(ដោយ៖អ៊ិនសាមិត្តប៉ោយប៉ែត)៖នគរបាលក្រុងប៉ោយប៉ែតចេញប្រតិបត្តិការណ៏ចុះបង្រ្កាបឃាត់ខ្លួនជនសង្ស័យបាន០៥នាក់ ក្នុងនោះ អ្នកជួញដូរថ្នាំ ញៀនខុសច្បាប់ពីរនាក់ប្តីប្រពន្ធ និងអ្នកប្រើប្រាស់០៣នាក់ទៀត។ការឃាត់ខ្លួនជនសង្ស័យទាំងនោះ បានធ្វើឡើង នៅវេលាយប់ ថ្ងៃទី១៦ ខែកក្កដា ឆ្នាំ២០១២ នៅចំណុចក្រោយផ្សាររ៉ា ស្ថិតនៅភូមិ -សង្កាត់- ក្រុង ប៉ោយប៉ែត ខេត្តបន្ទាយមានជ័យ និងធ្វើការឆែកឆេររកឃើញ និងដកហូតបានថ្នាំញៀនចំនួន៤៥គ្រាប់។លោកវរសេនីយ៍ត្រី អ៊ុំ សុផល អធិការនគរបាលក្រុងប៉ោយប៉ែត បានឲ្យដឹងថា៖ ការឃាត់ខ្លួនជនសង្ស័យជួញដូរ និងប្រើប្រាស់ថ្នាំញៀនរួមទាំងវត្ថុតាងនេះ ធ្វើឡើងបន្ទាប់ពីសមត្ថកិច្ច ធ្វើការតាមដានស្រាវជ្រាវស៊ើបអង្កេតតាមជំនាញ ហើយកំណត់មុខសញ្ញាជនសង្ស័យពីរនាក់ ប្តីប្រពន្ធ និងបានឃាត់ខ្លួនអ្នកទាំងពីរនាក់ ដែលប្តីមានឈ្មោះរ៉ាន វុទ្ធី អាយុ៣២ឆ្នាំ និងប្រពន្ធ ឈ្មោះ ផេង សារ៉ាយ អាយុ២៥ឆ្នាំ រស់នៅភូមិ សង្កាត់ ខាងលើ ហើយសមត្ថកិច្ចធ្វើការ ឆែកឆេររកឃើញដកហូតថ្នាំប្រភេទ គ្រាប់មេតំហ្វេតាមីនចំនួន៤៥គ្រាប់។លោកអធិការបានបន្តឲ្យដឹងទៀតថា៖ បន្ទាប់ពីសមត្ថកិច្ចឃាត់ខ្លួនពីរនាក់ប្តីប្រពន្ធរួច ក៏បន្តទៅឃាត់ខ្លួនអ្នកប្រើប្រាស់ថ្នាំញៀន០៣នាក់ទៀត ដែលមានឈ្មោះទី១៖ ចាប ម៉េង ភេទ ប្រុស អាយុ៤០ឆ្នាំ ទី២៖ឌី ម៉ូវ ភេទប្រុស អាយុ១៧ឆ្នាំ ទី៣៖ម៉ៅ រី ភេទប្រុស អាយុ ១៥ឆ្នាំ ពួកគេទាំង៣នាក់ រស់នៅភូមិ សង្កាត់ ខាងលើ។លោកអធិការបានបន្តឲ្យដឹងទៀតថា៖ជនសង្ស័យជួញដូរ និងប្រើប្រាស់ថ្នាំញៀនទាំង ០៥នាក់ នគរបាលក្រុងប៉ោយប៉ែតកំពុងកសាងសំណុំរឿងដើម្បីបញ្ជូនជនសង្ស័យនិងវត្ថុតាង ទៅកាន់ការិយាល័យជំនាញនៃស្នងការដ្ឋាននគរបាលខេត្តបន្ទាយមានជ័យដើម្បីយកទៅចាត់ការតាមនីតិវិធីច្បាប់បន្តទៀត៕