ថ្ងៃទី 13 ខែកក្កដា ឆ្នាំ2012, ម៉ោង 10:37 AM ឈ ភ
ភ្នំពេញ: លោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជាប្រធានវិទ្យុសំបុកឃ្មុំ បានវិលត្រឡប់មកកាន់កម្ពុជាវិញ នៅយប់ថ្ងៃទី១២ ខែកក្កដា ឆ្នាំ២០១២ វេលាម៉ោង ១០យប់ ដោយមានការចូលរួមឃ្លាំមើលពីសង្គមស៊ីវិល និងការរង់ចាំយកព័ត៌មានពីសំណាក់អ្នកកាសែត
ដោយហេតុថា អាចនឹងមានការចាប់ខ្លួន ព្រោះថា លោកជាជនមានការជាប់ពាក់ព័ន្ធជាមួយសមាជិកសមាគមលោក ក្នុងការបង្កើតរដ្ឋក្នុងរដ្ឋ ឬធ្វើអបគមន៍ នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ នាពេលកន្លងមកនេះ តែមន្ត្រីរដ្ឋាភិបាល អះអាងថា ការមកដល់មាតុប្រទេសរបស់លោកម៉មសូណង់ដូ មិនទាន់មានវិធានការអ្វីទេ ព្រោះនៅរង់ចាំបទបញ្ជាពីតុលាការ។
អ្នកស្រី ឌីន ផាណារ៉ា ជាភរិយាលោកម៉ម សូណង់ដូ បាននិយាយថា ប្តីរបស់អ្នកស្រី វិលត្រឡប់មកពីសហរដ្ឋអាមេរិកវិញ តាមជើងយន្តហោះកូរ៉េអៀនអ៊ែរ។ សមាជិកសមាជិកា នៃសមាគមអ្នកប្រជាធិបតេយ្យ ទៅរង់ចាំទទួល និងមន្ត្រីអង្គការមិនមែនរដ្ឋាភិបាល ទៅតាមឃ្លាំមើលខា្លចមានការចាប់ខ្លួន។ ប៉ុន្តែ អ្នកស្រី សង្ឃឹមថា នឹងមិនមានការចាប់ខ្លួនប្តីរបស់អ្នកស្រី នោះទេ។
អ្នកស្រី ឌីន ផាណារ៉ា បានបន្តទៀតថា ប្ដីរបស់អ្នកស្រី បានចាកចេញពីប្រទេសកម្ពុជា ទៅកាន់ប្រទេសបារាំង និងសហរដ្ឋអាមេរិក តាមការអញ្ជើញរបស់ប្រជាពលរដ្ឋខ្មែរ នៅក្រៅប្រទេស តាំងពីថ្ងៃទី១២ ខែមីនា ឆ្នាំ២០១២ ហើយរហូតមកដល់ត្រឹមថ្ងៃទី១៤ ខែកក្កដា ឆ្នាំ២០១២ គឺមានរយៈពេល ៤ខែគត់។
នៅព្រលានយន្តហោះអន្តរជាតិភ្នំពេញ លោក ម៉ម សូណង់ដូ បានឲ្យដឹងថា លោកមិនភ័យខ្លាចនឹងការចាប់ខ្លួនណាមួយ ពីសំណាក់សមត្ថកិច្ចឡើយ ព្រោះលោកមិនបានជាប់ពាក់ព័ន្ធនឹងករណីបំផុសមហាជនឲ្យចាប់ដី ពិសេសករណីនៅឃុំកំពង់ដំរី ស្រុកឆ្លូង ខេត្តក្រចេះ។
លោកឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ បានមានប្រសាសន៍ឲ្យដឹងថា មិនមានវិធានការអ្វីទេ ទៅលើលោក ម៉ម សូណង់ដូ នោះទេព្រោះប៉ូលិសមិនទាន់មានអ្វីពីខាងតុលាការនៅឡើយទេ។ ទាល់តែមានបទបញ្ជាពីតុលាការ ព្រោះរឿងនេះ តុលាការជាអ្នកស៊ើបអង្កេត។ ទាល់តែមានបទបញ្ជាពីតុលាការ ទើបយើងអនុវត្ត ហើយដោយអត់មានបញ្ជាអ្វីពីតុលាការ អីចឹងការវិលត្រឡប់របស់លោកម៉ម សូណង់ដូ ដូចជាមិនមានបញ្ហាអ្វីទេ៕agkor thom