(ដោយ៖អ៊ិនសាមិត្តប៉ោយប៉ែត)៖ ស្ត្រីវៀតណាមវ័យ២០ឆ្នាំម្នាក់វង្វេងផ្លូវត្រូវសមត្ថកិច្ចកងរាជអាវុធហត្ថក្រុងប៉ោយប៉ែត ប្រទះឃើញជួយសង្គ្រោះ ហើយប្រកាសរកសាច់ញាតិឲ្យមកទទួលយកទៅលំនៅឋានវិញ កាលពីល្ងាចថ្ងៃទី១៩ ខែកក្កដា ឆ្នាំ២០១២ នៅទីបញ្ជាការប៉េអឹមក្រុងប៉ោយប៉ែត ។
តាមការឲ្យដឹង ពីលោក ដាង់ យ៉ីងយ៉ា អាយុ៤៣ឆ្នាំ រស់នៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំងបានប្រាប់ថាកូនស្រី របស់គាត់មានឈ្មោះ ដាង់ ធីម៉េង ភេទស្រី អាយុ២០ ឆ្នាំជាកូនទីពីរក្នុង ចំណោមកូនបួននាក់នាងមានសុខភាពល្អជាធម្មតាតាំងតែពីតូច ហើយធ្វើការនៅរោងចក្រ កាត់ដេរក្រុងភ្នំពេញ ដោយពុំមានបញ្ហាអ្វីឡើយ ។
ប៉ុន្តែរយៈពេលប៉ុន្មានខែនេះ នាងហាក់មានសភាពមិនសូវស្រួលដូចជាសរសៃប្រសាទ ដោយមិន ដឹងអំពីមូលហេតុ ស្រាប់តែបាត់ដំណឹងឈឹងតែម្ដង មិនដឹងជានាងរត់ទៅទីណាឡើយ ។ លោកបន្តថា ដោយសារបានគុណសមត្ថកិច្ចកងរាជអាវុធហត្ថក្រុងប៉ោយប៉ែតជួយសង្គ្រោះកូនស្រីរបស់គាត់ ទាន់ពេលវេលា ខណៈដែលនាងវង្វេងផ្លូវគ្មានគោលដៅ ហើយប្រកាសរកក្រុមគ្រួសារឲ្យមកទទួលទើបលោកបានជួបមុខកូនស្រីជាទីស្រឡាញ់របស់ខ្លួនវិញ ៕