(ដោយ ៖ វិច្ឆិកា ថ្ងៃទី 26 កក្កដា 2012ម៉ោង 11:31:38)
ខេត្តបន្ទាយមានជ័យ ៖ បុរសម្នាក់ដែលបានប្រព្រឹត្តបទល្មើសអំពើមនុស្សឃាតគិតទុកជាមុន កាលពីឆ្នាំ២០១១ហើយបានរត់គេចខ្លួន ទើបនៅថ្ងៃទី២៥ ខែកក្កដា ឆ្នាំ២០១២ វេលាម៉ោង១និង១៥នាទីរសៀល បុរសរូបនេះត្រូវបាននគរបាលស្រុកម៉ាឡៃចាប់ឃាត់ខ្លួនបាន នៅចំណុចភូមិត្រសេកជ្រុំ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។ ការឃាត់ខ្លួនសមត្ថកិច្ចអនុវត្តតាមដីកាសាលាដំបូងខេត្តបន្ទាយមានជ័យ ក្នុងសំណុំរឿងព្រហ្មទណ្ឌលេខ៦១១ ចុះថ្ងៃទី២៨ ខែសីហា ឆ្នាំ២០១១។លោកវរសេនីយ៍ត្រី សៅ ប៊ុន អធិការនគរបាលស្រុកម៉ាឡៃបានឲ្យដឹងថា បុរសដែលសមត្ថកិច្ចចាប់ខ្លួនឈ្មោះ ស៊ិន សំនៀង ហៅ ហើម អាយុ២០ឆ្នាំ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ លោកអធិការបានបន្តទៀតថា៖ បុរសរូបនេះត្រូវបានចោទប្រកាន់ពីទឃាតកម្មគិតទុកជាមុននិងប៉ុនប៉ង ប្រព្រឹត្តកាលពីថ្ងៃទី២៦ ខែកក្កដា ឆ្នាំ ២០១១ នៅចណុចវេទិកាខេត្តស្ថិតនៅភូមិ៣ សង្កាត់ ព្រះពន្លា ក្រុងសិរីសោភ័ណ បណ្តាលឲ្យបុរសម្នាក់បានស្លាប់។
លោកវរសេនីយ៍ត្រី អ៊ុន សំអន នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា ឈ្មោះស៊ិន សំនៀង ហៅហើម ត្រូវបានសមត្ថកិច្ចចាប់បញ្ជូនទៅសាលាដំបូងខេត្តកាលពីល្ងាចថ្ងៃទី ២៥ ខែកក្កដា ឆ្នាំ២០១២ ក្នុងបទល្មើសព្រហ្មទណ្ឌដែលមានចែងឲ្យផ្តន្ទាទោសតាមមាត្រា២០០ និងមាត្រា២៧ នៃក្រមព្រហ្មទណ្ឌនៃព្រះរាជាណាចក្រកម្ពុជា៕នគរវត្ត