ថ្ងៃទី 12 ខែកក្កដា ឆ្នាំ2012, ម៉ោង 10:06 AM ឈ ភ
បន្ទាយមានជ័យ ៖ខេត្តបន្ទាយមានជ័យប្រទេសកម្ពុជា និងខេត្តស្រះកែវប្រទេសថៃ បានអះអាងក្នុងបិទកិច្ចប្រជុំគណៈកម្មាធិការព្រំដែនថ្នាក់មូល ដ្ឋានរបស់ខ្លួនកាលពីថ្ងៃទី ១១ កក្កដា នាសណ្ឋាគារអារញ្ញមើម៉េតស្រុកអារញ្ញប្រាថេតខេត្តស្រះកែវ ថានឹងបើកច្រកព្រំដែនអន្តរជាតិថ្មី ណងអៀន-ស្ទឹងបត់ និងច្រកតំបន់ព្រំដែនណូនម៉ាក់មុន-ស្ទឹងបត់ ។
លោក អ៊ុង អឿន អភិបាលខេត្តបន្ទាយមានជ័យ និងលោក ឆាត់គិទិណុបផាដុន អភិបាលរងខេត្តស្រះកែវ ដែលជាសហប្រធានអង្គប្រជុំគណៈកម្មាធិការព្រំដែនថ្នាក់តំបន់នៃខេត្ត ទាំងពីរ ថ្លែងថា: កិច្ចប្រជុំលើកដំបូងនេះរបស់ខេត្តទាំងពីរនឹងរួមចំណែក បំពេញ គោលបំនង គាំទ្រការអភិវឌ្ឍន៍សហគមន៍អាស៊ានឆ្នាំ២០១៥ លើវិស័យ សេដ្ឋកិច្ចសង្គមកិច្ចនិងសន្តិសុខ ដែលក្នុងនោះមានការពង្រីកពង្រឹងមិត្តភាពសម្ព័ន្ធភាព និង កិច្ចសហប្រតិបត្តិការគ្នាអោយជិតស្និទ្ធជឿទុកចិត្ត ដែលធ្វើអោយពលរដ្ឋទាំងសងខាងទំនាក់ទំនង ធ្វើអាជីវកម្ម រស់នៅបានរីកចំរើន សុខដុមរមនា ស្របតាមការដាក់អោយអនុវត្តរបស់រាជរដ្ឋាភិបាលប្រទេសទាំងពីរ ។
ការត្រៀមបើកច្រកព្រំដែនអន្តរជាតិថ្មី គឺច្រកណងអៀន ខេត្តស្រះកែវ-ច្រកស្ទឹងបត់ខេត្តបន្ទាយមានជ័យ ដែលកិច្ចប្រជុំJBC លើកទី ៥ភាគីទាំងពីរបានត្រៀមពិនិត្យលំអិតភូមិសាស្រ្ត រួមគ្នាលើកកម្ពស់សម្ព័ន្ធមេត្រីភាព , ការលក់ដូរនិងបណ្ដាក់ទុនរកស៊ី ទេសចរណ៍តាមព្រំដែន , ឯច្រកតំបន់ណូនម៉ាក់មុនស្រុកគោកធ្យូងខេត្តស្រះកែវ-ច្រកបឹងស្នោរ(ច្រក ៤៣) ភូមិព្រៃចាន់ស្រុកអូរជ្រៅខេត្តបន្ទាយមានជ័យ គណៈកម្មាធិការព្រំដែនថ្នាក់មូលដ្ឋាននៃខេត្តទាំងពីរ បានគាំទ្រលទ្ធផលប្រជុំនៃគណៈកម្មាធិការព្រំដែនថ្នាក់ភូមិភាគទាំងពីរ លើកទី២០ និងប្រជុំប្រតិភូខេត្តជាប់ព្រំដែនកម្ពុជា-ថៃលើកទី៤ ពាក់ព័ន្ធនឹងការប្រញាប់ប្រញាល់ទំនាក់ទំនង អោយបើកដោះដូរ ទំនិញ ភូមិណូនម៉ាក់មុនស្រុកគោកធ្យូង , ខេត្តស្រះកែវ-បឹងស្នោរ ស្រុកអូរជ្រៅ ខេត្តបន្ទាយមានជ័យ ជាបន្ទាន់ ដោយសហការរាយការណ៍ជូនគណៈកម្មាធិការព្រំដែន(JBC) របស់ភាគីទាំងពីរដើម្បីប្រគល់ភារកិច្ចអោយក្រុមប្រតិបត្តិការ ត្រួតពិនិត្យវាស់វែងលំអិតលើភូមិសាស្រ្តរួមគ្នា របស់ប្រទេសទាំងពីរដើម្បីចេញអនុវត្តវាស់វែងត្រួតពិនិត្យលម្អិត ភូមិសាស្រ្ត បរិវេណ និង បើកច្រកដោះដូរខាងលើជាបន្ទាន់ ៕
(អត្ថបទអង្គរធំ)
