ដោយ ៖ សហការី ថ្ងៃទី 16 កក្កដា 2012ម៉ោង 10:16:07
ខេត្តឧត្ដរមានជ័យ៖ ក្រុមយុវជនស្ម័គ្រចិត្តចុះវាស់វែងដីធី្លជូនប្រជាពលរដ្ឋចំនួន២៤ នាក់ ដែលទើបបានធើ្វដំណើរមកដល់ទីរួមស្រុកអន្លង់វែង កាលពីរសៀលថៃ្ងទី១៤កក្កដា ឆ្នាំ២០១២កន្លងមកនេះ ត្រូវបានទទួលស្វាគមន៍យ៉ាងរាក់ទាក់ពីសំណាក់នាយឧត្តមសេនីយ៏ គន់ គីម ប្រធានក្រុមទីប្រឹក្សាសម្តេចនាយករដ្ឋមន្ត្រី ហ៊ុន សែន និងអស់លោកជាមន្ត្រីរាជការ អាជ្ញាធរមូលដ្ឋានជាច្រើនរូបទៀត។ការមកដល់របស់ក្រុមយុវជន ស្ម័គ្រចិត្តនាពេលនេះ គឺត្រូវបានលោកអភិបាលស្រុក អន្លង់វែងទទួលឲ្យស្នាក់នៅអតីតផ្ទះតាម៉ុក ដែលជារមណីយដ្ឋានប្រវត្តិសាស្ត្រសព្វថ្ងៃ។
នាយឧត្តមសេនីយ៏ គន់ គីម បានមានប្រសាសន៍សម្ដែងនូវទឹកចិត្តសប្បាយរីករាយ និងស្វាគមន៏ដល់ប្អូនៗដែលបានចុះមករួមសហការជាមួយមន្ត្រី អាជ្ញាធរ ក៏ដូចជាមន្ត្រីជំនាញ ក្នុងការចុះវាស់វែងដីធី្លជូនបងប្អូនប្រជាពលរដ្ឋយើង ដើម្បីឲ្យពួកគាត់មានសិទ្ធិកាន់កាប់ និងគ្រប់គ្រងដោយស្របច្បាប់់ ស្របតាមអនុសាសន៍របស់សមេ្តចនាយករដ្ឋមន្ត្រី ហ៊ុន សែន ដែលបានថែ្លងកាលពីពេលថី្មៗកន្លងទៅនេះ។
នាយឧត្ដមសេនីយ៍ គន់ គីម បានមានប្រសាសន៍បន្តថា នៅភូមិសាស្ត្រស្រុកអន្លង់វែង គឺសម្បូរទៅដោយព្រៃក្រាស់ដូច្នេះការចុះប្រតិបត្តិការរបស់ប្អូនៗ ពិតជាជួបប្រទះនូវការលំបាកខ្លះៗជាមិនខាន។ ដូចនេះដើម្បីសម្រួលនូវការលំបាកជូនប្អូនៗ អាជ្ញាធរស្រុក ក៏ដូចជារូបនាយឧត្ដមសេនីយ៍ផ្ទាល់ ព្រមទាំងសប្បុរសជនបានត្រៀមជាស្រេចនូវសម្ភារប្រើប្រាស់ចាំបាច់មួយ ចំនួនសម្រាប់ជួយប្អូនៗយកទៅប្រើប្រាស់ រួមមានៈ ម៉ាស៊ីនភ្លើង ម៉ាស៊ីនព្រីន វិទ្យុទាក់ទង អាគុយ ធុងចម្រោះទឹក អាវភ្លៀង ថ្នាំពេទ្យ មុងនិងគ្រឿងឧបភោគបរិភោគ ប្រចាំថៃ្ងជាដើម។
នាយឧត្ដមសេនីយ៍ គន់ គីម បានផ្តាំផើ្ញដល់ប្អូនៗយុវជនស្ម័គ្រចិត្តត្រូវចេះថែទាំសុខភាពឲ្យ បានល្អ បើមានបញ្ហាអី្វមួយកើតឡើងត្រូវផ្តល់ព័ត៌មានមកអាជ្ញាធរឲ្យបាន ឆាប់រហ័ស ដើម្បីងាយស្រួលក្នុងការដោះស្រាយ ហើយក៏បានជូនពរឲ្យក្រុមយុទ្ធជនស្ម័គ្រចិត្តទាំងអស់ ចុះបំពេញការងារឲ្យទទួលបានជោគជ័យមួយរយភាគរយ។
នៅក្នុងឱកាសនៃពិធីសំណេះសំណាល នេះដែរ លោកឧកញ៉ា លឹម ហេង អនុប្រធានគណៈពង្រឹងស្រុកអន្លង់វែងក៏បានឧបត្ថម្ភដល់យុវជន ស្ម័គ្រចិត្តទាំង២៤នាក់ដោយក្នុងម្នាក់ៗទទួលបានថវិកា១០០ដុល្លារ អាមេរិក៕
