណប់ពីបុរាណទាំងនោះ កុំអីប្រជាពល រដ្ឋជីកកាយរុករកគ្មានសល់នោះទេ ៕angkor thom