ដោយ៖ អ៊ិន សាមិត្ត
ប៉ោយប៉ែត៖ សមត្ថកិច្ចក្រុងប៉ោយប៉ែត បានចុះបង្រ្កាប ទីតាំងជក់និងចែកចាយគ្រឿងញៀននឹងវង់ល្បែងដុះស្លែ ឃាត់ខ្លួនបាន៩នាក់ ដកហូតថ្នាំញៀនប្រភេទយ៉ាម៉ា៧គ្រាប់និងឧបករណ៍កែច្នៃមួយចំនួនកាលពីថ្ងៃទី១៦ខែឧសភាឆ្នាំ២០១២ នៅចំនុចមណ្ឌល២ ភូមិប្រជាធម្មលិច សង្កាត់-ក្រុងប៉ោយប៉ែត ខេត្តបន្ទាយមានជ័យ។
លោក អ៊ុំ សុផល អធិការក្រុងប៉ោយប៉ែត បានឲ្យដឹងថា ជនសង្ស័យទាំង៩នាក់ ចែកជាពីរក្រុម ក្រុមចែកចាយ៥នាក់ ១៖ឈ្មោះ សាន លី ភេទប្រុស អាយុ៤៨ឆ្នាំ ជាប្ដី ២៖ឈ្មោះ ង៉ូយ រ៉ា ភេទស្រី អាយុ៣១ឆ្នាំ ជាប្រពន្ធ រស់នៅភូមិកើតហេតុ ៣៖ អេង លីដា ភេទប្រុស អាយុ១៨ឆ្នាំ រស់នៅភូមិបាលិលេយ្យសង្កាត់-ក្រុងប៉ោយប៉ែត ជនទាំងបី ជាមុខសញ្ញា ចែកចាយគ្រឿងញៀន ៤៖ឈ្មោះ យឿន សំណាងភេទប្រុស អាយុ២៧ឆ្នាំ រស់នៅភូមិមិត្តភាព សង្កាត់-ក្រុងប៉ោយប៉ែត ៥៖ឈ្មោះ នីម និត ភេទប្រុស អាយុ២៥ឆ្នាំ រស់នៅភូមិក្បាលស្ពាន សង្កាត់-ក្រុងប៉ោយប៉ែត ខេត្តបន្ទាយមានជ័យ ជនសង្ស័យទាំងពីរជាអ្នកសេពគ្រឿងញៀន។
លោកអធិការបន្តថា ចំពោះក្រុមលេងល្បែងស៊ីសងខុសច្បាប់ សមត្ថកិច្ចឃាត់ខ្លួន ចំនួន៤នាក់ប្រុស២នាក់ស្រី២នាក់ និង វត្ថុតាងរួមមាន បៀរ អាប៉ោង ផងដែរ។ក្រោយពីសួរនាំ និង ចំលើយសារភាព ជនសង្ស័យ ត្រូវបានសមត្ថកិច្ច បញ្ជូនទៅស្នងការដ្ឋាននគរបាល ខេត្តបន្ទាយមានជ័យ កសាងសំនុំរឿងបញ្ជូន ទៅតុលាការ ដើម្បីចាត់ការតាមនីតិវីធី៕
