(ដោយ៖អ៊ិនសាមិត្តប៉ោយប៉ែត)៖ យុវជនឈាមរាវម្នាក់តាំងខ្លួនជាបងធំសង្គមងងឹតប្រើកាំបិតពូថៅ ដាវសាំម៉ូរ៉ៃ បង្ករភាពអនាធិបតេយ្យនៅក្នុងសង្គម ត្រូវសមត្ថកិច្ចឃាត់ខ្លួនកាលពីវេលា ម៉ោង១៧និង៣០នាទីថ្ងៃទី១៩ ខែកក្កដា ឆ្នាំ២០១២ នៅចំណុចឡធ្យូងក្នុងភូមិបាលិលេយ្យ២ សង្កាត់/ក្រុងប៉ោយប៉ែត ពីបទ (បំផ្លិចបំផ្លាញទ្រព្យសម្បត្តិ អ្នកដទៃមានស្ថានទម្ងន់ទោស) ដែលបានប្រព្រឹត្តកាលពីថ្ងៃទី១៥ ខែកក្កដាឆ្នាំ២០១២ ។
ជនសង្ស័យដែលសមត្ថកិច្ចឃាត់ខ្លួន មានឈ្មោះសេង សាវ៉ី ភេទប្រុស អាយុ២១ឆ្នាំ រស់នៅក្នុងភូមិ ប្រជាធម្ម សង្កាត់/ក្រុងប៉ោយប៉ែត ។ មុនពេលកើតហេតុ ជនសង្ស័យខាងលើ និងគូកន បីនាក់ផ្សេងទៀតមានឈ្មោះផល រដ្ឋា ហៅ (ឡ) ទី២ឈ្មោះដា និងទី៣ឈ្មោះវើន ។ ជនដៃដល់ទាំងបួននាក់ប្រដាប់ដោយអាវុធដាវសាំម៉ូរ៉ៃ គ្រប់ដៃបាននាំគ្នាទៅធ្វើសកម្មភាពទុច្ចរិតក្នុងគោលបំណងទៅកាប់សម្លាប់អ្នកស្រុកនៅក្នុងភូមិ ប៉ុន្តែដោយសារអ្នកស្រុកភ័យខ្លាចរត់អស់ ពួកគេក៏កាប់បំផ្លាញផ្ទះ អ្នកស្រុកតែម្ដងទៅ ។
ដើមហេតុគឺបណ្ដាលមកពីពួកគេខឹងចាស់ៗនៅក្នុងភូមិខាងលើស្ដីប្រៀនប្រដៅ ថាពួកឯងក្មេងៗ ដើរលេងយប់ ម៉ោង១.ម៉ោង២យប់ហើយ មិនព្រមចូលដេកធ្វើជាក្មេងបាតសង្គម។ពួកគេទាំងនោះខឹង ក៏ទៅកែនគ្នីគ្នា ប្រដាប់អាវុធមកតាមកាប់ ប៉ុន្តែសំណាងល្អចាស់ៗទាំងនោះរត់ចូលផ្ទះអស់ មិនព្រមចេញមកក្រៅទើបពួកគេបានត្រឹមតែកាប់បំផ្លាញផ្ទះតែប៉ុណ្ណោះ ។
លោក ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ដោយយោងតាមពាក្យ បណ្ដឹងជនរងគ្រោះឈ្មោះ សៀ វិចិត្រអាយុ២៨ ឆ្នាំរស់នៅក្នុងភូមិកើតហេតុជាម្ចាស់ផ្ទះដែលត្រូវ ក្រុមក្មេងទំនើងកាប់បំផ្លាញ ។ លោកក៏បានបញ្ជាកម្លាំងឲ្យចុះទៅស្រាវជ្រាវហើយឈានដល់ការឃាត់ខ្លួនបានជនសង្ស័យម្នាក់ក្នុងចំណោមបក្សពួករបស់គេទាំងបួន ។ លោកហម ម៉ុត បានបន្តទៀតថា សេង សាវ៉ី បានសារភាពថា ខ្លួនពិតជាបានប្រព្រឹត្តដូចជាការរៀបរាប់ខាងលើពិតប្រាកដមែន ដោយយោងតាមចម្លើយសារភាព សមត្ថកិច្ចបានកសាងសំណុំរឿងបញ្ជូនទៅកាន់ទីបញ្ជាការកងរាជអាវុធហត្ថខេត្តបន្ទាយមានជ័យ ដើម្បីចាត់ការតាមនីតិវិធី ដោយឡែកបក្សពួករបស់គេដែលកំពុងតែរត់គេចខ្លួន សមត្ថកិច្ចកំពុងតែស្វែងរកចាប់ខ្លួនបន្ត ៕
